ក្រសួងការបរទេសកម្ពុជាចេញកំណត់ទូតថាពាក្យសម្តីឯកអគ្គរដ្ឋទូតអាមេរិកប្រចាំកម្ពុជា ព្រហើនខ្លាំង
ក្រសួងការបរទេសកម្ពុជាបានបញ្ជាក់ថា ពាក្យសម្តីរបស់ឯកអគ្គរដ្ឋទូតអាមេរិកប្រចាំកម្ពុជា មានលក្ខណៈព្រហើនខ្លាំង ទោះបីជាគាត់ជាតំណាងប្រទេសធំមួយក៏ដោយ។ នេះគឺជាការបញ្ជាក់នៅក្នុងកំណត់ទូតរបស់ក្រសួងការបរទេសកម្ពុជាផ្ញើទៅកាន់ស្ថានទូតអាមេរិកប្រចាំនៅកម្ពុជា នៅថ្ងៃទី២០ ឧសភាម្សិលមិញ។
ចុះផ្សាយនៅថ្ងៃ៖
ស្តាប់ - ០៣:២៦
កំណត់ទូតរបស់ក្រសួងការបរទេសកម្ពុជា បានបង្ហាញថា ក្រសួង មានការរំខានចិត្តយ៉ាងខ្លាំង ចំពោះការទិតៀនរបស់លោក វីលៀម ថដ ឯកអគ្គរដ្ឋទូតអាមេរិកប្រចាំនៅកម្ពុជាចំពោះសេចក្តីព្រាងច្បាប់ស្តីពីសមាគម និងអង្គការក្រៅរដ្ឋាភិបាល ដែលបានចុះផ្សាយនៅក្នុងកាសែតភ្នំពេញប៉ុស្តិ៍ កាលពីថ្ងៃទី ១៩ ឧសភា ក្រោមចំណងជើងថា «ភ្នែកទាំងអស់ផ្តោតទៅលើច្បាប់អង្គការក្រៅរដ្ឋាភិបាលៈ ថដ»។
ក្រសួងការបរទេសកម្ពុជាបានបកប្រែរាល់ខ្លឹមសារមួយចំនួនចេញពីអត្ថបទដើម ជាភាសាអង់គ្លេស ដែលមានចំណងជើងថា «All eyes on NGO law: US Ambassador Todd» ខណៈដែលកាសែត ភ្នំពេញប៉ុស្តិ៍ភាសាខ្មែរ ក៏បានចុះផ្សាយអត្ថបទនេះ នៅក្នុងទំព័រមុខរបស់ខ្លួនកាលពីថ្ងៃទី ១៩ ឧសភាដែរ ក្រោមចំណងជើងថា «ទូតអាមេរិកចេញមុខរិះគន់សេចក្តីព្រាងច្បាប់គ្រប់គ្រងអង្គការក្រៅរដ្ឋាភិបាល» ។
កាសែតភ្នំពេញប៉ុស្តិ៍ជាភាសាខ្មែរបានសរេសរថា ក្នុងអត្ថបទមួយដែលចេញផ្សាយកាលពីថ្ងៃអាទិត្យ លោក William E.Todd ឯកអគ្គរដ្ឋទូតសហរដ្ឋអាមេរិកប្រចាំកម្ពុជា បានអំពាវនាវដល់រដ្ឋាភិបាលកម្ពុជា ឲ្យពិចារណាឲ្យបានត្រឹមត្រូវនូវច្បាប់ថ្មីដ៏ចម្រូងចម្រាស ដែលគ្រប់គ្រងអង្គការក្រៅរដ្ឋាភិបាល សហជីពកម្មករ និងអ៊ីនធឺណិត។ ភ្នំពេញប៉ុស្តិ៍បានបន្តថា ក្នុងអំឡុងពេលបំពេញបេសសកម្មពាណិជ្ជកម្ម ទៅសហរដ្ឋអាមេរិក លោក William E.Todd បានបង្ហាញពីភាពរីករាយចំពោះការចាប់អារម្មណ៍ ដែលលោកបានជួបប្រទះនៅកម្ពុជា ពីមនុស្ស និងអាជីវកម្ម ប៉ុន្តែលោកបានព្រមានថា៖ « ដើម្បីទាញប្រយោជន៍នេះ កម្ពុជាត្រូវបង្ហាញនូវរូបភាពដែលទាក់ទាញវិនិយោគទុនបរទេស បច្ចេកវិទ្យា និងធនធានមនុស្ស»។
លោកបានព្រមានទៀតថា « មុខមាត់កម្ពុជារងបានរងផលប៉ះពាល់» ដោយច្បាប់ដ៏ចម្រូងចម្រាស់ ដែលបច្ចុប្បន្នកំពុងព្រាង ដែលរួមបញ្ចូលសេចក្តីព្រាងច្បាប់ស្តីពីអង្គការមិនមែនរដ្ឋាភិបាល ច្បាប់ស្តីពីឧក្រិដ្ឋកម្មតាមប្រព័ន្ធអ៊ីនធឺណិត និងច្បាប់សហជីព។
ភ្នំពេញប៉ុស្តិ៍ក៏បានសរសេរបន្តថា លោក Todd បានគាំទ្រ «ការអំពាវនាវឲ្យមានសកម្មភាព» ពីសម្ព័ន្ធសហគមន៍លទ្ធិប្រជាធិបតេយ្យ ដែលមាន២៧ប្រទេស ដែលបានជំរុញឲ្យរដ្ឋាភិបាលកម្ពុជាចេញផ្សាយច្បាប់ចម្លងនៃច្បាប់ស្តីពីអង្គការមិនមែនរដ្ឋាភិបាល ដែលបានស្នើឡើង ហើយអនុវត្តឆ្លងកាត់ការពិគ្រោះយោបល់ហ្មត់ចត់ជាមួយសង្គមស៊ីវិល។ លោកបានសរសេរថា៖ « ខណៈដែលរដ្ឋាភិបាលកម្ពុជា ពិចារណាពីជំហានបន្ទាប់ វាជាការសំខាន់ដែលត្រូវយល់ដឹងថា ពិភពលោកកំពុងឃ្លាំមើល»។
ពាក់ព័ន្ធទៅនឹងពាក្យបញ្ហានេះ ក្រសួងការបរទេសកម្ពុជាបានចេញកំណត់ទូតរបស់ខ្លួនទៅកាន់ស្ថានទូតអាមេរិកប្រចាំនៅកម្ពុជា ដោយបញ្ជាក់ថាពាក្យសម្តីរបស់លោកឯកអគ្គរដ្ឋទូតអាមេរិកប្រចាំកម្ពុជា មានលក្ខណៈព្រហើនខ្លាំង ទោះបីជាលោកជាតំណាងប្រទេសធំមួយក៏ដោយ។ ក្រសួងការបរទេសបានបញ្ជាក់ទៀតថា កម្ពុជាជានីតិរដ្ឋ រាល់សេចក្តីព្រាងច្បាប់ រឺសេចក្តីស្នើច្បាប់ ត្រូវដាក់ជូនរដ្ឋសភាពិនិត្យ អនុម័ត ស្របតាមការកំណត់របស់ច្បាប់រដ្ឋ
ធម្មនុញ្ញ។
ជាងនេះទៅទៀត ក្រសួងការបរទេសកម្ពុជា ក៏បានបង្ហាញពីមាត្រាទី ៤១.១នៃអនុសញ្ញាទីក្រុងវីយ៉ែន ស្តីពីទំនាក់ទំនងការទូត ចែងថា« ដោយពុំមានប៉ះពាល់ដល់បុព្វសិទ្ធិ និងអភ័យឯកសិទ្ធិរបស់ពួកគេ អ្នកដែលទទួលបានបុព្វសិទ្ធិ និងអភ័យឯក សិទ្ធិមានកាតព្វកិច្ចគោរពច្បាប់ និងបទប្បញ្ញត្តិរបស់ប្រទេសម្ចាស់ផ្ទះ។ ហើយក្រសួងបានលើកឡើងថា ដូច្នេះឯកអគ្គរដ្ឋទូតអាមេរិកត្រូវគោរពអនុសញ្ញានេះ ដែលអាមេរិកបានផ្តល់សច្ចាប័នរួចហើយនៅក្នុងឆ្នាំ ១៩៧២។ ហើយថារាល់ប្រទេសសមាជិកអង្គការសហប្រជាជាតិធំក្តីតូចក្តីត្រូវគោរពគ្នាទៅវិញ ទៅមក ដោយស្មើភាព និងត្រូវគោរពតាមអនុសញ្ញាខាងលើ និងការគួរសមដែលជាទំលាប់អន្តរជាតិ ក្នុងទំនាក់ទំនងរវាងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ