លោក នួន ជា និង មេធាវី ដើរចេញពីបន្ទប់សវនាការដោយយល់ឃើញថាតុលាការឋិតនៅក្រោមអំណាចរដ្ឋាភិបាល
អង្គជំនុំជម្រះតុលាការកំពូលនៃសាលាក្ដីខ្មែរក្រហមបានផ្ដើមបើកសវនាការរយៈពេលបីថ្ងៃចាប់ពីថ្ងៃទី១៧ដល់១៩វិច្ឆិកាជុំវិញបណ្ដឹងសាទុក្ខក្នុងសំណុំរឿង០០២/០១។ សវនាការថ្ងៃដំបូងដែលមានផ្សាយផ្ទាល់នៅលើកញ្ចក់ទូរទស្សន៍ជាតិ កម្ពុជាមានភាពមិនចុងសម្រុងគ្នាខ្លាំងដោយសារតែជនជាប់ចោទ នួន ជា និង មេធាវីការពារក្ដី លោក សុន អរុណ បានដើរចេញពីបន្ទប់សវនាការដោយលោកទាំងពីរយល់ឃើញថាតុលាការ ឋិតក្រោមអំណាចរបស់រដ្ឋាភិបាលគឺកាត់ក្ដីលំអៀងនិងមិនយុត្តិធម៌។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៥
ជនជាប់ចោទ នួន ជា ដែលត្រូវបានអង្គជំនុំជម្រះសាលាដំបូងនៃសាលាក្ដីខ្មែរក្រហមសម្រេចដាក់ពន្ធនាគារអស់មួយជីវិតចាត់ទុកដំណើរការកាត់ក្ដីរបស់អង្គជំនុំជម្រះតុលាការកំពូលលើបណ្ដឹងសារទុកក្នុងសំណុំរឿង០០២/០១នៅព្រឹកថ្ងៃទី១៧វិច្ឆិកានេះកាន់តែអយុត្តិធម៌សម្រាប់រូបលោកទៀត ។ ដោយសារតែជនជាប់ចោទ នួន ជា និង មេធាវី មើលឃើញថាតុលាការឋិតក្រោមការគាបសង្កត់របស់រដ្ឋាភិបាលដែលជាហេតុធ្វើឲ្យតុលាការកាត់ក្ដីលំអៀងនិងមិនមានយុត្តិធម៌។
ការកាត់ក្ដីលំអៀងនិងមិនយុត្តិធម៌បើតាមលោក នួន ជា បន្ទាប់ពីចៅក្រមជាតិនិងអន្តរជាតិនៃអង្គជំនុំជម្រះសាលាដំបូងនៃសាលាក្ដីខ្មែរក្រហមបដិសេពសំណើររបស់លោកមេធាវី សុន អរុណ ក្នុងការហៅលោក ហេង សំរិនប្រធានរដ្ឋសភាបច្ចុប្បន្ន ក្នុងឋានៈជាសាក្សី។ លោក នួន ជា ចាត់ទុកលោក ហេង សំរិន ជាសាក្សីដ៏សំខាន់ដែលអាចជួយលោកឲ្យជៀសផុតពីការចោទប្រកាន់បានកាលពីអំឡុងការឈ្លានពានរបស់វៀតណាមមកលើកម្ពុជា។
លោក នួន ជា ក៏បានរិះគន់ជំហរមិនឯករាជ្យរបស់ចៅក្រមអន្តរជាតិក្នុងការគាំទ្រសេចក្ដីសម្រេចរបស់ចៅក្រមជាតិដែលបដិសេពមិនព្រមកោះហៅលោក ហេង សំរិន មកធ្វើជាសាក្សី។ បើដូចនេះដដែលចាំបាច់មានចៅក្រមអន្តរជាតិធ្វើអ្វី? នេះគឺជាការចោទសួររបស់លោក នួន ជា ។
ការដើរចេញពីបន្ទប់សវនារបស់លោក សុន អរុណ នៅថ្ងៃទី១៧វច្ឆិកានេះមិនមែនជារឿងថ្មីទេសម្រាប់សវនាជំនុំជម្រះក្ដីលើជន ជាប់ចោទ នួន ជា។ តែនេះជាលើកទី៣ហើយដោយសារតែលោកសុន អរុណ ចាត់ទុកដំណើរការជំនុំជម្រះក្ដីរាល់ពេលកាន់តែមានសភាពអាក្រក់ទៅ។ ដោយឡែកចំពោះជនជាប់ចោទ ខៀវ សំផន និងមេធាវីដែលមានវត្តមាននៅព្រឹកនេះដែរបានរក្សាភាពស្ងៀមស្ងាត់។
ក្រោយការថ្លែងរបស់លោក នួន ជា បញ្ចប់លោក សុន អរុណ ក៏បានសម្រេចចិត្តតាមកូនក្ដីមិននៅក្នុងបន្ទប់សវនាការទោះមានការស្នើសុំឬវែកញែកផ្លូវច្បាប់ពីសំណាក់ចៅក្រមជាតិអន្តរជាតិអំពីភាពចាំបាច់នៃមេធាវីការពារក្ដីក៏ដោយនោះ។
សូមបញ្ជាក់ថា អង្គជំនុំជម្រះតុលាការកំពូលនៃសាលាខ្មែរក្រហមនៅថ្ងៃទី១៦វិច្ឆិកានេះជុំវិញបណ្ដឹងសាទុក្ខក្នុងសំណុំរឿង០០២/០១គឺជាសវនាការមួយប្ដឹងជំទាស់ដោយជនជាប់ចោទ នួន ជា ខៀវ សំផន ចំពោះសេចក្ដីសម្រេចរបស់អង្គជំនុជម្រះនៃសាលាក្ដីខ្មែរដែលសម្រេចផ្ដន្ទាទោសលោកទាំងពីរអស់មួយជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ