លោក កឹម សុខា បង្ហាញមុខជាថ្មីក្រោយពីអវត្តមានជាង២ខែ
លោក កឹម សុខា ប្រធានគណបក្សសិទ្ធិមនុស្សបានរៀបចំវេទិកានយោបាយមួយនៅថ្ងៃសៅរ៍ នេះនៅឯស្រុកព្រៃឈរខេត្តកំពង់ចាម។ នេះជាការបង្ហាញមុខលើកដំបូងបំផុតបន្ទាប់ពីលោកបានវិលត្រឡប់មក ពីទស្សនកិច្ចនៅសហរដ្ឋអាមេរិកវិញកាលពីល្ងាចថ្ងៃពុធ។ លោកកឹម សុខាដែលកំពុងជាប់បណ្តឹងនៅឯតុលាការទាក់ទងនឹងការ«កឹប កេងប្រាក់ខែ»អតីតបុគ្គលិកមជ្ឈមណ្ឌលសិទ្ធិមនុស្សកម្ពុជាកាលពី៥ ឆ្នាំមុននោះបានអះអាងនៅថ្ងៃនេះថាលោកមិនព្រួយបារម្ភអំពីបញ្ហា នេះទេខណៈដែលគណបក្សរបស់លោកកំពុងកើនប្រជាប្រិយភាពយ៉ាងខ្លាំងនោះ។
ចុះផ្សាយនៅថ្ងៃ៖ កែប្រែថ្ងៃទី៖
សេក្តីរាយការណ៍របស់ ប៉ែន បូណា
បន្ទាប់ពីអវត្តមានពីប្រទេសរយៈពេលជាង២ខែ លោកកឹម សុខាបានបង្ហាញមុខជាថ្មីនៅថ្ងៃសៅរ៍នេះនៅឯស្រុកព្រៃឈរខេត្តកំពង់ចាមនៅក្នុងវេទិកានយោបាយមួយ។ប្រធានគណបក្សសិទ្ធិមនុស្សដែលមាន៣កៅអីក្នុងរដ្ឋសភាតែងរៀបចំវេទិកាជាមួយប្រជាពលរដ្ឋនៅគ្រប់ច្រកល្ហកដើម្បីស្វែងរកប្រជាប្រិយភាពនយោបាយ។
មិនត្រឹមតែនៅក្នុងប្រទេសប៉ុណ្ណោះទេ លោកកឹម សុខាក៏បានរៀបចំការជួបជុំដូច្នេះជាច្រើនដែរជាមួយពលរដ្ឋខ្មែរនៅឯក្រៅប្រទេស។ លោកបានអះអាងនៅថ្ងៃនេះថានៅក្នុងអំឡុងពេលអវត្តមានជាងពីរខែពីកម្ពុជា លោកបានរៀបចំពិធីជួបជុំជាមួយពលរដ្ឋខ្មែរចំនួន១៥រដ្ឋនៅសហរដ្ឋអាមេរិកនិងជំនួប៣ផ្សេងទៀតនៅឯកាណាដា។លោកកឹម សុខាដែលបានវិលត្រឡប់មកដល់កម្ពុជាវិញកាលពីល្ងាចថ្ងៃពុធបានអះអាងអំពីការកើនឡើងនៃចំនួនអ្នកគាំទ្រទាំងនៅក្នុងនិងក្រៅប្រទេស។
យ៉ាងណាក៏ដោយ ការវិលត្រឡប់របស់លោកកឹម សុខានៅពេលនេះគឺជួនចំពេលដែលតុលាការរាជធានីភ្នំពេញបានកោះហៅរូបលោកឲ្យឆ្លើយបំភ្លឺចំពោះពាក្យបណ្តឹងទាក់ទងនឹងការ«កឹបកេង»ប្រាក់ខែបុគ្គលិកកាលពីលោកនៅជាប្រធានមជ្ឈមណ្ឌលសិទ្ធិមនុស្សកម្ពុជា។ អតីតបុគ្គលិកមជ្ឈមណ្ឌលនេះចំនួន១៦រូបបានដាក់ពាក្យប្តឹងទៅតុលាការប្រឆាំងនឹងលោកកឹម សុខា។ ឥឡូវនេះ តុលាការបានលើកយកសំណុំរឿងកាលពី៥ឆ្នាំមុនមកចាត់ការ។
លោកកឹម សុខាបានអះអាងថាលោកបានត្រៀមខ្លួនជាស្រេចដើម្បីចូលទៅឆ្លើយបំភ្លឺចំពោះមុខតុលាការនៅថ្ងៃទី២១តុលាខាងមុខ។ គេនៅមិនទាន់ដឹងថាតើតុលាការនឹងចាត់ការយ៉ាងណាទេចំពោះសំណុំរឿងនេះ។ ប៉ុន្តែ អតីតប្រធានមជ្ឈមណ្ឌលសិទ្ធិមនុស្សកម្ពុជាដែលបានក្លាយជាប្រធានគណបក្សនយោបាយនិងជាអ្នកតំណាងរាស្រ្តនាពេលបច្ចុប្បន្ន បានឲ្យដឹងថាលោកមិនព្រួយបារម្ភអំពីពាក្យបណ្តឹងនេះទេ។ ផ្ទុយទៅវិញ លោកបានអួតសរសើរអំពីសន្ទុះនៃការគាំទ្រដែលចេះតែកើនឡើងជាលំដាប់។
ប្រធានគណបក្សសិទ្ធិមនុស្សបានអះអាងថានឹងបន្តរៀបចំវេទិកាជាមួយប្រជាពលរដ្ឋជាបន្តទៀតដូចដែលធ្លាប់បានធ្វើកន្លងទៅដោយមិនខ្វល់ពីពាក្យបណ្តឹងឡើយ។ ប្រធានបទសំខាន់ៗដែលដែលលោកកឹម សុខាលើកយកទៅបកស្រាយក្នុងវេទិកាទាំងនោះមានដូចជា បញ្ហាកសិកម្ម បូរណភាពទឹកដី និងការបោះឆ្នោតនៅឆ្នាំ២០១២និង២០១៣ខាងមុខ។អ្នកនយោបាយរូបនេះបានសម្តែងក្តីសង្ឃឹមជាថ្មីម្តងទៀតអំពីជោគជ័យធំធេងដែលគណបក្សរបស់លោកនឹងទទួលបាននៅពេលខាងមុខបើទោះបីជាលោកធ្លាប់ខកចិត្តម្តងរួចហើយកាលពីឆ្នាំ២០០៨ក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ