ទាហានថៃបាញ់ពលរដ្ឋខ្មែរទៀតហើយ ស្លាប់៥នាក់និងរបួស៨នាក់
ពលរដ្ឋខ្មែរដែលឆ្លងដែនចូលទៅកាប់ឈើក្នុងទឹកដីថៃ បានទទួលរងការបាញ់ប្រហារជាថ្មីទៀតហើយពីសំណាក់ទាហានថៃ។ តុល្យការនៅថ្ងៃនេះគឺមនុស្ស៥នាក់បានស្លាប់ និង៨នាក់រងរបួស រីឯរាប់សិបនាក់ទៀតកំពុងបាត់ខ្លួនក្នុងហេតុការណ៍បាញ់ប្រហារកាលពីល្ងាចថ្ងៃទី៨កក្កដាម្សិលមិញ។ សពជនរងគ្រោះ និងអ្នករបួសត្រូវបានគេបញ្ជូនមកដល់ទឹកដីកម្ពុជាវិញហើយនៅព្រឹកថ្ងៃសៅរ៍នេះ។ នេះជាការបាញ់ប្រហារទ្រង់ទ្រាយធំមួយដែលបានកើតឡើងបន្ទាប់ពីការបោះឆ្នោតនៅប្រទេសថៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
សាកសពពលរដ្ឋខ្មែរ៥នាក់ និងអ្នករបួស៨នាក់ត្រូវបានបញ្ជូនមកដល់ទឹកដីកម្ពុជាវិញហើយនៅថ្ងៃសៅរ៍ទី៩កក្កដា ឆ្នាំ២០១១នេះ។ ពលរដ្ឋខ្មែររងគ្រោះទាំងនេះដែលមានស្រុកកំណើតនៅស្រុកត្រពាំងប្រាសាទ ខេត្តឧត្តរមានជ័យ ត្រូវបានទាហានថៃបាញ់ប្រហារ នៅខណៈដែលពួកគេបានចូលព្រៃកាប់ឈើនៅតាមតំបន់ព្រំដែន។ នេះបើយោងតាមប្រភពពីជាយដែនកម្ពុជា-ថៃ។
ប្រភពឲ្យដឹងថា ក្រៅពីអ្នកស្លាប់ និងរងរបួស នៅមានពលរដ្ឋខ្មែររាប់សិបនាក់ផ្សេងទៀតកំពុងបាត់ខ្លួននៅឡើយ។ ប្រជាជនខ្មែរជាង ១០០ នាក់បានចូលទៅរកស៊ីកាប់ឈើ នៅលើទឹកដីថៃកាលពីថ្ងៃទី៧ និងទី៨ កក្កដា ឆ្នាំ២០១១ នៅតំបន់ព្រំដែនខេត្តឧត្តរមានជ័យ និងខេត្តព្រះវិហារ។
ជនរងគ្រោះទាំងនោះប្រហែលជាមិនដឹងថា ខ្លួនបានឆ្លងដែនចូលទៅក្នុងទឹកដីថៃទេ ប៉ុន្តែ រំពេចនោះពួកគេបានពើបប្រទះជាមួយទាហានថៃមួយក្រុមដែលបានបើកការបាញ់ប្រហារគ្មានត្រាប្រណីមកលើក្រុមមនុស្សដែលគ្មានអាវុធក្នុងដៃ។ ប្រភពមួយផ្សេងទៀតឲ្យដឹងថា នៅឯព្រំដែនខេត្តព្រះវិហារក៏មានពលរដ្ឋខ្មែរចំនួន ៧ នាក់ត្រូវទាហានថៃចាប់ខ្លួនដោយសារតែពួកគេបានចូលជ្រៅទៅទឹកដីថៃដើម្បីកាប់ឈើ។
អាជ្ញាធរព្រំដែនកម្ពុជាកំពុងតែតាមដានមើលហេតុការណ៍ដ៏គួរឲ្យសោកសៅនេះ ជាពិសេសកំពុងស្វែងរកព័ត៌មានទាក់ទងនឹងអ្នកបាត់ខ្លួន។ នៅមិនទាន់មានប្រតិកម្មពីក្រសួងការបរទេសនៅឡើយទេនៅថ្ងៃសៅរ៍នេះ ក៏ប៉ុន្តែ កន្លងទៅ ក្រសួងការបរទេសកម្ពុជាតែងតែធ្វើកំណត់ទូតតវ៉ាទៅសមភាគីថៃដោយប្រើពាក្យពេចន៍ធ្ងន់ៗនៅរាល់ពេលមានការបាញ់ប្រហារមកលើពលរដ្ឋខ្មែរពីសំណាក់ទាហានថៃ។
ក៏ប៉ុន្តែ ការតវ៉ាទាំងនោះមិនបានលទ្ធផលអ្វីទេ។ អាជ្ញាធរតាមជាយដែនក៏តែងតែចេញវិធានការជាបន្តបន្ទាប់ដើម្បីទប់ស្កាត់មិនឲ្យពលរដ្ឋខ្មែរឆ្លងចូលដោយខុសច្បាប់ទៅក្នុងទឹកដីថៃ។ ប៉ុន្តែ វិធានការទាំងនោះគ្មានប្រសិទ្ធិភាពឡើយ នៅចំពោះមុខហេតុផលជីវភាព។
ការបាញ់ប្រហារទ្រង់ទ្រាយធំមកលើពលរដ្ឋខ្មែរលើកនេះបានកើតឡើងនៅក្រោយពេលបោះឆ្នោតនៅប្រទេសថៃកាលពីថ្ងៃអាទិត្យ។ យ៉ាងណាក៏ដោយ រដ្ឋាភិបាលក្រុងភ្នំពេញបានសម្តែងក្តីសង្ឃឹមម្តងហើយម្តងទៀតថា ទំនាក់ទំនងកម្ពុជាថៃនិងល្អប្រសើរឡើងវិញនៅពេលលោកស្រីយីងឡាក់ ស៊ីណាវ៉ាត្រាឡើងកាន់អំណាចជានាយករដ្ឋមន្ត្រីថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ