កម្មកររោងចក្រកាត់ដេរជំរុញអោយថៅកែនិងក្រសួងពាក់ព័ន្ធចរចាស្ដីពីប្រាក់ខែគោលឡើងវិញ
កម្មកររោងចក្រកាត់ដេរនឹងដាក់ លិខិតជូនថៅកែរោងចក្រកាត់ដេរនិងក្រសួងពាក់ព័ន្ធនៅថ្ងៃចន្ទស្អែក នេះដើម្បីសុំដំឡើងប្រាក់ខែគោលនិងប្រាក់គោលការណ៍មួយចំនួនផ្សេង ទៀត។ សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាដែលដឹកនាំដោយលោក អាត់ ធន់ ព្រមានថា ប្រសិនបើគ្មានចម្លើយក្នុងរយៈពេល១៥ថ្ងៃទេនោះ សហជីពរបស់លោកនឹងប្រកាសធ្វើកូដកម្ម។
ចុះផ្សាយនៅថ្ងៃ៖
សេចក្តីរាយការណ៍របស់ គី សុខលីម
កម្មកររោងចក្រកាត់ដេរមួយចំនួននៅតែព្រមានធ្វើកូដកម្មដដែលប្រសិនបើប្រាក់ខែអប្បបរមាមិនត្រូវបានគេដំឡើងអោយដល់ចន្លោះពី៧៥ទៅ៩៣ដុល្លារនោះទេ។ លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បានបញ្ជាក់ប្រាប់នៅថ្ងៃអាទិត្យនេះថា ក្រុមសហជីពរបស់លោកនឹងដាក់លិខិតជាផ្លូវការជូនសមាគមថៅកែរោងចក្រកាត់ដេរកម្ពុជានិងក្រសួងពាក់ព័ន្ធនៅថ្ងៃចន្ទស្អែកនេះដើម្បីសុំធ្វើការចរចាឡើងវិញស្តីពីប្រាក់ឈ្នួលអប្បបរមា អតីតភាពការងារ ប្រាក់រង្វាន់និងពេលវេលានៃការចរចាដំឡើងប្រាក់ខែរបស់កម្មករ។
កម្មករកម្មការិនីដែលដឹកនាំដោយលោក អាត់ ធន់ ទាមទារប្រាក់ខែគោលក្នុងចន្លោះពី៧៥ទៅ៩៣ដុល្លារអាមេរិក ប្រាក់អតីតភាព២ដុល្លារជារៀងរាល់ឆ្នាំដោយមិនកំណត់ពេលវេលា ប្រាក់រង្វាន់លើកទឹកចិត្ត១០ដុល្លារក្នុងមួយខែ និងពេលវេលានៃការចរចាដំឡើងប្រាក់ខែត្រូវធ្វើឡើងក្នុងមួយឆ្នាំម្តងពោលគឺមិនមែន៤ឆ្នាំម្តងដូចកាលពីពេលកន្លងមកនោះទេ។
ការទាមទាររបស់សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាបានធ្វើឡើងបន្ទាប់ពីគណៈកម្មាធិការក្រុមប្រឹក្សាការងារដែលមានតំណាងបីភាគី៖រដ្ឋាភិបាល សហជីព និងថៅកែរោងចក្រកាត់ដេរបានសម្រេចដំឡើងប្រាក់ខែអប្បបរមាជូនកម្មករដល់៦១ដុល្លារអាមេរិកប៉ុន្តែសហជីពរបស់លោក អាត់ ធន់ មិនបានបោះឆ្នោតគាំទ្រសេចក្តីសម្រេចនេះទេដោយលោកយល់ឃើញថា ប្រាក់ឈ្នួលនេះមិនអនុញ្ញាតអោយកម្មករអាចរស់បាន។
អ្នកសេដ្ឋកិច្ចមួយចំនួនធ្លាប់បានបញ្ជាក់នៅក្នុងការសិក្សារបស់ខ្លួនថា កម្មករកាត់ដេរអាចរស់បានលុះត្រាតែប្រាក់ខែអប្បបរមាមានចំនួនចាប់ពីជាង៧០ដុល្លារឡើងទៅ។ ប៉ុន្តែអត្រាប្រាក់ខែនេះត្រូវបានតំណាងរាជរដ្ឋាភិបាលនិងតំណាងថៅកែរោងចក្រកាត់ដេរបដិសេធដោយពួកគេលើកហេតុផលមកសំអាងថា ការដំឡើងប្រាក់ខែហួសហេតុអាចធ្វើអោយរោងចក្រដួលរលំ។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាបានព្រមានថា ប្រសិនបើថៅកែរោងចក្រមិនព្រមទទួលយកការចរចាក្នុងរយៈពេលពីរសប្ដាហ៍ចាប់ពីថ្ងៃទី២ខែសីហាដល់ថ្ងៃទី១៥ខែសីហាទេនោះ សហជីពរបស់លោកនឹងរៀបចំកូដកម្មនៅតាមបណ្ដារោងចក្រនានា។
ឆ្លើយតបទៅនឹងសំណើរបស់សហជីព លោក ជាតិ ខេមរា មន្ត្រីជាន់ខ្ពស់នៃសមាគមថៅកែរោងចក្រកាត់ដេរកម្ពុជាបានបញ្ជាក់នៅថ្ងៃអាទិត្យនេះថា លោកពិបាកនឹងជឿថា សមាគមរបស់លោកនឹងពិចារណាលើរឿងនេះណាស់ពីព្រោះសមាគមត្រូវតែគោរពសេចក្តីសម្រេចរបស់ក្រុមប្រឹក្សាការងារដែលទើបបានអនុម័តដំឡើងប្រាក់ខែអប្បបរមាជូនកម្មករកាត់ដេរដល់៦១ដុល្លារអាមេរិកកាលពីខែកក្កដាកន្លងមកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ