ប្រមុខការទូតកម្ពុជាសង្ឃឹមថា ចំណងមិត្តភាពការទូតរវាងកម្ពុជា ថៃនឹងប្រសើរឡើងវិញ
បន្ទាប់ពីលោកនាយករដ្ឋមន្រ្តីខ្មែរ ហ៊ុន សែនបានចេញលិខិតអបអរសាទរ ជូនលោកស្រី យីងឡាក់ ស៊ីណាវ៉ាត្រា ក្លាយជានាយករដ្ឋមន្រ្តីថៃថ្មី លោករដ្ឋមន្រ្តីក្រសួងការបរទេសខ្មែរ ហោ ណាំហុង ក៏បានផ្ញើលិខិតសាទរចំពោះរដ្ឋមន្រ្តីក្រសួងការបរទេសថៃ ដែលទើបទទួលតំណែងថ្មីផងដែរ ដោយសង្ឃឹមយ៉ាងមុតមាំថា ចំណងមិត្តភាព និងកិច្ចសហប្រតិបត្តិការរវាងប្រទេសទាំង២នឹងប្រសើរឡើងវិញ ទោះជាមានការរិះគន់មួយចំនួនចំពោះរដ្ឋមន្រ្តីក្រសួងការបរទេសថៃថា ខ្វះខាតផ្នែកទំនាក់ទំនង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ការជ្រើសរើសអនុប្រធានបក្សភឿថៃ លោក ស៊ូរ៉ាពង្ស តូវីចាកឆៃគុល ( Surapong Towijachakul ) ជារដ្ឋមន្រ្តីក្រសួងការបរទេសថ្មីនៃរដ្ឋការយីងឡាក់ ស៊ីណាវ៉ាត្រា ជំនួសលោក កាស៊ីតភារម្យ បានធ្វើឲ្យមានការរិះគន់យ៉ាងធ្ងន់ធ្ងរ។ ការរិះគន់នោះធ្វើឡើងដោយសារតែកង្វះខាតបទពិសោធន៍របស់លោកស៊ូរ៉ាពង្ស ក្នុងកិច្ចការបរទេស។
លោក ស៊ូរ៉ាពង្សបានប្រាប់ក្រុមអ្នកសារព័ត៌មានថៃ ដោយជម្រុញឲ្យសាធារណៈជន និងមន្រ្តីរបស់ក្រសួងទាំងអស់ មេត្តាឲ្យលោកធ្វើកិច្ចការនេះ ដោយលោកមានជំនឿថា «នឹងធ្វើកិច្ចការនេះបាន ដោយហេតុតែមានការគាំទ្រពេញលេញ ពីក្រុមមន្រ្តី និងប្រជាពលរដ្ឋ»។ លោក ស៊ូរ៉ាពង្ស ក៏បានសន្យាថា នឹងជម្រុញការងារ ការបរទេសឡើងវិញ ដើម្បីស្តារទំនាក់ទំនងប្រទេសជិតខាង ជាពិសេសប្រទេសកម្ពុជា។
កាលពីអំឡុងពេលកាន់អំណាចរបស់អតីតនាយករដ្ឋមន្រ្តីថៃ លោក អាប់ភីស៊ីត វាចាជីវ៉ា ដែលមានលោក កាស៊ីតភារម្យ ជារដ្ឋមន្រ្តីក្រសួងការបរទេស គេមើលឃើញថាទំនាក់ទំនងការទូតរវាងប្រទេសកម្ពុជា-ថៃ មិនរីកចម្រើនទៅមុខនោះឡើយ ដោយសារតែភាពក្រឡិចក្រឡុច ក្នុងការដោះស្រាយបញ្ហាជម្លោះព្រំដែន រវាងប្រទេសទាំង២។
តែករណីលោក ស៊ូរ៉ាពង្ស រដ្ឋមន្រ្តីក្រសួងការបរទេសថៃថ្មី លោក ហោ ណាំហុង រដ្ឋមន្រ្តីក្រសួងការបរទេសកម្ពុជាហាក់មានជំនឿថា ចំណងមិត្តភាពជាប្រពៃណី និងកិច្ចសហប្រតិបត្តិការប្រកបដោយផ្លែផ្កា រវាងព្រះរាជាណាចក្រកម្ពុជា និងព្រះរាជាណាចក្រថៃ ដើម្បីបម្រើបុព្វហេតុ ផលប្រយោជន៍របស់ប្រជាជនទាំង២ និងគ្រួសារអាស៊ានទាំងមូលនឹងកើតមានឡើងវិញ។
លោក ហោ ណាំហុងបានចេញលិខិតសម្តែងការអបអរសាទរចំពោះការឡើងតំណែងថ្មីរបស់លោក ស៊ូរ៉ាពង្សនៅថ្ងៃពុធនេះដោយបង្ហាញពីជំនឿយ៉ាងមុតមាំថា ភាពប្រក្រតីនៃទំនាក់ទំនងក្រសួងការបរទេសទាំង២កាលពីអតីតកាលនោះ នឹងត្រូវរលាយនៅពេលដែលប្រមុខការទូតទាំង២ចាប់ផ្តើមធ្វើការជាមួយគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ