បាត់ដី អស់ផ្ទះសម្បែង ស្ត្រីមេម៉ាយម្នាក់ យកចេតិយ ជាទីជម្រក!
ចុះផ្សាយនៅថ្ងៃ៖
ស្តាប់ - ០៧:០៥
ការរំលោភបំពានដីធ្លីនិងផ្ទះសម្បែង គេតែងតែឮជាញឹកញយនៅកម្ពុជា។ អ្នកខ្លះដែលបាត់បង់ដីធ្លីនិងទីជម្រក បានរត់ទៅជួលផ្ទះគេនៅ។ អ្នកខ្លះទៀត ក៏ទៅស្នាក់នៅជាមួយសាច់ញាតិ។ ក៏ប៉ុន្តែ មានស្ត្រីមេម៉ាយម្នាក់ ដែលបាត់បង់ផ្ទះសម្បែង ហើយគ្មានទីពឹង បានសម្រេចចិត្ត យកចេតិយក្នុងវត្តមួយនៅជាយក្រុងភ្នំពេញ ជាទីស្នាក់អាស្រ័យ។ មានអាជីពជាអ្នករើសអេដចាយ មួយថ្ងៃរកមិនបាន១ដុល្លារផង អ្នកស្រី សារ៉ាន់ ក៏បានជួយបោសសម្អាតចេតិយ ពេលបុណ្យទានម្តងៗ ដើម្បីបានលុយរស់បន្តទៀត។
រឿងនេះគឺជាខ្សែជីវិតពិតជាក់ស្តែង ហើយដែលត្រូវបានថតទុក ជាភាពយន្តឯកសារប្រហែលជា៧នាទី។ ភាពយន្តឯកសារនេះ ទើបតែត្រូវបាន មជ្ឈមណ្ឌលសោតទស្សន៍បុប្ផាណា ផ្សព្វផ្សាយតាមប្រព័ន្ធ YouTube និងគេហទំព័រផ្លូវការរបស់ខ្លួន កាលពីពេលថ្មីៗនេះ។ ធ្លាប់បានរៀនវគ្គថតកុនមជ្ឈមណ្ឌលសោតទស្សន៍បុប្ផាណា អ្នកស្រី ងឿម ផល្លី គឺជាអ្នកថតជីវិតស្ត្រីមេម៉ាយខាងលើនេះ ហើយនាងបានដាក់ចំណងជើងរឿងនេះថា រស់នៅដោយសារខ្មោច។
គម្រោង One Dollar ជាកម្មវិធីមួយរបស់មជ្ឈមណ្ឌលសោតទស្សន៍បុប្ផាណា ដែលជួយបង្រៀនបណ្តុះបណ្តាលអ្នកថតកុនវ័យក្មេង។ វគ្គសិក្សានេះ ជំរុញឲ្យផលិតករ ថតភាពយន្តឯកសារ ឆ្លុះបញ្ចាំងពីជីវិតមនុស្សរស់នៅក្រោមបន្ទាត់ក្រីក្រ។
នៅពេលប្រហែល២ខែទៀត គម្រោង One Dollar របស់មជ្ឈមណ្ឌលសោតទស្សន៍បុប្ផាណា នឹងបើកបង្រៀនអ្នកថតកុនវ័យក្មេងបន្ថែមទៀត។ ជាការបង្រៀនផ្តោតទៅលើការផលិតភាពយន្តឯកសារ! ជាពិសេសពីប្រធានបទជ្រុងមួយនៃសង្គម ដែលមនុស្សមានជីវភាពក្រោមបន្ទាត់ក្រីក្រ តែប្រឹងត្រដររស់។
ព័ត៌មានបន្ថែមពីគម្រោង One Dollar : http://onedollar.bophana.org/fr/pilot#episode15
មើលរឿង រស់នៅដោយសារខ្មោច : https://www.youtube.com/watch?v=dFeJUXeTT00&nohtml5=False
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ