អង្គការ Global Witness ស្វាគមន៍រដ្ឋាភិបាលបង្ហាញរបាយការណ៍រ៉ែប្រេង
អង្គការឃ្លាំមើលបរិស្ថានអន្តរជាតិ Global Witness បានថ្លែងស្វាគមន៍នៅថ្ងៃនេះចំពោះការបង្ហាញរបស់ រដ្ឋាភិបាលកម្ពុជាកាលពីពេលថ្មីៗនេះអំពីកិច្ចព្រមព្រៀងរុករករ៉ែ ប្រេងកាត ដែលចុះហត្ថលេខាដោយក្រុមហ៊ុនប្រេងបរទេសមួយចំនួន។ ប៉ុន្តែនៅតែចង់ដឹងពីវិធីសាស្ត្រនៃការទូទាត់ប្រាក់ និងអំពាវនាវដល់រដ្ឋាភិបាលកម្ពុជាបង្ហាញព័ត៌មានបន្ថែមទៀត។ ក្រុមមន្ត្រីបានច្រានចោលចំពោះការអំពាវនាវនេះដោយថ្លែងថាGlobal Witness តែងតែតាមបំផ្លាញកិត្តិយសកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នេត្រ ភក្រ្តា
នៅក្នុងរបាយការណ៍របស់អង្គការ Global Witness ដែលបានទទួលនៅថ្ងៃព្រហស្បតិ៍នេះ អង្គការឃ្លាំមើលបរិស្ថានអន្តរជាតិ ដែលមានស្នាក់ការនៅទីក្រុងឡុងដ៍ ប្រទេសអង់គ្លេសបានស្វាគមន៍រដ្ឋាភិបាលកម្ពុជាចំពោះការបង្ហាញអំពីកិច្ចព្រមព្រៀងស្តីពីការរុករករ៉ែប្រេងកាតរវាងរដ្ឋាភិបាលកម្ពុជា ជាមួយនឹងក្រុមហ៊ុនប្រេងបរទេសនានា។ កិច្ចព្រមព្រៀង រុករកប្រេងដែលលោកឧបនាយករដ្ឋមន្ត្រីសុខ អាន បានបង្ហាញបញ្ជីឈ្មោះក្រុមហ៊ុនទាំងជាង ២០ ដែលបានចុះកិច្ចព្រមព្រៀងរុករករ៉ែប្រេងកាត នៅក្នុងសមុទ្រកម្ពុជា ជាសាធារណៈ រួមទាំងព័ត៌មានអំពីការគ្រប់គ្រង ប្រាក់រង្វាន់ចុះហត្ថលេខា និងការទូទាត់ប្រាក់ដទៃទៀតរបស់រដ្ឋាភិបាលកម្ពុជា។ លោកសុខ អាន បានថ្លែងថា ក្រុមហ៊ុនខ្លះបានចាកចេញពីកម្ពុជាទៅហើយ ដោយសារធនធានប្រេងកាតនិងឧស្ម័នកម្ពុជាមិនអាចអភិវឌ្ឍបានក្នុងលក្ខណៈពាណិជ្ជកម្ម រួមនឹងការបង្ហាញពីគ្រប់គ្រងថវិកាដែលបានទទួលពីក្រុមហ៊ុនប្រេងផងដែរ។
លោក Goerge Boden អ្នកដឹកនាំយុទ្ធនាការរបស់អង្គការ Global Witness បានថ្លែងនៅក្នុងរបាយការណ៍ថា Global Winess សូមស្វាគមន៍ការឆ្លើយបំភ្លឺរបស់លោក សុខ អាន ចំពោះសំណួររបស់តំណាងរាស្រ្តគណបក្ស សម រង្ស៊ី និងការបង្ហាញព័ត៌មានថ្មីៗពាក់ព័ន្ធនឹងការគ្រប់គ្រងថវិកាចូលរដ្ឋដែលបានមកពីធនធានរ៉ែប្រេងកាត។ Gobal Witness បានហៅការបង្ហាញព័ត៌មាននេះថា គឺជាជំហានមួយឆ្ពោះទៅកាន់តម្លាភាពនៅកម្ពុជា និងអាចរួមចំណែកធ្វើឲ្យដំណើរការអនុវត្តលទ្ធិប្រជាធិបតេយ្យនៅកម្ពុជាកាន់តែប្រសើរឡើង។
ទន្ទឹមនឹងការស្វាគមន៍ចំពោះការបង្ហាញពីព័ត៌មានកម្រទាក់ទងនឹងប្រេងនេះ អង្គការ Global Witness បានបន្តចង់ដឹងពីវិធីសាស្ត្រនៃការទូទាត់ ឬការផ្តល់ប្រាក់ដល់រដ្ឋាភិបាលកម្ពុជាពីសំណាក់ក្រុមហ៊ុនប្រេងនានា ដូចជាករណីក្រុមហ៊ុនប្រេងតូតាល់ជាដើមដែលកន្លងមកបានផ្តល់ប្រាក់ចំនួន២៨ លានដុល្លារដល់រដ្ឋាភិបាលកម្ពុជា។ អង្គការ Global Witness បានថ្លែងថា រដ្ឋាភិបាលមិនបានបង្ហាញពីកិច្ចព្រមព្រៀងលម្អិត និងការទូទាត់ប្រាក់លម្អិតដែលទទួលបានពីក្រុមហ៊ុន ហើយថា តើការទូទាត់ប្រាក់ត្រូវធ្វើនៅស្ថាប័នណា។ មន្ត្រីអង្គការនេះបាថ្លែងថា រដ្ឋាភិបាល គួរតែចេញផ្សាយកិច្ចព្រមព្រៀងលម្អិតជាសាធារណៈ និងមានតម្លាភាព ដើម្បីឲ្យប្រជាជនកម្ពុជាមានជំនឿចិត្តថា ជាការចរចាដ៏ត្រឹមត្រូវរវាងរដ្ឋាភិបាល និងក្រុមហ៊ុនឯកជនរុករកប្រេង គឺពិតជាមានពិតប្រាកដមែន។
ក្រុមមន្ត្រីគណបក្សប្រឆាំងបានថ្លែងថា ខ្លួនក៏នឹងបន្តធ្វើការសិក្សាស្រាវជ្រាវ និងស្វែងរកឲ្យមានតម្លាភាពកាន់តែច្រើនឡើងថែមទៀត ចំពោះការចំណាយដែលនឹងបានមកពីធនធានរ៉ែប្រេងកាត ព្រមទាំងការប្រើប្រាស់មូលនិធិអភិវឌ្ឍន៍សង្គមបានមកពីក្រុមហ៊ុនប្រេង។ លោកសុន ឆ័យ ដែលជាអ្នកសួរសំណួរទៅលោកឧបនាយក រដ្ឋមន្ត្រីសុខ អាន បានថ្លែងប្រាប់ថា រដ្ឋាភិបាលមិនទាន់បានបកស្រាយសំណួរសំខាន់ៗរបស់លោកនៅឡើយទេ ជាពិសេសទាក់ទងទៅនឹងមូលនិធិអភិវឌ្ឍន៍សង្គម។ លោកបានថ្លែងថា លោកសុខ អាន មិនបានផ្តល់ព័ត៌មានអំពីការបង្កើតមូលនិធិនេះ និងបទប្បញ្ញត្តិដែលកំណត់ថា មូលនិធិនេះត្រូវបានចំណាយបែបណានោះទេ «តើលុយនេះត្រូវបានត្រួតពិនិត្យ និងគ្រប់គ្រងដោយរបៀបណា? តើលុយប៉ុន្មានត្រូវបង់ចូលមូលនិធិ?ជាដើម។
លោកផៃ ស៊ីផាន រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្ត្រី បានច្រានចោលការទាមទាររបស់អង្គការ Global Witness ឲ្យរដ្ឋាភិបាលចេញផ្សាយព័ត៌មានបន្ថែមទៀត ដោយថ្លែងថា ពួកគេបានប្រើប្រាស់បញ្ហាផ្ទាល់ខ្លួនដើម្បីប្រឆាំងនឹងលោកឧបនាយករដ្ឋមន្ត្រី សុខ អាន និងថា ប្រាក់ចំណូលទាំងអស់ត្រូវចូលទៅក្នុងថវិកាជាតិ។ លោកផៃ ស៊ីផានបានថ្លែងថា រដ្ឋាភិបាលកម្ពុជាមិនធ្វើការតម្រូវចិត្តគណបក្សប្រឆាំង ឬអង្គការ Global Witness នោះទេ គឺធ្វើការបម្រើប្រជាពលរដ្ឋខ្មែរ ទទួលខុសត្រូវចំពោះមុខរដ្ឋសភាដែលជាតំណាង ប្រជាជនកម្ពុជាទាំងមូល។ លោកផៃ ស៊ីផាន ថ្លែងថា អង្គការ Global Witness តែងតែតាមបំផ្លាញកិត្តិយសប្រទេស របស់ប្រទេសកម្ពុជា។ ទោះបីជាមានសម្ពាធពីអង្គការ Global Witnessក្តី លោកផៃ ស៊ីផាន បានថ្លែងថា រដ្ឋាភិបាលនៅតែទទួលបានការគាំទ្រខ្លាំងពីដៃគូអភិវឌ្ឍន៍អន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ