កម្ពុជាត្រៀមខ្លួនទទួលនិងផ្ទៀងផ្ទាត់ផែនទី១៨ផ្ទាំងពីអង្គការសហប្រជាជាតិនៅថ្ងៃស្អែក
ផែនទីចំនួន១៨ផ្ទាំង ពីអង្គការសហប្រជាជាតិ ត្រូវបាននាំមកដល់ប្រទេសកម្ពុជាហើយ កាលពីវេលាម៉ោងប្រមាណ១០យប់ ថ្ងៃទី១៨សីហាម្សិលមិញ។ ពិធីប្រគល់ ទទួល និងផ្ទៀងផ្ទាត់ផែនទី នឹងត្រូវធ្វើឡើងជាផ្លូវការនៅវិមានសន្តិភាព នៃទីស្ដីការគណៈរដ្ឋមន្ដ្រីនៅថ្ងៃទី២០សីហាស្អែក។ អ៊ឹម រចនា សូមឆ្លៀតឱកាសនេះ រំលឹកឡើងវិញនូវដំណើរដើមទងដែលជំរុញឲ្យកម្ពុជាខ្ចីផែនទីពីអង្គការសហប្រជាជាតិ ដូចតទៅ៖
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
សំណើខ្ចីផែនទីពីអង្គការសហប្រជាជាតិ របស់រដ្ឋាភិបាលកម្ពុជា ធ្វើឡើងនៅថ្ងៃទី០៦ខែកក្កដា ក្រោយពីមានតំណាងរាស្ត្របក្សសង្គ្រោះជាតិចោទប្រកាន់ថា រដ្ឋាភិបាលប្រើប្រាស់ផែនទីក្លែងក្លាយធ្វើឲ្យកម្ពុជាខាតបង់ទឹកដីទៅឲ្យប្រទេសជិតខាង។ និងស្របពេលដែលបញ្ហាព្រំដែនរវាងកម្ពុជានិងប្រទេសវៀតណាមកំពុងតែឡើងកំដៅខ្លាំង។
នៅក្នុងលិខិតចុះថ្ងៃទី០៦ខែកក្កដា លោកនាយករដ្ឋមន្ដ្រីហ៊ុន សែន បានស្នើទៅកាន់អគ្គលេខាធិការនៃអង្គការសហប្រជាជាតិ អនុញ្ញាតឲ្យកម្ពុជាខ្ចីផែនទីដើមទាំងអស់ ដែលកម្ពុជាបានតំកល់ទុកនៅស្ថាប័នកំពូលអន្ដរជាតិនេះ។ ផែនទីដែលប្រមុខរដ្ឋាភិបាលកម្ពុជាសំដៅដល់ គឺផែនទីបោន ខ្នាត ១លើ១០០ពាន់ បោះពុម្ពដោយក្រុមភូមិសាស្ត្រឥណ្ឌូចិន។ ជាផែនទីដែលសម្ដេចព្រះនរោត្តម សីហនុ ព្រះបរមរតនកោដ្ឋ យកទៅតំកល់នៅអង្គការសហប្រជាជាតិ នៅឆ្នាំ១៩៦៤។
ប៉ុន្តែជាការកត់សម្គាល់ អង្គការសហប្រជាជាតិមិនអាចរកឃើញផែនទីបោន ខ្នាត១លើ១០០ពាន់ដែលកម្ពុជាសុំខ្ចីនោះទេ។ បើតាមលិខិតរបស់លោក បាន គីមូន ចុះថ្ងៃទី០៥សីហា អង្គការសហប្រជាជាតិរកឃើញតែផែនទីមួយចំនួន ពីកន្លែងផ្ទុកឯកសាររបស់បណ្ណាល័យ ដាក ហាម៉ាស្កូហ្សូល ដែលអាចមានប្រយោជន៍ចំពោះរដ្ឋាភិបាលកម្ពុជា។ ផែនទីដែលរកឃើញនោះមានចំនួន១៨ផ្ទាំង ហើយអង្គការសហប្រជាជាតិសម្រេចឲ្យកម្ពុជាខ្ចីផែនទីទាំងនោះ ក្នុងពេលមួយកំណត់។
ចុងក្រោយនេះ ផែនទីចំនួន១៨ផ្ទាំងពីអង្គការសហប្រជាជាតិ ត្រូវបាននាំមកដល់ប្រទេសកម្ពុជាហើយ កាលពីវេលាម៉ោងប្រមាណ១០យប់ ថ្ងៃទី១៨សីហា។ ពិធីប្រគល់ ទទួល និងផ្ទៀងផ្ទាត់ផែនទី នឹងត្រូវធ្វើឡើងជាផ្លូវការនៅវិមានសន្តិភាព នៃទីស្ដីការគណៈរដ្ឋមន្ដ្រី នៅថ្ងៃទី២០សីហា។ ពិធីនេះ នឹងមានការចូលរួមពីតំណាងគណបក្សនយោបាយ តំណាងរដ្ឋសភា តំណាងព្រឹទ្ធសភា អ្នកស្រាវជ្រាវ និងស្ថាប័នពាក់ព័ន្ធមួយចំនួនទៀតផងដែរ។
គួរជម្រាបថា ផែនទីទាំង១៨ផ្ទាំងដែលអង្គការសហប្រជាជាតិឲ្យកម្ពុជាខ្ចីនាពេលនេះ មិនមែនជាផែនទីដែលកម្ពុជាស្នើសុំពាក់ព័ន្ធនឹងព្រំដែនជាមួយប្រទេសជិតខាងនោះទេ។ វាគឺជាផែនទីស្ដីពីការទម្លាក់គ្រាប់បែករបស់អាមេរិក ចូលក្នុងទឹកដីកម្ពុជា នៅក្នុងសម័យសង្គមរាស្ត្រនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ