សមាជិកព្រឹទ្ធសភា២រូបជ្រើសតាំងដោយរដ្ឋសភា អាចចេញមកពីគណបក្សហ្វ៊ុនស៊ិនប៉ិច
គណៈកម្មាធិការអចិន្រ្តៃយ៍នៃរដ្ឋសភា នឹងបើកកិច្ចប្រជុំមួយ នៅថ្ងៃទី ៣ មេសា ដើម្បីជ្រើសរើសបេក្ខជនពីររូបក្នុងចំណោមបេក្ខជន១៣រូប ដែលបានដាក់ពាក្យសុំធ្វើជាសមាជិកព្រឹទ្ធសភានីតិកាលទី៤។ ក្នុងចំណោមបេក្ខជនទាំង១៣រូបនោះ គណបក្សហ្វ៊ុនស៊ិនប៉ិច បានចាត់តាំងសមាជិក២រូប ហើយដែលគេរំពឹងថា នឹងក្លាយជាសមាជិកព្រឹទ្ធសភាថ្មីនេះ។
ចុះផ្សាយនៅថ្ងៃ៖
ស្តាប់ - ០២:០៥
បើគ្មានការប្រែប្រួលទេ គណៈកម្មាធិការអចិន្រ្តៃយ៍នៃរដ្ឋសភា នឹងបើកកិច្ចប្រជុំ នៅថ្ងៃទី ៣ មេសា ដើម្បីជ្រើសរើសឥស្សរជនពីររូប ឲ្យធ្វើជាសមាជិកព្រឹទ្ធសភានីតិកាលទី៤ តាមរយៈការបោះឆ្នោតពីសមាជិករដ្ឋសភា។ នេះបើតាមការបញ្ជាក់ពីលោក ឡេង ប៉េងឡុង អគ្គលេខាធិការនិងជាអ្នកនាំពាក្យរដ្ឋសភាជាតិ។
គួរជំរាបជូនថា ចាប់ពីថ្ងៃទី ១៥ មីនាមក អគ្គលេខាធិការដ្ឋាននៃរដ្ឋសភា បានប្រកាសជ្រើសរើសឥស្សរជនពីររូប ដែលមានអាយុយ៉ាងតិច៤០ឆ្នាំ មានសញ្ជាតិខ្មែរតាំងពីកំណើត ឲ្យដាក់ពាក្យសុំធ្វើជាសមាជិកព្រឹទ្ធសភានីតិកាលទី៤។ ក្នុងនោះ មានបេក្ខជនតែ១៣រូបប៉ុណ្ណោះ ដែលបានដាក់ពាក្យមកកាន់អគ្គលេខាធិការដ្ឋាននៃរដ្ឋសភា។ ហើយក្នុងចំណោមបេក្ខជនទាំង១៣រូបនោះ មានបេក្ខជន២រូប ត្រូវបានចាត់តាំងដោយគណបក្សហ្វ៊ុនស៊ិនប៉ិច ហើយដែលគេរំពឹងខ្ពស់ថា នឹងក្លាយជាសមាជិកព្រឹទ្ធសភាថ្មីនេះ។ លោក ញ៉េប ប៊ុនជិន អ្នកនាំពាក្យគណបក្សហ្វ៊ុនស៊ិនប៉ិច បានថ្លែងថា បន្ទាប់ពីមានកិច្ចប្រជុំមួយកាលពីថ្ងៃទី ១ មេសា គណបក្សបានសម្រេចចាត់តាំងបេក្ខជន២រូបឲ្យឈរឈ្មោះជាសមាជិកព្រឹទ្ធសភា។ តែលោកមិនទាន់បញ្ជាក់ទេថា តើបេក្ខជនទាំងពីររូបនេះ ជានរណា។
សូមបញ្ជាក់ថា ព្រឹទ្ធសភានីតិកាលទី៤ មានសមាជិកសរុប៦២រូប ក្នុងនោះ៥៨រូប កើតចេញពីការបោះឆ្នោតជាអសកល ២រូបចាត់តាំងដោយព្រះមហាក្សត្រ និង២រូបទៀត ត្រូវជ្រើសតាំងដោយសមាជិករដ្ឋសភាក្នុងសំឡេងភាគច្រើនដាច់ខាត។ គិតមកទល់នឹងពេលនេះ គេបានដឹង ថា ព្រឹទ្ធសភានីតិកាលទី៤ ត្រូវបានគណបក្សប្រជាជនកម្ពុជាគ្រប់គ្រង៥៨អាសនៈ បន្ទាប់ពីការបោះឆ្នោតជ្រើសតាំងសមាជិកព្រឹទ្ធសភានីតិកាលទី៤ ដែលធ្វើឡើងក្រោមការរិះគន់ កាលពីថ្ងៃទី ២៥ កុម្ភៈ ដោយសារតែអវត្តមានគណបក្សប្រឆាំងធំជាងគេនៅកម្ពុជា។ ចំណែកឯសមាជិកព្រឹទ្ធសភា២រូបទៀតតែងតាំងដោយព្រះមហាក្សត្រ ត្រូវបានគេស្គាល់ថា គឺសម្តេចរាជបុត្រីព្រះអនុជ នរោត្តម អរណុរស្មី និងលោកស្រី អ៊ុំ សូម៉ានីន។
គួរជំរាបជូនដែរថា បើគ្មានការប្រែប្រួលទេ ព្រឹទ្ធសភានីតិកាលទី៤ នឹងបើកសម័យប្រជុំលើកដំបូងរបស់ខ្លួន នៅព្រឹកថ្ងៃទី ២៣ មេសា ក្រោមព្រះរាជាធិបតីភាពរបស់អង្គព្រះមហាក្សត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ