លំហាត់ហ្វឹកហ្វឺន កងកម្លាំងពហុសាសន៍ « ឆ្មាំអង្គរ ឆ្នាំ២០១០ » ចាប់ផ្តើមហើយ
លំហាត់ហ្វឹកហ្វឺន កងកម្លាំងពហុសាសន៍ ដែលមានឈ្មោះថា «ឆ្មាំអង្គរ ឆ្នាំ២០១០» បានចាប់ផ្តើមហើយ នៅព្រឹកថ្ងៃច័ន្ទ ទី១២ ខែកក្កដា។ នេះជាដំណាក់កាលដំបូង នៅក្នុងលំហាត់ហ្វឹកហ្វឺន ដែលប្រទេសកម្ពុជា ជាម្ចាស់ផ្ទះ ក្រោមកិច្ចសហការ និងឧបត្ថម្ភគាំទ្រពីកងទ័ពសហរដ្ឋអាមេរិក។ លំហាត់ហ្វឹកហ្វឺន ឆ្មាំអង្គរ ឆ្នាំ២០១០ នៅកម្ពុជាពេលនេះ មានការចូលរួមពីកងទ័ពមកពី ២៦ ប្រទេស ដែលមានកងកម្លាំងសរុបជិត ១០០០ នាក់។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ លី ម៉េងហួរ
លំហាត់ហ្វឹកហ្វឺន ពហុសាសន៍ ដែលមានឈ្មោះថា “ឆ្មាំអង្គរ ឆ្នាំ២០១០” ត្រូវចាប់ផ្តើមពីថ្ងៃទី១២ ដល់ថ្ងៃទី៣០ ខែកក្កដា ឆ្នាំ២០១០។ លំហាត់ហ្វឹកហ្វឺននេះ ចែកចេញជាពីរផ្នែក គឺ លំហាត់នៅទីបញ្ជាការ (CPX) ដែលបានចាប់ផ្តើម នៅព្រឹកមិញ នៅសណ្ឋាគារ ភ្នំពេញ និងលំហាត់ហ្វឹកហ្វឺន នៅលើទីលាន (FTX) ដែលត្រូវធ្វើនៅ មូលដ្ឋានហ្វឹកហាត់កងកាំភ្លើងធំ ACO ក្នុងខេត្តកំពង់ស្ពឺ។
លំហាត់ហ្វឹកហ្វឺន នៅលើទីលាន នៅ ACO ក្នុងខេត្តកំពង់ស្ពឺ នឹងចាប់ផ្តើមនៅព្រឹកថ្ងៃសៅរ៍ ទី១៧ ខែកក្កដា ឆ្នាំ២០១០ ក្រោមអធិបតីភាពដ៏ខ្ពង់ខ្ពស់ របស់លោកនាយករដ្ឋមន្ត្រី ហ៊ុន សែន និងតំណាងអង្គការសហប្រជាជាតិ។ ប៉ុន្តែលំហាត់ហ្វឹកហ្វឺន នៅទីលាននោះ មិនមានការបាញ់គ្រាប់កាំភ្លើង ជាលក្ខណៈសមយុទ្ធ ធ្វើសឹកសង្គ្រាមនោះទេ គឺគេគ្រាន់តែរៀបចំកម្លាំងសង្គ្រោះ ជាលក្ខណៈមនុស្សធម៌ ក្នុងនាមកងកម្លាំងថែរក្សាសន្តិភាព របស់អង្គការសហប្រជាជាតិប៉ុណ្ណោះ។
ចំណែកលំហាត់ហ្វឹកហ្វឺន នៅទីបញ្ជាការ ដែលបានផ្តើម នៅព្រឹកថ្ងៃច័ន្ទនេះ បានធ្វើឡើងក្រោមវត្តមានរបស់លោកនាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ និងលោកស្រី ខារ៉ូល រ៉ូដលី ឯកអគ្គរដ្ឋទូតសហរដ្ឋអាមេរិក ប្រចាំកម្ពុជា រួមទាំងថ្នាក់ដឹកនាំកងទ័ពមកពីបណ្តាប្រទេសប្រមាណ ២៦ ដែលចូលរួមក្នុងលំហាត់ហ្វឹកហ្វឺនលំដាប់អន្តរជាតិ នៅកម្ពុជា នាពេលនេះ។
លោកឧត្តមសេនីយ៍ឯក ណឹម សុវត្ថិ អគ្គនាយក នៃអគ្គនាយកដ្ឋាននយោបាយ និងកិច្ចការបរទេស របស់ក្រសួងការពារជាតិកម្ពុជា បានប្រាប់ក្រុមអ្នកកាសែតថា លំហាត់ហ្វឹកហ្វឺន នៅទីបញ្ជាការ ដែលបានចាប់ផ្តើមនៅថ្ងៃនេះ មានរយៈពេល ១២ថ្ងៃ ដោយចែកចេញជា ៣ រូបភាព។ ទី១-ការសិក្សារួមអំពីទ្រឹស្តី។ ទី២-ការធ្វើលំហាត់ហ្វឹកហ្វឺនរយៈពេលខ្លី និងទី៣-និយាយពីកម្រិតប្រតិបត្តិការជាក់ស្តែង ដែលមានសមាសភាពកងទ័ពចម្រុះចូលរួមចំនួន ១៣៧ នាក់។
ក្រុមកងកម្លាំងយោធាទាំង ២៦ ប្រទេស មកពីគ្រប់ទ្វីបនៅលើពិភពលោក ដែលសុទ្ធសឹងជាប្រទេសសមាជិកអង្គការសហប្រជាជាតិ រួមមាន អាមេរិក បារាំង អង់គ្លេស និងយោធា មកពីឥណ្ឌា ថៃ ជាដើម ក៏បានចែកជាក្រុមៗ ដើម្បីសហការ និងទំនាក់ទំនង ក្នុងស្មារតីសាមគ្គី និងធ្វើឲ្យប្រសើរឡើងនូវវិជ្ជាជីវៈ ព្រមទាំងបង្កើននូវសមត្ថភាពបន្ថែមទៀត សម្រាប់កងរក្សាសន្តិភាព និងបង្កើនទំនាក់ទំនងរវាងយោធា និងស៊ីវិល ផងដែរ។
លំហាត់យោធាពហុសាសន៍ ទ្រង់ទ្រាយធំ លើកដំបូង នៅកម្ពុជា ពេលនេះ ធ្វើឡើងដើម្បីលើកស្ទួយសមត្ថភាពកងកម្លាំងពហុសាសន៍ ដែលអាចឆ្លើយតបនឹងកិច្ចការថែរក្សាសន្តិភាព របស់អង្គការសហប្រជាជាតិ។
លោកនាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ កម្ពុជា បានលើកឡើង ក្នុងពិធីបើកលំហាត់ហ្វឹកហ្វឺន នៅទីបញ្ជាការ នៅព្រឹកមិញថា ពុំមានប្រទេសណាមួយ តែឯកឯងលើពិភពលោក អាចមានសមត្ថភាពឆ្លើយតប ឬអាចដោះស្រាយរាល់វិបត្តិ ដែលកើតមានជាយថាហេតុ បានឡើយ។ វិបត្តិនោះ ដូចជា ជម្លោះប្រដាប់អាវុធ ការជួញដូរអាវុធ គ្រឿងញៀន ព្រមទាំងគ្រោះមហន្តរាយពីធម្មជាតិ ។ល។ និង ។ល។ ហេតុនេះហើយ បានជារដ្ឋាភិបាលកម្ពុជា ឯកភាពទទួលសំណូមពររបស់អាមេរិក ដើម្បីរៀបចំធ្វើលំហាត់ហ្វឹកហ្វឺន ឆ្មាំអង្គរ ឆ្នាំ២០១០ ក្នុងគោលបំណង ធ្វើឲ្យនាយទាហាននៃកងយោធពលខេមរភូមិន្ទ កម្ពុជា និងទាហានមកពីបណ្តាប្រទេសជាច្រើនទៀត មានសមត្ថភាពប្រសើរឡើងថែមទៀត ដើម្បីធ្វើកិច្ចសហប្រតិបត្តិការសន្តិភាពពហុសាសន៍ ទៅតាមសេចក្តីត្រូវការនៃបេសកកម្មអង្គការសហប្រជាជាតិ។
ជាមួយគ្នានោះ លោកស្រី ខារ៉ូ រ៉ូដលី ឯកអគ្គរដ្ឋទូតអាមេរិក ប្រចាំកម្ពុជា បានលើកឡើងថា លំហាត់ហ្វឹកហ្វឺន រក្សាសន្តិភាពនេះ ក៏ជាការបង្កើនសមត្ថភាពកងទ័ពកម្ពុជា។ ម្យ៉ាងទៀត លំហាត់ហ្វឹកហ្វឺន នាពេលនេះ ជាទិដ្ឋភាពមួយ ដែលបង្ហាញនូវចំណងមិត្តភាពរវាងកម្ពុជា និងអាមេរិក។ សហរដ្ឋអាមេរិក ក៏នៅតែជាដៃគូ ក្នុងការជំរុញដល់កំណែទម្រង់វិស័យយោធាកម្ពុជាផងដែរ។
ក្នុងពេលកន្លងមក កម្ពុជាបានបញ្ជូនកំលាំងយោធារបស់ខ្លួន ទៅចូលរួមក្នុងលំហាត់ហ្វឹកហ្វឺន ទ្រង់ទ្រាយធំ ដែលរៀបចំ ក្នុងក្របខណ្ឌអង្គការសហប្រជាជាតិ ជាច្រើនលើក ចាប់តាំងពីឆ្នាំ២០០៧។ កងកម្លាំងកម្ពុជា ៥៦៨ នាក់ បានបំពេញភារកិច្ចជោគជ័យ ជាកងកម្លាំងថែរក្សាសន្តិភាពរបស់អង្គការសហប្រជាជាតិ ផ្នែកមនុស្សធម៌ នៅប្រទេសស៊ូដង់ ប្រទេសឆាត និងនៅអាហ្វ្រិកកណ្តាល។ នៅខែកក្កដានេះ កងកម្លាំងជាង ២០០ នាក់ ក៏គ្រោងនឹងចេញទៅបំពេញបេសកកម្មមនុស្សធម៌កម្ពុជា ក្នុងនាមជាទាហានមួកខៀវរបស់អង្គការសហប្រជាជាតិ នៅប្រទេសលីបង់ ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ