តំណាងរាស្ត្របក្សប្រឆាំងសួររដ្ឋាភិបាលអំពីការផ្តល់សិទ្ធិរុករកប្រេង
ក្រុមហ៊ុនបរទេសអ្នករុករករ៉ែប្រេងនិង ឧស្ម័ននៅបន្តមកជួបរដ្ឋាភិបាលកម្ពុជាដើម្បីស្វែងរកលទ្ធភាពសហ ប្រតិបត្តិការលើការរុករកប្រេងនិងឧស្ម័ននៅក្រោមដីកម្ពុជា។ព័ត៌មានទាក់ទងនឹងវិស័យរុករកប្រេងនិងឧស្ម័នមិនត្រូវបានផ្សព្វផ្សាយជាទូលំទូលាយទេ ជាហេតុធ្វើអោយលោកសុនឆ័យ តំណាងរាស្ត្រគណបក្សសម រង្ស៊ីសរសេរសំណួរជាច្រើនសួររដ្ឋាភិបាល។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច
សំណួររបស់លោក សុន ឆ័យមានទាំងអស់៧សំណួរ ដែលត្រូវបានរៀបចំផ្ញើទៅលោកសុខ អានរដ្ឋមន្ត្រីទីស្តីការគណៈរដ្ឋមន្ត្រីកាលពីថ្ងៃទី៥ឧសភា តាមរយៈប្រធានរដ្ឋសភាគឺលោក ហេង សំរិន។ សំណួរទាំងនោះរួមមាន៖ តើមកទល់ពេលនេះ មានក្រុមហ៊ុនចំនួនប៉ុន្មាន ហើយមានឈ្មោះអ្វីខ្លះដែលទទួលបានអាជ្ញាប័ណ្ណរុករករ៉ែប្រេងកាត និងឧស្ម័នពីរដ្ឋាភិបាល? ហើយនៅតំបន់ណាខ្លះ? តើក្រុមហ៊ុនដែលចង់សហប្រតិបត្តិការរុករករ៉ែក្រោមដីនោះត្រូវបង់កម្រៃអ្វីខ្លះមុនទទួលបានអាជ្ញាប័ណ្ណ? មានកម្រៃចូលក្នុងថវិការដ្ឋឬទេ?
បើតាមលោក សុន ឆ័យដោយសារតែប្រតិបត្តិការប្រេងកាត និងឧស្ម័នត្រូវស្ថិតនៅក្រោមច្បាប់មួយដោយឡែក ហើយមកដល់ពេលនេះ កម្ពុជាពុំទាន់មានច្បាប់ស្តីពីការគ្រប់គ្រង និងការធ្វើអាជីវកម្មប្រេងកាតនេះនៅឡើយនោះ លោក សុន ឆ័យក៏បានដាក់សំណួរមួយទៅលោក សុខ អានដែរ ថាតើពេលណាទើបរដ្ឋាភិបាលបញ្ជូនសេចក្តីព្រាងច្បាប់ស្តីពីការគ្រប់គ្រងការធ្វើអាជីវកម្មប្រេងកាតនិងឧស្ម័នព្រមទាំងសេចក្តីព្រាងច្បាប់ស្តីពីការគ្រប់គ្រងប្រាក់ចំណូលដែលបានពីប្រេងកាតមករដ្ឋសភា?
តំណាងរាស្ត្រគណបក្សសម រង្ស៊ីរូបនេះក៏បានស្នើអោយលោក សុខ អានពន្យល់អំពីការបង់ប្រាក់របស់ក្រុមហ៊ុនប្រេងតូតាល់ចំនួន២៨លានដុល្លារដែរ ថាតើប្រាក់ដែលក្រុមហ៊ុនតូតាល់បានបង់នេះ ត្រូវបែងចែកទៅខាងណាខ្លះ ហើយផ្អែកលើអ្វីដែលក្រុមហ៊ុនតូតាល់ត្រូវបង់២៨លានដុល្លារនោះ?
គឺស្ថិតនៅក្នុងវេទិកាក្រុមវិស័យឯកជននិងរដ្ឋាភិបាលកាលពីថ្ងៃទី២៧មេសាដែលលោកនាយករដ្ឋមន្ត្រីបានបំភ្លឺព័ត៌មានមួយទាក់ទងនឹងការបង់ថ្លៃរបស់ក្រុមហ៊ុនរុករករ៉ែ។ តាមពិតពេលនោះលោក ហ៊ុន សែននិយាយពីក្រុមហ៊ុនអូស្ត្រាលីរុករករ៉ែBHP Billitonនៅខេត្តមណ្ឌលគិរីដែលបានបង់ថវិការ២,៥លានដុល្លារអោយរដ្ឋាភិបាល។ លោកនាយករដ្ឋមន្ត្រីបានពន្យល់ជាសាធារណៈថា លុយនេះមិនមែនលុយពុករលួយទេ។ តែវាជាលុយដែលគេហៅថា ប្រាក់មូលនិធិសង្គម ដែលត្រូវបានកំណត់នៅក្នុងកិច្ចព្រមព្រៀង។ លោកនាយករដ្ឋមន្ត្រីបានបញ្ជាក់ថាក្រុមហ៊ុនណាក៏ត្រូវមានបង់ប្រាក់មូលនិធិសង្គមនេះដែរ។ លោកនាយករដ្ឋមន្ត្រីក៏បាននិយាយពីក្រុមហ៊ុនតូតាល់ដែរពេលនោះ។
ហើយបើនិយាយពីប្រាក់មូលនិធិសង្គមនេះ លោក សុន ឆ័យក៏មានសំណួរមួយពាក់ព័ន្ធដែរ។ គឺថា តើមូលនិធិសង្គមដែលបង្កើតតាំងពីឆ្នាំ១៩៩៥មកនោះ ត្រូវបានប្រើប្រាស់ដើម្បីអ្វី? តើជារបស់រដ្ឋ ឬជារបស់ឯកជន? បើជារបស់រដ្ឋ តើអាចផ្ញើរបាយការណ៍ពីចំណូល និងចំណាយកន្លងទៅ មករដ្ឋសភាបានដែរឬទេ?
នៅមិនទាន់មានការឆ្លើយតបពីរដ្ឋាភិបាលនៅឡើយទេ ទាក់ទងនឹងសំណួរទាំងអម្បាលម៉ានរបស់លោក សុន ឆ័យតំណាងរាស្ត្ររបស់គណបក្សសម រង្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ