ផ្លូវវែងជាងគេនៅកម្ពុជាជាជំនួយចិន
លោកនាយករដ្ឋមន្ត្រីហ៊ុន សែនបានថ្លែងនៅថ្ងៃអង្គារនេះថា ផ្លូវថ្នល់ដែលជាជំនួយរបស់ប្រទេសចិនមាននៅគ្រប់ទិសជុំវិញក្នុងប្រទេសកម្ពុជា។ នៅក្នុងឱកាសសម្ពោធការដ្ឋានសាងសង់កំណាត់ផ្លូវជាតិលេខ៦ពីខណ្ឌឬស្ស៊ីកែវទៅថ្នល់កែងក្នុងស្រុកបាធាយខេត្តកំពង់ចាម លោកនាយករដ្ឋមន្ត្រីកម្ពុជាបានលើកគុណបំណាច់របស់ប្រទេសចិនដែលផ្តល់អំណោយជាអគារទីស្តីការគណៈរដ្ឋមន្ត្រី ដោយចំអកអោយប្រទេសប្រជាធិបតេយ្យមួយចំនួនដែលមិនបានជួយសង់អគាររដ្ឋាភិបាលអោយប្រទេសកំពុងអភិវឌ្ឍន៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ជំនួយរបស់ចិនភាគច្រើននៅកម្ពុជាគឺបានធ្លាក់ទៅការសាងសង់ហេដ្ឋារចនាសម្ព័ន្ធផ្លូវថ្នល់។ ហេតុដូច្នេះហើយបានជាលោកនាយករដ្ឋមន្ត្រីហ៊ុន សែនបានប្រកាសនៅព្រឹកថ្ងៃអង្គារនេះថា ផ្លូវថ្នល់និងស្ពាននៅកម្ពុជាដែលជាជំនួយរបស់ចិនបាននៅគ្រប់ទិសជុំវិញប្រទេសកម្ពុជា។ សម្រាប់លោកហ៊ុន សែននេះគឺជាលទ្ធផលនៃមិត្តភាពនិងកិច្ចសហប្រតិបត្តិការល្អរបស់ប្រទេសទាំងពីរជាពិសេសរវាងសម្តេចឳនរោត្តមសីហនុ និងមេដឹកនាំកំពូលៗរបស់ចិន។
ការគាំទ្រនយោបាយចិនតែមួយរបស់កម្ពុជា ក៏ជាមូលហេតុដែលធ្វើអោយចិនមិនសោកស្តាយចំពោះការជួយពង្រីកសេដ្ឋកិច្ចរបស់កម្ពុជាឡើយ។ កាលពីថ្ងៃចន្ទទី១៣កុម្ភៈ នៅក្នុងជំនួបជាមួយទីប្រឹក្សានយោបាយរបស់បក្សកុម្មុយនិស្តចិន លោក ជា គីងលីននៅក្នុងប្រទេសចិន ព្រះមហាក្សត្រព្រះបាទព្រះបរមនាថ នរោត្តម សីហមុនីបានមានព្រះរាជឱង្ការថាកម្ពុជានឹងនៅតែគាំទ្រនយោបាយចិនតែមួយ។
លោកហ៊ុន សែនបានសម្ពោធការដ្ឋានសាងសង់កំណាត់ផ្លូវជាតិលេខ៦ប្រវែងជាង៤០គមពីព្រែកលៀបទៅដល់ថ្នល់កែងក្នុងស្រុកបាធាយខេត្តកំពង់ចាម ដែលកំណាត់ផ្លូវនេះធ្លាប់ត្រូវបានសាងសង់ដោយជំនួយជប៉ុន ខណៈដែលចិនក៏កំពុងសាងសង់ស្ពានជ្រោយចង្វារទីពីរទន្ទឹមស្ពានជ្រោយចង្វារទីមួយដែលជប៉ុនបានជួសជុលអោយដែរ។
ដោយនិយាយអំពីជំនួយចិននៅកម្ពុជា លោកនាយករដ្ឋមន្ត្រីកម្ពុជាក៏បាននិយាយថ្លែងអរគុណចិនដែលត្រូវគេរិះគន់ថាជាប្រទេសកុម្មុយនិស្ត តែបានផ្តល់ជំនួយតាំងពីអគារទីស្តីការគណៈរដ្ឋមន្ត្រី និងអគារព្រឹទ្ធសភាអោយកម្ពុជា ហើយបានចំអកអោយប្រទេសមួយចំនួនដែលថាខ្លួនជាប្រទេសប្រជាធិបតេយ្យ តែមិនដែលបានជួយសាងសង់អគាររដ្ឋាភិបាលអោយប្រទេសកំពុងអភិវឌ្ឍន៍ឡើយ។
សូមរម្លឹកថា ទំហំនៃការដោះដូរទំនិញរវាងកម្ពុជានិងចិនមានតម្លៃប្រមាណ២០០០លានដុល្លារនៅក្នុងឆ្នាំ២០១១ ហើយប្រទេសទាំងពីរសន្យាថានឹងពង្រីកទំហំនៃការដោះដូរទំនិញអោយបានដល់២៥០០លានដុល្លារមុនឆ្នាំ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ