វ៉ាក់សំាង BCG ៖ ស្ថាបនិកមន្ទីរពេទ្យគន្ធបុប្ផា និងក្រសួងសុខាភិបាលយល់ឃើញផ្ទុយគ្នា!
លោកវេជ្ជបណ្ឌិត Beat Richner ស្ថាបនិកមន្ទីរពេទ្យគន្ធបុប្ផា និងជាទីប្រឹក្សាក្រសួងសុខាភិបាលកម្ពុជា បានលើកឡើងថា វ៉ាក់សាំង ការពារជំងឺរបេងរលោកស្រោមខួរប្រភេទ BCG គ្មានប្រសិទ្ធភាព។ លោកបានអំពាវនាវទៅកាន់ក្រសួងសុខាភិបាល ជាបន្តបន្ទាប់ ឱ្យបញ្ឈប់ការចាក់វ៉ាក់សាំងប្រភេទទៅលើកុមារ ព្រោះមិនត្រឹមតែគ្មានប្រសិទ្ធភាពទេ ថែមទាំងមានផលអាក្រក់ថែមទៀត។ ប៉ុន្តែនៅថ្ងៃនេះ ក្រសួងសុខាភិបាលតាមរយៈប្រធានកម្មវិធីជាតិផ្តល់ថ្នាំបង្ការបាន បដិសេធចំពោះការលើកឡើងនេះ និងបញ្ជាក់ថា ក្រសួងសុខាភិបាល និង អង្កការសុខភាពពិភពនៅតែណែនាំឱ្យចាក់វ៉ាក់សំាងនេះជាបន្តទៀត ដោយសារតែវ៉ាក់សំាងនេះ នៅតែមានប្រសិទ្ធភាពចំពោះកុមារ ហើយថាគ្មានឯកសារណាមួយដែល បញ្ជាក់ថា ក្មេងដែលវ៉ាក់សំាង BCG នេះហើយ មានសភាពធ្ងន់ធ្ងរដូចអ្វីដែលលោក វេជ្ជបណ្ឌិត Beat Richnerលើកឡើងនោះទេ ។
ចុះផ្សាយនៅថ្ងៃ៖
ស្តាប់ - ០១:៤០
លោក ឱក វិចិត្រ ប្រធានកម្មវិធីជាតិផ្តល់ថ្នាំបង្ការបានរៀបរ៉ាប់ពីហេតុផលដែលបញ្ជាក់ថា វ៉ាក់សំាង BCG ប្រឆាំងជំងឺរបេង នៅតែមានប្រសិទ្ធិភាព មិនត្រឹមតែប៉ុណ្ណោះវាថែមទាំងជួយការពារថែមទៀត។ លោកលើកឡើងថា សូមកុំយកករណី២ ឬ ៣ ដែលបណ្តាលឱ្យទារកស្លាប់មកធ្វើជាការវិនិច្ឆ័យជាទូទៅ ។ ពីព្រោះក្រសួងសុខាភិបាលគឺធ្វើអ្វីស្របទៅតាមការណែនាំរបស់អង្កការសុខភាពពិភពលោក ទៅកាន់គ្រប់បណ្តាប្រទេសកំពុងអភិវឌ្ឍន៍ទាំងអស់ ពិសេសតំបន់អាស៊ីប៉ាស៊ីហ្វិក។
លោកវេជ្ជបណ្ឌិត Beat Richner បានលើកឡើងថានៅសហរដ្ឋអាមេរិកគេបានរកឃើញថា វ៉ាក់សាំង BCG នេះគ្មានប្រសិទ្ធភាពតាំងតែពីឆ្នាំ ១៩៤៣មកម្លេះ ។ លោកថា នៅប្រទេសបារាំង គេឈប់ចាក់វ៉ាក់សាំងនេះ តាំងតែពីឆ្នាំ ២០០៥ ចំណែកប្រទេសស្វីសឈប់ចាក់ នៅឆ្នាំ ២០១១។ លោកក៏យល់ថាហេតុអ្វីបានជា អង្កការសុខភាពពិភពលោក នៅតែបន្តឱ្យប្រទេសក្រីក្រចាក់វ៉ាក់សាំងនេះ។
ចំពោះកង្វល់ដែល លោកវេជ្ជបណ្ឌិត Beat Richner នេះ! លោក ឱក វិចិត្រ បន្តថា ហេតុអី្វបានជាវ៉ាក់សាំងនេះត្រូវបានប្រើប្រាស់ភាគច្រើនតែនៅក្នុងប្រទេសដែលកំពុងអភិវឌ្ឍន៍? ពីព្រោះប្រទេសដែលជឿនលឿននិង មានការអភិវឌ្ឍន៍មិនសូវមានជំងឺឆ្លង បើមានក៏ស្ថិតក្នុងករណីមួយតិចបំផុតដែលអាចដោះស្រាយទាន់ពេលវេលា ដូច្នេះហើយគេមិនចង់ចំណាយថវិកាជាតិខ្វះខ្ជាយនោះទេ ។
ដោយឡែកចំពោះសំណើរបស់ លោកវេជ្ជបណ្ឌិត Beat Richner ឱ្យបញ្ឈប់ការចាក់វ៉ាក់សាំងនេះ ដោយហេតុថា រកឃើញទារក ឬ កុមារដែលស្លាប់ប៉ុន្មានករណីចុងក្រោយនេះ ត្រូវបានប្រធានកម្មវិធីជាតិផ្តល់ថ្នាំបង្ការពន្យល់ថា ៖ គ្រប់វ៉ាក់សាំងការពារជំងឺទំាងអស់ មិនមែនទទួលបានប្រសិទ្ធភាព១០០% នោះទេ មានន័យថាវាជោគជ័យប្រសិនបើយើងចាក់ថ្នាំបង្ការទៅលើមនុស្ស១០០នាក់ ហើយអាចការពារបានមនុស្សចំនួន៩៥នាក់នោះ។ ហើយក្រសួងសុខាភិបាលក៏បានយកមកធ្វើការពិភាក្សាផងដែរប៉ុន្តែ គ្មានឯកសារណាមួយដែល បញ្ជាក់ថា ក្មេងដែលវ៉ាក់សំាង BCG នេះហើយ មានសភាពធ្ងន់ធ្ងរដូចអ្វីដែលលោក វេជ្ជបណ្ឌិត Beat Richnerលើកឡើងនោះទេ។
ជាការកត់សម្គាល់ តាំងតែពីលោក វេជ្ជបណ្ឌិត Beat Richner ត្រូវបានតែងតាំងជាទីប្រឹក្សាក្រសួងសុខាភិបាលមក លោកបានជម្រាបទៅដល់អាជ្ងាធរសុខាភិបាលជាច្រើនលើកច្រើនសារ ឱ្យបញ្ឈប់ការចាក់វ៉ាក់សាំង BCG ។ ព្រោះលោកបានរកឃើញកុមារដែលបានស្លាប់ ប៉ុន្មានករណីចុងក្រោយនេះកើតឡើងដោយសារតែពួកគេបានទទួលការចាក់វ៉ាក់សាំង BCG នេះ។ លោក វេជ្ជបណ្ឌិត Beat Richner បញ្ជាក់ថា ក្មេងដែលចាក់វ៉ាក់សំាងនេះ មានទម្រង់ជំងឺរបេងធ្ងន់ធ្ងរជាងក្មេងដែលមិនបានចាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ