អង្គការលីកាដូ៖ ករណីរំលោភសេពសន្ថវៈ អាចជាមធ្យោបាយរកប្រាក់របស់អាជ្ញាធរ
ករណីរំលោភសេពសន្ថវៈ អាចជាមធ្យោបាយរកប្រាក់របស់អាជ្ញាធរ។ នេះគឺជាការលើកឡើងរបស់អ្នកស្រី ណាលី ពីឡូក នាយិកាអង្គការលីកាដូ នៅក្នុងឱកាសដែលអង្គការនេះ ចេញផ្សាយរបាយការណ៍ថ្មីមួយ។ ជារបាយការណ៍កម្រាស់៣១ទំព័រ ដែលមានចំណងជើងថា ការរួចខ្លួនពីបទល្មើស៖ ការអនុវត្តច្បាប់ចំពោះបទល្មើសរំលោភសេពសន្ថវៈ ក្នុងប្រពន្ធតុលាការកម្ពុជា។ របាយការណ៍ដែលទើបតែចេញផ្សាយនៅថ្ងៃអាទិត្យនេះ បានរកឃើញផងដែរថា ករណីជាច្រើននៃបទល្មើសរំលោភសេពសន្ថវៈ មិនត្រូវបានស៊ើបអង្កេតនិងផ្ដន្ទាទោសឲ្យបានត្រឹមត្រូវឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
របាយការណ៍របស់អង្គការលីកាដូ ធ្វើឡើងដោយផ្អែកលើការពិនិត្យទៅលើករណីចំនួន៧៦២ នៃករណីរំលោភសេពសន្ថវៈ និងប៉ុនប៉នរំលោភសេពសន្ថវៈ នៅក្នុងឆ្នាំ២០១២ ២០១៣ និង២០១៤។ ករណីទាំង៧៦២ករណីនេះ កើតឡើងនៅរាជធានីភ្នំពេញ និងខេត្តចំនួន១២ផ្សេងទៀត ដែលលីកាដូកំពុងធ្វើការអំឡុងពេលនោះ។
នៅក្នុងចំណោមករណីសិក្សាទាំងអស់ មានប្រមាណ៤រយករណី ត្រូវបានបិទនៅពេលដែលលីកាដូកំពុងសរសេររបាយការណ៍។ មួយភាគបីក្នុងចំណោមករណីទាំងជាង៤០០នោះ ត្រូវបានបិទបញ្ចប់ដោយការផ្ដន្ទាទោស និងសម្រេចឲ្យមានទោសតាមច្បាប់ព្រហ្មទណ្ឌ។ មួយភាគបីទៀត ត្រូវបានបិទបញ្ចប់មុនពេលបើកសវនាការ។ ហើយមួយភាគបីចុងក្រោយ ត្រូវបានបិទបញ្ចប់ដោយមានការផ្ដន្ទាទោសដែលមិនត្រឹមត្រូវ ឬមានការសម្រេចថាមិនមានទោស។
បើតាមរបាយការណ៍អង្គការលីកាដូ នៅពេលដែលករណីជាច្រើនត្រូវបានបិទដោយមានកំហុសឆ្គងខុសៗគ្នា គឺមានមូលហេតុរួមមួយដែលកើតឡើងនៅគ្រប់ករណីទាំងអស់។
នោះគឺអំពើពុករលួយ។ អ្នកស្រី ណាលី ពីឡូក នាយិកាអង្គការលីកាដូ គូសបញ្ជាក់ថា អំពើពុករលួយកើតមានស្ទើរគ្រប់ទីកន្លែង។ បើតាមនាយិកាអង្គការដដែល ជនរងគ្រោះហាក់ដូចជាត្រូវបង់ប្រាក់ក្រៅច្បាប់ គ្រប់ពេលដែលមកទាក់ទងមន្ដ្រីសាធារណៈ។
ចំណែកជនសង្ស័យប្រសិនមានប្រាក់ ជននោះអាចនឹងទិញនូវសេរីភាពរបស់ខ្លួនមកវិញបាន។ អ្នកស្រី ណាលី ពីឡូក បន្តថា ករណីរំលោភសេពសន្ថវៈ អាចជាមធ្យោបាយរកប្រាក់របស់អាជ្ញាធរ។ និងថា អាជ្ញាធរហាក់ដូចជាមិនបានយកចិត្តទុកដាក់លើភាពយុត្តិធម៌នោះទេ។
ភាពទន់ខ្សោយនៃប្រព័ន្ធយុត្តិធម៌របស់កម្ពុជា ធ្វើឲ្យសាធារណៈជនបាត់បង់ទំនុកចិត្តលើប្រព័ន្ធយុត្តិធម៌កម្ពុជា។ នេះបើតាមអង្គការលីកាដូ។ អង្គការការពារសិទ្ធិមនុស្សនេះ អំពាវនាវឲ្យរដ្ឋាភិបាលដោះស្រាយបញ្ហានេះ ដោយការពង្រឹងច្បាប់ដែលអនុវត្តមិនបានពេញលេញ និងធ្វើវិសោធនកម្មនូវច្បាប់ពាក់ព័ន្ធនានា ឲ្យមានអត្ថន័យកាន់តែពេញលេញនិងច្បាស់លាស់ឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ