អ្នកភូមិបឹងកក់បន្តតវ៉ាឲ្យបញ្ឈប់ការបូមខ្សាច់ដែលធ្វើឱ្យលិចផ្ទះ
នៅថ្ងៃព្រហស្បតិ៍ ទី៣០ កញ្ញានេះ អ្នកភូមិបឹងកក់រាប់សិបនាក់បានបន្តធ្វើការតវ៉ាប្រឆាំងការបូមខ្សាច់ ដោយមានទាំងការដុតកង់ឡាន នៅកន្លែងបូមខ្សាច់លុបបំពេញបឹងកក់ថែមទៀតផង។ ការបូមខ្សាច់ចាក់លុបបំពេញបឹងកក់ដើម្បីអភិវឌ្ឍន៍ជាមជ្ឈមណ្ឌលពាណិជ្ជកម្មបានធ្វើឲ្យទឹកជន់លិចផ្ទះអ្នកភូមិ ដែលមិនទាន់មានការដោះស្រាយសំណងសមរម្យនៅឡើយមុនការរុះរើចេញ។
ចុះផ្សាយនៅថ្ងៃ៖
សេចក្តីរាយការណ៍របស់ លី ម៉េងហួរ
ការបូមខ្សាច់ចាក់បំពេញបឹងកក់ បានធ្វើឱ្យលិចផ្ទះរបស់អ្នកភូមិរាប់សិបគ្រួសារ ដែលពុំទាន់មានការដោះស្រាយសំណងសមរម្យនៅឡើយ។ ក្រុមអ្នកភូមិ ទាមទារឲ្យក្រុមហ៊ុនស៊ូកាគូ បញ្ឈប់ការបូមខ្សាច់ និងចង់បានការអភិវឌ្ឈន៍នៅហ្នឹងកន្លែង។ ពោលគឺស្នើឲ្យអាជ្ញាធរ ផ្តល់កម្មសិទ្ធិដល់អ្នកភូមិ ឬក៏ក្រុមហ៊ុនសង់ផ្ទះល្វែង ផ្តល់ឲ្យអ្នកភូមិនៅបឹងកក់ ដោយគ្មានការរុះរើចេញទេ។
ក៏ប៉ុន្តែការតវ៉ារបស់អ្នកភូមិ ជាច្រើនច្រើនសារ ដែលឈានដល់ការដុតកង់ឡាន នៅកន្លែងបូមខ្សាច់ នៅបឹងកក់ព្រឹកមិញ ពុំមានដំណោះស្រាយ ដែលអាចឈានដល់ការបញ្ឈប់ការបូមខ្សាច់ ពន្លិចភូមិផ្ទះនៅបឹងកក់នោះឡើយ។
ក្រុមអ្នកភូមិបឹងកក់ បានលើកគ្នាដើរជាក្បួនឆ្ពោះទៅកាន់ភូមិគ្រឹះលោកនាយករដ្ឋមន្ត្រី ហ៊ុន សែន ដើម្បីសុំអន្តរាគមន៍ បញ្ឈប់ការបូមខ្សាច់។ ក៏ប៉ុន្តែក្រុមអ្នកភូមិបឹងកក់ ត្រូវបានរារាំងពីសំណាក់កំលាំងសមត្ថកិច្ចជាច្រើននាក់ ដែលប្រដាប់ដោយអាវុធ ដំបងឆក់ និងម៉ូតូ ដាក់រាំងបិទផ្លូវ។
ក្នុងការប្រឈមមុខនោះ គ្មានអំពើហិង្សាកើតឡើងទេ តែក្រុមអ្នកភូមិ បានព្យាយាមរុញច្រានរបាំងប៉ូលីស រហូតបណ្តាលឲ្យស្ត្រីម្នាក់ ដួលសន្លប់។ ក្នុងជម្លោះដីធ្លី នៅតំបន់បឹងកក់ ដែលមានប្រជាជនជាង ៤.០០០ គ្រួសារនោះ ក្រុមហ៊ុន ស៊ូកាគូ ដែលទទួលសិទ្ធិអភិវឌ្ឍន៍បឹងកក់ បានផ្តល់សំណងដល់អ្នកភូមិ ក្នុងមួយគ្រួសារនូវទឹកប្រាក់ ៨.៥០០ ដុល្លារ និងលុយខ្មែរ ២ លានរៀលប៉ុណ្ណោះ ដើម្បីជាថ្នូរនឹងការរុះរើ។ ចំណែកអ្នកភូមិ ចង់បានសំណង់ តាមទីផ្សារជាក់ស្តែង។
កាលពីឆ្នាំ២០០៧ អាជ្ញាធររាជធានីភ្នំពេញ បានព្រមព្រៀងផ្តល់ឲ្យក្រុមហ៊ុន ស៊ូកាគូ របស់លោកឧកញ៉ា ឡៅ ម៉េងឃិន សមាជិកព្រឹទ្ធសភាគណបក្សប្រជាជនកម្ពុជា ដើម្បីអភិវឌ្ឈន៍តំបន់បឹងកក់ ដែលមានផ្ទៃដីទំហំជិត ១៣០ ហិចតា ក្នុងរយៈពេល ៩៩ ឆ្នាំ ដើម្បីធ្វើជាមជ្ឈមណ្ឌលពាណិជ្ជកម្ម និងផ្ទះល្វែងទំនើបៗ។ មិនមានការពន្យល់ណាមួយពីក្រុមហ៊ុនស៊ូកាគូ និងអាជ្ញាធររាជធានីភ្នំពេញ ជុំវិញការតវ៉ារបស់ក្រុមអ្នកភូមិបឹងកក់ ដើម្បីបញ្ឈប់ការបូមខ្សាច់ ដែលធ្វើឲ្យលិចផ្ទះរបស់អ្នកភូមិខាងលើនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ