បក្សប្រឆាំងមិនបោះបង់ចោល បំណងជួបរដ្ឋមន្ត្រីទាំងបីដើម្បីសាកសួរ
មន្ត្រីជាន់ខ្ពស់គណបក្ស សង្រ្គោះជាតិបានឲ្យដឹងថាគណបក្សមិនទាន់សម្រេចយ៉ាងណានៅឡើយទេ ចំពោះការបញ្ជូនលិខិតកោះហៅរដ្ឋមន្ត្រីទាំងបីមកសាកសួរ។ ប៉ុន្តែសមាជិកសភានៃបក្សប្រឆាំងនឹងជួបប្រធានរដ្ឋសភាជាមុនសិន ដើម្បីពិភាក្សារឿងកោះហៅរដ្ឋមន្ត្រីទាំង៣នោះ។ ចំណែកអ្នកនាំពាក្យសភាថានៅពេលណា ដែលស្ថានការណ៍នយោបាយល្អឡើងវិញ នោះការផ្អាកជាបណ្តោះអាសន្ននៃការបញ្ជូនសំណើកោះអញ្ជើញរដ្ឋមន្ត្រី នឹងត្រូវដកចេញវិញដែរ។
ចុះផ្សាយនៅថ្ងៃ៖
ស្តាប់ - ០២:១០
លោកសុន ឆ័យ មន្ត្រីជាន់ខ្ពស់គណបក្សសង្រ្គោះជាតិបានប្រាប់វិទ្យុបារាំងអន្តរជាតិនៅថ្ងៃទី៥ ខែកុម្ភៈ ថាក្រោយពីមានសេចក្តីប្រកាសពីអ្នកនាំពាក្យរដ្ឋសភាពីការផ្អាកបណ្តោះអាសន្នការបញ្ជូនលិខិតកោះហៅរដ្ឋមន្ត្រី គណបក្សសង្រ្គោះជាតិមានគម្រោងជួបប្រធានរដ្ឋសភា លោកហេង សំរិន។ ជាជំនួប ដើម្បសាកសួរបញ្ជាក់ពីមូលហេតុ និងនីតិវិធី ក្នុងការអនុវត្តគោលការណ៍រដ្ឋធម្មនុញ្ញមាត្រា៩៦ ចំពោះការកោះហៅរដ្ឋមន្ត្រីមកសាកសួរ។
លោកសុន ឆ័យបញ្ជាក់ថាក្នុងសប្តាហ៍ក្រោយនេះ លោកនឹងទាក់ទងលោក ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភា ដើម្បីធ្វើលិខិតសុំជួបលោកហេង សំរិន ប្រធានរដ្ឋសភា។ លោកលើកឡើងថាការកោះហៅរដ្ឋមន្ត្រីមកសាកសួរ គឺជាកាតព្វកិច្ចចំពោះមុខប្រជាជាតិ ហើយបក្សសង្រ្គោះជាតិគោរពទៅតាមរដ្ឋធម្មនុញ្ញ និងបទបញ្ជាផ្ទៃក្នុងនៃរដ្ឋសភា។
សូមបញ្ជាក់ថាលោកនាយករដ្ឋមន្ត្រីហ៊ុន សែននៅថ្ងៃទី១ ខែកុម្ភៈ បានគូសបញ្ជាក់ថា នឹងមិនអនុញ្ញាតឲ្យរដ្ឋមន្រ្តី៣រូបរបស់ខ្លួនចូលទៅបំភ្លឺនៅសភាតាមការអញ្ជើញរបស់តំណាងរាស្រ្តគណបក្សប្រឆាំងនោះទេ នេះក៏ព្រោះតែគណបក្សមិនចូលប្រជុំសភា។ រដ្ឋមន្ត្រី៣រូបចុងក្រោយ ដែលតំណាងរាស្រ្តគណបក្សសង្រ្គោះជាតិគ្រោងហៅចូលបំភ្លឺនៅសភានោះរួមមាន៖ រដ្ឋមន្រ្តីក្រសួងការពារជាតិ រដ្ឋមន្រ្តីក្រសួងកសិកម្ម និងរដ្ឋមន្រ្តីក្រសួងការងារ។
ក្រោយមកនៅថ្ងៃទី២ ខែកុម្ភៈ អ្នកនាំពាក្យរដ្ឋសភាបានចេញសេចក្តីប្រកាសមួយ ថា ស្របតាមកឋាខណ្ណទី២ នៃមាត្រា៣១ នៃរដ្ឋធម្មនុញ្ញ និងដើម្បីធានាឲ្យមានសមធម៌នយោបាយរវាងគណបក្សនយោបាយទាំងពីរដែលមានអាសនៈក្នុងរដ្ឋសភា ក្នុងករណីដែលអ្នកតំណាងរាស្ត្រគណបក្សក្រៅរដ្ឋាភិបាលពុំអនុវត្តការងាររបស់ខ្លួននៅក្នុងរដ្ឋសភាជាប្រក្រតីទេនោះ រដ្ឋសភាសម្រេចផ្អាកមិនបញ្ជូនសំណើកោះអញ្ជើញរដ្ឋមន្ត្រីនៃរាជរដ្ឋាភិបាលកម្ពុជាឲ្យមកបំភ្លឺចំពោះគណៈកម្មការនានានៃរដ្ឋសភា ដែលដឹកនាំដោយគណបក្សក្រៅរាជរដ្ឋាភិបាលជាបណ្តោះអាសន្នសិន។
លោក ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភាបានប្រាប់វិទ្យុបារាំងបន្ថែមថានៅពេលដែលស្ថានការណ៍នយោបាយល្អឡើងវិញ នោះការផ្អាកជាបណ្តោះអាសន្ននេះនិងត្រូវដកចេញ។ លោកឡេង ប៉េងឡុងថា ដើម្បីមានសមធម៌នយោបាយ គណបក្សដែលមានអាសនៈទាំងពីរត្រូវតែ ចរចាគ្នា និងធ្វើការជាមួយគ្នានៅក្នុងសភាក្នុងនាមជាតំណាងរាស្ត្រ ហើយជជែកគ្នាពីប្រធានបទអ្វីក៏បានដែរ ទៅតាមរចនាសម្ព័ន្ធរបស់សភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ