ប្រធានសហជីពស្នើអោយលោកស្រីយីងឡាក់ អន្តរាគមបញ្ឈប់ការបាញ់ប្រហារពលរដ្ឋខ្មែរនៅព្រំដែន
ប្រធានសហជីពសេរីកម្មករលោក ជា មុនី បានផ្ញើលិខិតមួយច្បាប់នៅថ្ងៃនេះ ទៅនាយករដ្ឋមន្ត្រីថៃលោកស្រី យីងឡាក់ ស៊ីណាវ៉ាត់ ដើម្បីស្នើអោយលោកស្រីអន្តរាគមបញ្ឈប់ការបាញ់ប្រហារពលរដ្ឋខ្មែរនៅតាមព្រំដែន។ លិខិតរបស់ប្រធានសហជីពនេះធ្វើឡើង បន្ទាប់ពីមានការប្រកាសថាលោកស្រី យីងឡាក់ ស៊ីណាវ៉ាត់ នឹងមកបំពេញទស្សនកិច្ចនៅកម្ពុជានៅថ្ងៃទី១៥កញ្ញាខាងមុខនេះ។
ចុះផ្សាយនៅថ្ងៃ៖
ស្តាប់ - ០១:៤៧
ក្រោយពីបានទទួលព័ត៌មានថានាយករដ្ឋមន្ត្រីថ្មីរបស់ប្រទេសថៃ គឺលោកស្រី យីងឡាក់ ស៊ីណាវ៉ាត់ នឹងមកបំពេញទស្សនកិច្ចនៅប្រទេសកម្ពុជា ប្រធានសហជីពសេរីកម្មករលោក ជា មុនី បានធ្វើលិខិតមួយស្នើទៅប្រមុខរដ្ឋាភិបាលថៃអោយអន្តរាគមធ្វើយ៉ាងណាកុំអោយមានករណីទាហានថៃបាញ់ប្រហារមកលើពលរដ្ឋខ្មែរបន្តទៀត។
លិខិតដែលត្រូវផ្ញើទៅលោកស្រីនាយករដ្ឋមន្ត្រីថៃនោះ លោក ជា មុនី បានសរសេរផ្តើមជាមួយពាក្យពេចន៍សាទរ ចំពោះការឡើងកាន់អំណាចរបស់លោកស្រី ក្នុងនាមជារដ្ឋមន្ត្រីស្រ្តីលើកទីមួយនៅប្រទេសថៃ។ បន្ទាប់មក ប្រធានសហជីពសេរីកម្មករបាននិយាយចូលសាច់រឿងតែម្តង អំពាវនាវអោយលោកស្រីចាត់វិធានការធ្វើយ៉ាងណាអោយក្រុមយោធា ឬកងប្រដាប់អាវុធថៃប្រចាំការតាមព្រំដែនបញ្ឈប់ការបាញ់ប្រហារមកលើពលរដ្ឋខ្មែរដែលត្រូវសង្ស័យថាឆ្លងដែនខុសច្បាប់ ហើយដែលពេលខ្លះ គឺពួកគេគ្រាន់តែស្វែងរកអនុផលព្រៃឈើនៅតាមព្រៃតាមព្រំដែនដើម្បីចិញ្ចឹមគ្រួសារតែប៉ុណ្ណោះ។ ការបាញ់ប្រហារពីសំណាក់យោធាថៃមកលើពលរដ្ឋខ្មែរដែលលោក ជា មុនី អត្ថាធិប្បាយថា ប្រព្រឹត្តដូចធ្វើលើសត្វធាតុ។
មិនមែនលោក ជា មុនី ចេះតែការពារពលរដ្ឋខ្មែរដែលធ្វើខុសច្បាប់ដោយអចេតនានៅក្នុងទឹកដីថៃនោះទេ។ ប៉ុន្តែ ប្រធានសហជីពរូបនេះ គ្រាន់តែស្នើអោយអាជ្ញាធរថៃ ប្រើប្រាស់វិធានការច្បាប់ក្នុងនាមជារដ្ឋាភិបាលស៊ីវិលមួយ និងប្រទេសអ្នករស់នៅជិតខាងជាមួយកម្ពុជា។
គួររម្លឹកថា ប៉ុន្មានឆ្នាំចុងក្រោយនេះ ខណៈដែលប្រទេសទាំងពីរកំពុងមានអរិភាពនឹងគ្នា ទាហានថៃបានបាញ់ប្រហារជាញឹកញាប់មកលើពលរដ្ឋខ្មែរស្លូតត្រង់ដែលឆ្លងចូលក្នុងទឹកដីថៃ ដើម្បីប្រកបរបរចិញ្ចឹមជីវិតនៅតាមព្រំដែន។ ពលរដ្ឋខ្មែរមិនតិចឡើយបានស្លាប់នៅក្នុងប្រតិបត្តិការបាញ់ប្រហារនេះរហូតដល់មានការដុតកុមារខ្មែរទៀតផង។ ក្រសួងការបទេសកម្ពុជាវិញ តែងធ្វើកំណត់ទូតថ្កោលទោសទង្វើរបស់យោធាថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ