អាយុ២៥ឆ្នាំ យុវជន ខ័ន ដាលក្ខណ៍ ពិការភ្នែកទាំងពីរ ប៉ុន្តែគាត់មានទឹកដមសំឡេងពីរោះមួយបែប។ គាត់ចាកចេញពីស្រុកកំណើត មករកស៊ីច្រៀងតាមចិញ្ចើមថ្នល់នៅភ្នំពេញនេះ បានជាង១ឆ្នាំហើយ។ គាត់ស្នាក់នៅជួលផ្ទះគេ ជាមួយជនពិការដទៃទៀត។ យុវជនពិការភ្នែករូបនេះ មានភរិយាជាជនពិការភ្នែកទាំងពីរដូចគ្នា និងមានកូនចំនួនពីរនាក់។ក្នុងជីវិតនេះ ដាលក្ខណ៍ សោកស្តាយណាស់ដែលពុំអាចមើលឃើញពិភពលោកដូចមនុស្សទូទៅ ហើយសំខាន់ជាងនេះ គឺសូម្បីតែមុខឪពុកម្តាយរបស់ខ្លួន គ៏គ្មានឱកាសបានឃើញផង។ទោះយ៉ាងណាក៏ដោយចុះ ទៅថ្ងៃខាងមុខ ដាលក្ខណ៍ មានក្តីស្រមៃចង់បង្កើតតន្ត្រីជនពិការមួយក្រុម ដើម្បីដើរច្រៀងក្នុងកម្មវិធីផ្សេងៗ។
