ពាណិជ្ជកម្ម កម្ពុជា និងថៃ ថយចុះតិចតួចនៅឆ្នាំ២០១៦
គិតចាប់ពីខែមករា ដល់ខែធ្នូ ឆ្នាំ២០១៦ កន្លងទៅនេះ ទំហំពាណិជ្ជកម្ម រវាង កម្ពុជា និងថៃមានទឹកប្រាក់ប្រមាណ ៥.៦ពាន់លានដុល្លារអាមេរិក ដែលចំនួននេះប្រហាក់ ប្រហែលនឹងទំហំពាណិជ្ជកម្មឆ្នាំ២០១៥កន្លងទៅ។ ការថយចុះតិចតួចនៃទំហំពាណិជ្ជកម្មនេះ ត្រូវបានអ្នកនាំពាក្យក្រសួងពាណិជ្ជកម្ម បញ្ជាក់ថា ដោយសារតែកម្ពុជាងាកទៅរកពាណិជ្ជកម្មជាមួយប្រទេសផ្សេងទៀតក្នុង តំបន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
យោងតាមរបាយការណ៍របស់ស្ថានតំណាងពាណិជ្ជកម្ម ប្រចាំស្ថានទូតថៃ ដែលត្រូវបានចុះផ្សាយដោយទីភ្នាក់ងារព័ត៌មានជាតិ បានឲ្យដឹងថាគិតចាប់ពីខែមករា ដល់ខែធ្នូ ឆ្នាំ២០១៦ កន្លងទៅនេះ ទំហំពាណិជ្ជកម្ម រវាង កម្ពុជា និងថៃមិនបានប្រែប្រួលច្រើននោះទេពោលគឺ ប្រហែលនឹងទំហំពាណិជ្ជកម្មកាលពីឆ្នាំ២០១៥។
ក្នុងរបាយការណ៍នោះបានឲ្យដឹង បានឱ្យដឹងថា ចាប់ពីខែមករា ដល់ខែធ្នូ ឆ្នាំ២០១៦ ទំហំពាណិជ្ជកម្មកម្ពុជា និងថៃ គិតជាទឹកប្រាក់៥,៥៩៥លានដុល្លារអាមេរិក ថយចុះ០,០៤ភាគរយ ធៀបនឹងឆ្នាំ២០១៥ ដែលមានចំនួន៥,៥៩៧លានដុល្លារអាមេរិក។
បើតាមក្រសួងពាណិជ្ជកម្ម ពាណិជ្ជកម្មរវាងកម្ពុជា និងថៃ នៅឆ្នាំ២០១៦មានទំហំទឹកប្រាក់ប្រមាណ៥,៥៧៧លានដុល្លារអាមេរិក ថយចុះ០,១៦ភាគរយ ធៀបនឹងឆ្នាំ២០១៥ ដែលមានទំហំទឹកប្រាក់ប្រមាណ៥,៥៩៥ពាន់លានដុល្លារអាមេរិក។ ចំពោះការនាំចេញទៅប្រទេសថៃក្នុងឆ្នាំ២០១៦នេះ មានទំហំជាទឹកប្រាក់ប្រមាណ៩៣៦លានដុល្លារអាមេរិក ហើយកម្ពុជាបាននាំចូលពីថៃមានទំហំទឹកប្រាក់ប្រមាណ៤,៦៤១លានឲដុល្លារអាមេរិក។
អ្នកនាំពាក្យក្រសួងពាណិជ្ជកម្មកញ្ញា សឹង សុផារី បានឲ្យដឹងថាការធ្លាក់ចុះបន្តិចបន្តូចនៃពាណិជ្ជកម្មរវាងប្រទេសទាំងពីរ គឺដោយសារតែឆ្នាំកន្លងទៅកម្ពុជាពឹងផ្អែកតែលើប្រទេសជិតខាងទេ ប៉ុន្តែបច្ចុប្បន្ននេះកម្ពុជាមានដៃគូពាណិជ្ជកម្មច្រើនជាងមុន។ កញ្ញាសឹង សុផារី បន្ថែមថាទំនិញខ្លះ កម្ពុជាមិនចាំបាច់ពឹងផ្អែកតែលើប្រទេសថៃទាំងស្រុងនោះទេ ព្រោះបច្ចុប្បន្ននេះមានប្រទេសផ្សេងទៀតក្នុងតំបន់ដែលមានទំនិញប្រើប្រាស់ប្រហាក់ប្រហែលថៃដែរ។
ចំណែកមន្ត្រីស្ថានទូតថៃប្រចាំប្រទេសកម្ពុជាបានឲ្យដឹងដែរថា មូលហេតុនៃការធ្លាក់ចុះនេះ គឺដោយសារតែតម្លៃប្រេងឥន្ធនៈបានធ្លាក់ថ្លៃក្នុងឆ្នាំ២០១៦កន្លងទៅនេះ។ ប្រភពដដែលបានបន្ថែមថាការថយនេះ គឺគ្រាន់តែជាការថយចុះនៃចំនួនទឹកប្រាក់តែប៉ុណ្ណោះ ប៉ុន្តែមិនមានការថយចុះបរិមាណនៃការនាំចេញនាំចូលរវាងប្រទេសទាំងពីរទេ។
បើតាមក្រសួងពាណិជ្ជកម្ម ផលិតផល ដែលកម្ពុជា នាំចេញទៅប្រទេសថៃភាគច្រើនជាផលិតផលកសិកម្ម ចំណែកផលិតផលដែលកម្ពុជានាំចូលពីប្រទេសថៃវិញរួមមានសម្ភារៈប្រើប្រាស់កសិកម្ម គ្រឿងអេឡិចត្រូនិច ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ