សាលាក្តីខ្មែរក្រហមទទួលបានចៅក្រមថ្មីជំនួសចៅក្រមដែលបានលាឈប់ជាបន្តបន្ទាប់យ៉ាងតិច៥នាក់
អគ្គលេខាធិការនៃអង្គការសហប្រជាជាតិ បានសម្រេចតែងតាំង លោកស្រី ម៉ូរីន ហាឌីងក្លាក (Maureen HARDING CLARK) ជនជាតិអៀរឡង់ ធ្វើជាសហចៅក្រមអន្តរជាតិ នៅសាលាក្ដីខ្មែរក្រហម។ នេះបើតាមគេហទំព័ររបស់អង្គជំនុំជម្រៈវិសមញ្ញាក្នុងតុលាការកម្ពុជា កាលពីថ្ងៃទី២ ខែសីហា។ ចាប់តាំងពីបង្កើតតុលាការកូនកាត់នេះមក គឺមានចៅក្រមអន្តរជាតិយ៉ាងតិចចំនួន៥នាក់ហើយដែលបានលាឈប់ជាបន្តបន្ទាប់ក្រោមហេតុផលធ្វើការមិនចុះសម្រុងជាមួយចៅក្រមខ្មែរនៅសាលាក្តីក្រហម។
ចុះផ្សាយនៅថ្ងៃ៖ កែប្រែថ្ងៃទី៖
បន្ទាប់ពីបានទទួលការតែងតាំងពីអគ្គលេខាធិការអង្គការសហប្រជាជាតិ António Guterres និងបានទទួលការអនុម័តពីឧត្តមក្រុមប្រឹក្សានៃអង្គចៅក្រមរួចមក ព្រះមហាក្សត្រកម្ពុជា ទ្រង់ប្រោសព្រះរាជទានតែងតាំងលោកស្រី Maureen HARDING CLARK ជនជាតិអៀរឡង់ ជាចៅក្រមអន្តរជាតិនៅអង្គជំនុំជម្រះតុលាការកំពូល នៃអង្គជំនុំជម្រះវិសាមញ្ញក្នុងតុលាការកម្ពុជា។
លោកស្រីចៅក្រម Clark គឺជាអ្នកចូលមកជំនួសលោកស្រីចៅក្រម Agnieszka KLONOWIECKA-MILART (ប៉ូឡូញ) ដែលបានលាឈប់ពីមុខតំណែងកាលពីចុងឆ្នាំ២០១៨។
លោកស្រីចៅក្រម Clark បានបំពេញការងារជាសហចៅក្រមស៊ើបអង្កេតអន្តរជាតិបម្រុងក្នុងឆ្នាំ២០១៥។ លោកស្រីធ្លាប់បំពេញការងារជាចៅក្រមបំពេញកិច្ច (ad litem) នៃតុលាការព្រហ្មទណ្ឌអន្តរជាតិសម្រាប់អតីតប្រទេសយូហ្គោស្លាវី (ICTY) ពីឆ្នាំ២០០១ ដល់ឆ្នាំ២០០៣ ហើយត្រូវបានបោះឆ្នោតជ្រើសរើសជាចៅក្រមនៅតុលាការព្រហ្មទណ្ឌអន្តរជាតិ (ICC) ពីឆ្នាំ២០០៣ ដល់ឆ្នាំ២០០៦។ មួយរយៈខ្លីក្រោយមក គាត់បានបំពេញការងារជាចៅក្រមនៅតុលាការជាន់ខ្ពស់របស់អៀរឡង់រហូតដល់ឆ្នាំ២០១៤។
សូមជម្រាបថា មានចៅក្រមភាគីអន្តរជាតិយ៉ាងហោចណាស់៥នាក់ហើយ ដែលបានលាឈប់ជាបន្តបន្ទាប់ពីសាលាក្តី កូនកាត់មួយនេះ ដែលសម្រាប់កាត់ទោសមេដឹកនាំជាន់ខ្ពស់នៃរបបខ្មែរក្រហម។ ការលាឈប់របស់ពួកគេ គឺភាគីច្រើនអះអាងថា ដោយសារតែមានភាពចម្រូងចម្រាស និងខ្វែងគំនិតគ្នា ជាមួយសហចៅក្រមខ្មែរនៃភាគីកម្ពុជា ចំពោះការស៊ើបអង្កេតបន្ថែមលើមេដឹកនាំជាន់ខ្ពស់ខ្មែរក្រហម ដទៃទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ