ក្រសួងយុត្តិធម៌ ដាក់ចេញយុទ្ធនាការ ១០០ថ្ងៃ ដើម្បីស្តារកេរ្តិ៍ឈ្មោះប្រព័ន្ធយុត្តិធម៌កម្ពុជាឡើងវិញ
គណៈកម្មាធិការដឹកនាំការកែទម្រង់ច្បាប់ និងប្រព័ន្ធយុត្តិធម៌ នៅថ្ងៃទី ១២ ឧសភានេះ បានដាក់ចេញនូវការអនុវត្ត “យុទ្ធនាការ ១០០ថ្ងៃ ក្នុងការវាយតម្លៃលើគុណភាព និងប្រសិទ្ធភាពនៃតុលាការនៅក្នុងប្រទេសកម្ពុជា”។ យុទ្ធនាការនេះ នឹងចាប់ផ្តើមពីដើមខែមិថុនាខាងមុខនេះតទៅ ដោយមានការស្ទង់មតិទៅលើមន្រ្តីតុលាការនៅទូទាំង ២៤រាជធានី-ខេត្ត នៅទូទាំងប្រទេស។ នេះគឺជាលើកទី ១ហើយ ដែលក្រសួងយុត្តិធម៌បានដាក់ចេញនូវយុទ្ធនាការបែបនេះ ដើម្បីស្តារកេរ្តិ៍ឈ្មោះប្រព័ន្ធយុត្តិធម៌នៅប្រទេសកម្ពុជាឡើងវិញ។
ចុះផ្សាយនៅថ្ងៃ៖
ស្តាប់ - ០២:១៣
“យុទ្ធនាការ ១០០ថ្ងៃ ក្នុងការវាយតម្លៃលើគុណភាព និងប្រសិទ្ធភាពនៃតុលាការកម្ពុជា” ដែលចាប់ផ្តើមអនុវត្តពីដើមខែមិថុនាខាងមុខ នឹងធ្វើឡើងជា ២ដំណាក់កាល។ ដំណាក់កាលទី១. គឺការបំពេញរបាយការណ៍ស្វ័យវាយតម្លៃរបស់តុលាការ (Self-Assessment Report) ដោយផ្អែកលើកម្រងសំណួរអង្កេត (Survey Questionnaires) ទាក់ទងនឹងធាតុទាំង ៧នៃប្រព័ន្ធស្តង់ដាតុលាការអន្តរជាតិ។ ដែលក្នុងនោះរួមមាន៖ ទី១៖ ការដឹកនាំនិងគ្រប់គ្រងស្ថាប័ន, ទី២៖ ការធ្វើផែនការ និងគោលបំណងនយោបាយស្ថាប័ន, ទី៣៖ ធនធានស្ថាប័ន (មនុស្ស សម្ភារៈ និងហិរញ្ញាវត្ថុ), ទី៤៖ នីតិវិធីដំណើរការស្ថាប័ន, ទី៥៖ សេចក្ដីត្រូវការ និងការពេញចិត្តរបស់អតិថិជន, ទី៦៖ ភាពងាយស្រួល និងតម្លៃសេវារបស់ស្ថាប័ន, និងទី៧៖ គឺការជឿទុកចិត្ត និងជឿជាក់ពីសាធារណៈជន។
ចំណែកដំណាក់កាលទី ២ គឺការសិក្សាបឋមទៅលើរបាយការណ៍ស្វ័យវាយតម្លៃរបស់តុលាការ និងការចុះជួបដោយផ្ទាល់នៅមន្រ្តីតាមស្ថាប័នតុលាការទាំង ២៤រាជធានី-ខេត្ត ដើម្បីពិនិត្យនិងពិភាក្សាបន្ថែម ដោយផ្អែកទៅលើរបាយការណ៍ដែលបានស្ទង់មតិនេះ។ បន្ទាប់មក លទ្ធផលដែលបានមកពីយុទ្ធនាការនេះ នឹងដាក់ជូនសិក្ខាសាលាថ្នាក់ជាតិមួយដើម្បីពិភាក្សាបន្ត។ នេះបើតាមការបញ្ជាក់ពី លោក ជិន ម៉ាលីន អ្នកនាំពាក្យក្រសួងយុត្តិធម៌។
លោក ជិន ម៉ាលីន ដែលជាប្រធានលេខាធិការដ្ឋានអចិន្ដ្រៃយ៍នៃគណៈកម្មាធិការកំណែទម្រង់ច្បាប់និងប្រព័ន្ធយុត្តិធម៌ផងនោះ បានលើកឡើងថា នេះគឺជាលើកទី ១ហើយ ដែលក្រសួងយុត្តិធម៌បានដាក់ចេញនូវយុទ្ធនាការ ១០០ថ្ងៃ ក្នុងការវាយតម្លៃលើគុណភាព និងប្រសិទ្ធភាពនៃតុលាការកម្ពុជា” នេះ។ លោកបន្តថា កន្លងមក មានតែស្ថាប័ន ឬអង្គការមួយចំនួន បានវាយតម្លៃ និងដាក់ចំណាត់ថ្នាក់តុលាការកម្ពុជា ដោយមិនផ្អែកលើការពិតនោះទេ។
លោកបានលើកឡើងថា យុទ្ធនាការនេះ នឹងរកឲ្យឃើញពីចំណុចខ្លាំង ចំណុចខ្សោយ រួមទាំងបញ្ហាប្រឈមនានានៅក្នុងតុលាការកម្ពុជាទាំង ២៤រាជធានី-ខេត្ត បន្ទាប់ពីការដាក់ឲ្យអនុវត្តនូវច្បាប់គោលចំនួនបីកាលពីចុងឆ្នាំ ២០១៤ រួមមាន ច្បាប់ស្តីពីការរៀបចំអង្គតុលាការ, ច្បាប់ស្តីពី លក្ខន្តិកៈចៅក្រមនិងព្រះរាជអាជ្ញា និងច្បាប់ស្តីពី ការរៀបចំនិងការប្រព្រឹត្តទៅរបស់ឧត្តមក្រុមប្រឹក្សានៃអង្គចៅក្រមជាដើម។ ច្បាប់ទាំងបី គឺជាមូលដ្ឋានគ្រឹះនៃកំណែទម្រង់នៃប្រព័ន្ធយុត្តិធម៌នៅកម្ពុជា។
លោក ជិន ម៉ាលីន ដែលជាប្រធានលេខាធិការដ្ឋានអចិន្ដ្រៃយ៍នៃគណៈកម្មាធិការនេះ បានបញ្ជាក់ថា យុទ្ធនាការនេះ គឺដើម្បីស្តារកេរ្តិ៍ឈ្មោះប្រព័ន្ធយុត្តិធម៌នៅកម្ពុជា និងការជឿទុកចិត្តពីសំណាក់ប្រជាពលរដ្ឋកម្ពុជាឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ