រដ្ឋាភិបាលបើកយុទ្ធនាការកម្ទេចអាងស្តុកទឹកនៅជុំវិញបឹងទន្លេសាប
រហូតមកទល់នឹងថ្ងៃអង្គារនេះ ក្រុមមន្ត្រីបានអះអាងថា យ៉ាងហោចណាស់អាងស្តុកទឹកធំៗចំនួន ៦ ក្នុងចំណោម អាងស្តុកទឹក ២៤០នៅជុំវិញបឹងទន្លេសាបត្រូវបានបំផ្លាញ។ នេះគឺជាយុទ្ធនាការរបស់រដ្ឋាភិបាល កម្ពុជាក្នុងការកម្ទេចអាងស្តុកទឹកដែលធ្វើឲ្យប៉ះពាល់ដល់ជីវិត ប្រជាកសិករ និងជួយសង្គ្រោះជីវចម្រុះនៅជុំវិញបឹងទន្លេសាប ដែលកំពុងតែទទួលរងនូវការគំរាមកំហែង។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់នេត្រ ភក្រ្តា
លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានឲ្យដឹងថា យុទ្ធនាការកម្ទេច អាងស្តុកទឹកខុសច្បាប់នៅជុំវិញបឹងទន្លេសាប បានចាប់ផ្តើមឡើងតាំងពីថ្ងៃសុក្រសបា្តហ៍មុនហើយបានបន្តរហូតមកទល់នឹងថ្ងៃនេះ។
នៅក្នុងសន្និសីទកាសែតកាលពីថ្ងៃម្សិលមិញ លោករដ្ឋមន្ត្រី លឹម គានហោ បានថ្លែងថា អាងស្តុកទឹក ចំនួន ៦ក្នុងខេត្តកំពង់ធំត្រូវបានទម្លាយក្រោយពីម្ចាស់អាងទាំងនោះបានធ្វើព្រងើយកន្តើយ មិនធ្វើតាមបញ្ជាដែលតម្រូវឲ្យកម្ទេចអាង។ យុទ្ធនាការនេះបាននឹងកំពុងធ្វើឡើងនៅក្នុងខេត្តកំពង់ធំ ហើយបន្តទៅខេត្ត ៥ ផ្សេងទៀតដែលជាប់នឹងបឹងទន្លេសាបមានខេត្តសៀមរាប ពោធិសាត់ បាត់ដំបង កំពង់ឆ្នាំង និងបន្ទាយមានជ័យ។ លោក លឹម គានហោ បានថ្លែងថា អាជ្ញាធរអាងទន្លេសាប បានស្រាវជ្រាវ និង រកឃើញអាងស្តុកទឹកសរុបចំនួន ២៤០អាងក្នុងខេត្ត ៤ នៃខេត្ត ៦ ជុំវិញបឹងទន្លេសាប។
លោករដ្ឋមន្ត្រីក្រសួងធនធានទឹក លឹម គានហោ បានថ្លែងឲ្យដឹងថា រដ្ឋាភិបាលនឹងពិចារណាការធ្វើកំណែទម្រង់អាងមួយចំនួន ក្នុងតំបន់ ២ ដែលភ្ជាប់ពីតំបន់លិចទឹកនៃបឹងទន្លេសាបមកតំបន់ទី ១។ តំបន់ទី ១ ដែលភ្ជាប់នឹងតំបន់វាលស្រែ។ ប្រសិនបើអាងទាំងនោះមិនប៉ះពាល់ធ្ងន់ធ្ងរដល់ជីវចម្រុះ។ ប៉ុន្តែអាងទាំងឡាយនៅក្នុងតំបន់ ៣ ជាតំបន់ព្រៃលិចទឹកនឹងត្រូវកម្ទេចចោលដោយមិនមានការលើកលែងឡើយ។ លោកបានលើកឡើងថា ការធ្វើអាងទឹក គឺធ្វើឲ្យទឹកភ្លៀងឡើងខ្លាំងពេលរដូវវស្សា និងហូរហៀរដល់ផ្លូវជាតិ។ លោកបន្ថែមថា អាងមួយចំនួនធ្វើជាប់ៗគ្នាដែលធ្វើឲ្យទឹកហូរមិនល្អ ពិបាកក្នុងការរាយសាយដីល្បាប់ ព្រមទាំងធ្វើឲ្យដីហឹរ មិនអាចដាំដុះ អ្វីបានផលល្អ។ លោក លឹម គានហោ ក៏បានបញ្ជាក់ថា ភាគច្រើននៃអាងស្តុកទឹកខុសច្បាប់ស្ថិតក្នុងខេត្តកំពង់ធំ ខេត្តសៀមរាប និងខេត្តបាត់ដំបង ហើយមានទំហំយ៉ាងហោចណាស់ ១,៥ គីឡូម៉ែត្រការេដែរ ក្នុងអាងនីមួយ។ លោកបានពន្យល់ថា ម្ចាស់អាងទាំងនោះបានចំណាយប្រាក់ពី ៨ ម៉ឺន ដុល្លារទៅ ១ សែនដុល្លារ ក្នុងការសាងសង់អាងស្តុកទឹកមួយ ហើយជាធម្មតា កសិករធម្មតា មិនអាចមានលទ្ធភាពសាងសង់អាងទាំងនោះបានទេ គឺមានតែឈ្មួញមានប្រាក់កាសប៉ុណ្ណោះ។
ប្រជាកសិករ បានទទួលស្វាគមន៍ចំពោះចំណាត់ការរបស់រដ្ឋាភិបាលកម្ពុជា ក្នុងការកម្ទេចអាងស្តុកទឹកទាំងនេះ។ តំណាងសហគមន៍នេសាទត្រីនៅក្នុងខេត្តកំពង់ធំបានថ្លែងថា ពលរដ្ឋមានការសប្បាយរីករាយ និងគាំទ្ររដ្ឋាភិបាលក្នុងការកម្ទេចអាងនៅជុំវិញបឹងទន្លេសាបទាំងនោះ។ ប៉ុន្តែក៏មានការព្រួយបារម្ភដែរថា អាងស្តុកទឹកទាំងនោះអាចនឹងត្រូវបានបង្កើតឡើងវិញ ក្រោយពីប្រតិបត្តិការនេះត្រូវបានបញ្ចប់ ហើយផលត្រីក៏អាចនឹងមានការធ្លាក់ចុះជាងមុនដែរ។ ប្រជាកសិករបានលើកឡើងថា ឈ្មួញមួយចំនួន បានបង្កើតអាងស្តុកទឹកទាំងនេះឡើង ដោយយកលេសថា ជួយកសិករក្នុងការធ្វើស្រែចំការនៅក្នុងរដូវប្រាំង ប៉ុន្តែតាមពិតពួកគេបានបំផ្លាញព្រៃលិចទឹកដែលជាជម្រកត្រីពងកូន និងយកដីរដ្ឋធ្វើកម្មសិទ្ធិដោយគ្មានការអនុញ្ញាត។ កសិករថាខ្លួនស្វាគមន៍ និងលើកទឹកចិត្តរដ្ឋាភិបាលក្នុងការកម្ទេចអាងទាំងអស់នោះឲ្យស្មើភាព និងបន្តបង្ក្រាបអាងទាំងនោះជារៀងរហូត និងបានលើកឡើងថា អាជ្ញាធរជលផល និងអាជ្ញាខេត្ត បានចុះបង្រ្កាប និងចាប់ខ្លួនប្រជាជនក្រីក្រ ដែលកាប់ព្រៃលិចទឹកដើម្បីពង្រីកដីកសិកម្មដាក់ពន្ធនាគារ ប៉ុន្តែពួកគេមិនដែលចាប់ខ្លួនម្ចាស់អាងទាំងនោះដាក់ពន្ធនាគារនោះឡើយ។
ទាក់ទងនឹងបញ្ហានេះ លោក លឹម គានហោ រដ្ឋមន្រ្តីក្រសួងធនធានទឹក និងឧតុនិយមបានថ្លែងថា អាជ្ញាធរកំពុងរៀបចំឯកសារដើម្បីរាយការណ៍ទៅជូនលោកនាយករដ្ឋមន្រ្តី ហ៊ុន សែន ដើម្បីពិចារណា និងចាត់វិធានការលើបញ្ហាទាំងនោះ។ លោកបានលើកឡើងថា បើយោងតាមច្បាប់ភូមិបាល និងច្បាប់ជលផល មាត្រាទី ៩៨ អ្នកដែលប្រព្រឹត្តបទល្មើសនឹងត្រូវផ្តន្ទាទោសដាក់ពន្ធនាគារចំនួនពី ៣ឆ្នាំទៅ ៥ ឆ្នាំ ព្រមទាំងរឹបអូសយកសម្ភារៈចំពោះបុគ្គលណាបំផ្លាញព្រៃលិចទឹក។ ប៉ុន្តែរហូតមកទល់ពេលនេះមិនទាន់មានជនល្មើសណាម្នាក់ត្រូវបានចាប់ខ្លួនពាក់ព័ន្ធនឹងការបង្កើតអាងស្តុងទឹកនៅឡើយទេ។
ជាមួយគ្នានេះលោករដ្ឋមន្ត្រីក្រសួងធនធានទឹក លឹម គានហោ បានថ្លែងថា លោកនឹងទទួលខុស ត្រូវ ប្រសិនបើរួបលោក ឬមន្ត្រីថ្នាក់ក្រោមណាម្នាក់ ជាប់ពាក់ព័ន្ធនឹងការទទួលសំណូកក្នុងការអនុវត្តការងារ កម្ទេចអាងស្តុកទឹកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ