អភិបាលខេត្តស្វាយរៀង៖កម្មករពីរនាក់ត្រូវបានដោះលែងបន្ទាប់ពីសមត្ថកិច្ចសាកសួរជុំវិញករណីគប់បំផ្លាញរោងចក្រ
កម្មករពីរនាក់ត្រូវបានសមត្ថកិច្ចខេត្តហៅមកសួរនាំ ពាក់ព័ន្ធការគប់បំផ្លាញរោងចក្រមួយ កន្លែងនៅក្នុងតំបន់សេដ្ឋកិច្ច ពិសេស ក្រុងបាវិតខេត្តស្វាយរៀង កាលពីប៉ុន្មានថ្ងៃមុននេះនៅអំឡុងពេលកូដកម្មទាមទារការតំឡើង ប្រាក់ខែបន្ថែម។ បន្ទាប់ពីការសួរនាំសមត្ថកិច្ចក៏បានដោះលែងពួកគេទាំងពីរនាក់វិញ។ ដោយឡែកចំពោះកម្មករដែលធ្វើការកូដកម្ម កាលពីថ្ងៃទី១៧ធ្នូ ពួកគេចូលធ្វើការវិញហើយនៅព្រឹកថ្ងៃសៅនេះ។
ចុះផ្សាយនៅថ្ងៃ៖
ស្តាប់ - ០២:០៩
លោក ជៀង អំ អភិបាលខេត្តស្វាយរៀងថា ការសួរនាំទៅលើកម្មករទាំងពីរនាក់គ្រាន់តែជាករណីមួយធម្មតាប៉ុណ្ណោះពោលគឺមិនមានការឃាត់ឬឃុំខ្លួននោះទេ បន្ទាប់ពីពួកគេសង្ស័យថា ជាប់ពាក់ព័ន្ធការគប់បំផ្លាញទ្រព្យសម្បត្តិ រោងចក្រដែលបណ្ដាលឲ្យបែកកញ្ចក់និងប៉ះពាល់កន្លែងមួយចំនួនទៀតរបស់រោងចក្រ។
លោក ជៀង អំ ឲ្យដឹងទៀតថា ភាគីរោងចក្រមានការអន់ចិត្តជាមួយកម្មករដែលធ្វើកូដកម្មឈានទៅដល់ការគប់បំផ្លាញរោងចក្រ។ សកម្មភាពគប់បំផ្លាញនេះលោកអភិបាលខេត្តថា ជាទង្វើលខុសច្បាប់ដែលអាចឈានទៅដល់ការដាក់ទោសទណ្ឌទៀតផង។ ក្នុងន័យនេះ លោក ជៀង អំ អំពាវឲ្យកម្មករធ្វើកូដកម្មនានាដោយសន្តិវិធីជៀសវាងការប្រើហិង្សាដែលប៉ះពាល់ទៅដល់រោងចក្រនិងប្រយោជន៍សាធារណៈផ្សេងទៀត។
ទន្ទឹមនេះ ភាគីរោងចក្រកំពុងតែវិភាគទៅលើទំហំនៃការខូចខាតដែលគិតជាទឹកប្រាក់ក្រោយការគប់បំផ្លាញទៅលើរោងចក្រពីសំណាក់ក្រុមកម្មករ។ តែដំណោះស្រាយនៅចំពោះមុខរោងចក្រអាចនឹងប្ដឹងបកមកកម្មករវិញ។ នេះការបញ្ជាក់បន្ថែមរបស់លោក ជៀង អំ ។
យ៉ាងណាក៏ដោយរហូតមកដល់ថ្ងៃទី១៩ធ្នូនេះកម្មករដែលស្ថិតនៅតំបន់សេដ្ឋកិច្ចពិសេស មេតហាតធេន និង តំបន់សេដ្ឋកិច្ចពិសេសតាយសេង ស្ថិតនៅក្រុងបាវិត បានចូលធ្វើការវិញហើយពោលគឺនៅសល់តែកម្មករប្រមាណតែជាង២០ភាគរយទៀតប៉ុណ្ណោះនៅមិនទាន់ត្រឡប់ចូលធ្វើការវិញ។
លោក អ៊ូ សាខឿន អនុប្រធានមន្ទីរការងារ និងបណ្តុះបណ្តាញវិជ្ជាជីវៈ ខេត្តស្វាយរៀងឲ្យដឹងថា ទោះបីជាកម្មករត្រឡប់មកធ្វើការជាធម្មតាវិញក៏ដោយ តែកម្លាំងសមត្ថកិច្ចនៅតែបន្តដាក់យាមកាមដើម្បីត្រៀមបង្ការក្រែងកើតមានកូដកម្មជាថ្មីនៅថ្ងៃបន្តបន្ទាប់ទៀត។
ដោយឡែកចំពោះកិច្ចប្រជុំជាមួយភាគីពាក់ព័ន្ធកាលពីថ្ងៃទី១៨ធ្នូ រវាងតំណាងសហជីព ភាគីរោងចក្រ និង មន្ទីរការងារ គ្រប់ភាគីបដិសេព មិនជាប់ព័ន្ធជាមួយនឹងកូដកម្មនេះទេ។ កូដកម្មនេះត្រូវបានពួកគេចាត់ទុកថាធ្វើឡើងគ្មានគោលបំណងច្បាស់លាស់។ តែរោងចក្របានស្នើមកខាងសហជីពឲ្យធ្វើជាតំណាងកម្មករដើម្បីសម្របសម្រួលឲ្យកម្មករចូលធ្វើការវិញ។
សូមបញ្ជាក់ថា កាលពីថ្ងៃទី១៧ធ្នូ កម្មករធ្វើការនៅតំបន់សេដ្ឋកិច្ចពិសេស មេតហាតធេន និង តំបន់សេដ្ឋកិច្ចពិសេសតាយសេង ស្ថិតនៅក្រុងបាវិត ផ្ទុះកូដកម្មតវ៉ាទាមទារការដំឡើងប្រាក់ឈ្នួលបន្ថែមលើប្រាក់ខែគោល១៤០ដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ