កម្ពុជានឹងដាក់ឱ្យដំណើរការរោងចក្រកែច្នៃសំណល់ប្លាស្ទីកទៅជាប្រេងខ្មៅ នៅឆ្នាំ២០១៦
នៅសុក្រទី២៧ វិច្ឆិកានេះ រដ្ឋាភិបាលកម្ពុជា និងអង្គការយូណេស្កូ បានប្រារព្ធយុទ្ធនាការបញ្ឈប់ការប្រើថង់ប្លាស្ទីកនៅកម្ពុជា។ ពិធីដែលបានរៀបចំនៅក្រុងភ្នំពេញនេះ មានការចូលរួមពីយុវជនជាង៥០០នាក់។ ក្នុងឱកាសនេះ រដ្ឋមន្ត្រីក្រសួងទេសចរណ៍ ប្រកាសថា កម្ពុជានឹងដាក់ឱ្យដំណើររោងចក្រកែច្នៃសំរាមថង់ប្លាស្ទីកជាប្រេងខ្មៅ នៅឆ្នាំ២០១៦ខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
«យុទ្ធនាការប្រទេសខ្ញុំគ្មានថង់ផ្លាស្ទីក» ជាឱកាសដើម្បីបង្ហាញប្រជាពលរដ្ឋកម្ពុជា នូវគំរូ ល្អមួយរបស់អ្នកមុខអ្នកការ អ្នកតំណាងរាស្ត្រ រដ្ឋមន្ត្រី និងបញ្ញវន្ត ដែលនាំគ្នាចុះផ្លូវដើររើសសំរាម តាមរមណីយដ្ឋានសំខាន់ៗ នៅក្រោយពេលពិធីបុណ្យអុំទូក។ ចំពោះមុខនិស្សិតរាប់រយនាក់ រដ្ឋមន្ត្រីក្រសួងទេសចរណ៍ ប្រកាសទាំងមោទនភាពថា កម្ពុជានឹងមានរោងចក្រកែច្នៃសំរាមថង់ប្លាស្ទីកជាប្រេងខ្មៅ ជាលើកដំបូង នៅពេលឆាប់ៗខាងមុខនេះ។
ជាមួយគ្នានេះ លោក នី ផល្លី ទីប្រឹក្សាបច្ចេកទេសរបស់គម្រោងរោងចក្រកែច្នៃសំណល់ប្លាស្ទីកភ្នំពេញ បានផ្តល់បទសម្ភាសន៍ផ្តាច់មុខដល់វិទ្យុបារាំងអន្តរជាតិថា គម្រោងវិនិយោគទុនសម្រាប់រោងចក្រកែច្នៃសំរាមនេះ តម្លៃជាង១លានដុល្លារសហរដ្ឋអាមេរិក ដែលផ្តួចផ្តើមដោយក្រុមហ៊ុនខ្មែរក្នុងស្រុក។ ជាដំបូង រោងចក្រនេះ នឹងកែច្នៃ ថង់ប្លាស្ទីកនិងជ័រ ទៅជាប្រេងខ្មៅ និងបន្ទាប់មក អាចចម្រាញ់បន្តទៀត ទៅជាប្រេងម៉ាស៊ូត សម្រាប់ប្រើប្រាស់របស់គ្រឿងចក្រនិងយានយន្ត។
លោក នី ផល្លី គឺជាអ្នកបច្ចេកទេសខ្មែរដែលបានទទួលការបណ្តុះបណ្តាល និងធ្លាប់ធ្វើការនៅប្រទេសបារាំងមួយរយៈផង បានបង្ហើបប្រាប់ថា រោងចក្រកែច្នៃសំណល់ប្លាស្ទីកនេះ មានទីតាំងនៅសង្កាត់ព្រៃស ខណ្ឌដង្កោ ក្រុងភ្នំពេញ និងបានសាងសង់រួចរាល់ជិត៧០ភាគរយហើយ ហើយគ្រោងនឹងបញ្ចប់ការដ្ឋាននៅដើមឆ្នាំក្រោយ។ បន្ទាប់មក គេត្រូវរង់ចាំពេលបំពាក់គ្រឿងចក្រកែច្នៃនិងបច្ចេកទេសផ្សេងទៀត ដែលអាចត្រូវស៊ីពេលរហូតដល់ពាក់កណ្តាល ឆ្នាំ២០១៦ ទើបអាចដំណើរការបាន។
តាមអ្នកបច្ចេកទេសដដែលនេះ ជំហានដំបូង គម្រោងរោងចក្រកែច្នៃសំណល់ប្លាស្ទីកភ្នំពេញ នឹងដាក់ឲ្យដំណើរម៉ាស៊ីនមួយសិន។ ម៉ាស៊ីនមួយនេះអាចមានសមត្ថភាពផលិត និងកម្ទេចថង់ប្លាស្ទីក បាន១០តោន ក្នុងរយៈពេល២៨ម៉ោង។
សូមបញ្ជាក់ថា កាកសំណល់ជាបញ្ហាចម្បងមួយរបស់អ្នករស់នៅក្រុងភ្នំពេញ ព្រោះសំរាមទាំងដុល ត្រូវប៉ាន់ប្រមាណ មានជាមធ្យមប្រហែល ១៥០០តោន ក្នុងមួយថ្ងៃៗ។ ចំណែក កាកសំណល់ប្លាស្ទីកនិងជ័រ មានប្រហែល១៥ភាគរយ ពោលគឺជាង២០០តោន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ