ជម្លោះផ្ទៃក្នុងបក្សនរោត្តមរណឫទ្ធិកាន់តែស្មុគស្មាញឡើង
លោក សៅ រ៉ានី អគ្គលេខាធិការគណបក្សនរោត្តមរណឫទ្ធិថ្លែងនៅថ្ងៃអាទិត្យនេះថា លោកនឹងដាក់ពាក្យបណ្តឹងនៅថ្ងៃចន្ទស្អែកដើម្បីបង្កកសកម្មភាពនយោបាយរបស់គណបក្សនរោត្តម រណឫទ្ធិ។ ការប្រកាសនេះបានធ្វើឡើងបន្ទាប់ពីព្រះអង្គម្ចាស់រណឫទ្ធិប្រកាសដករូបលោកចេញពីបក្ស។ ប៉ុន្តែ លោក ប៉ែន សង្ហា អ្នកនាំពាក្យគណបក្សដែលស្និតនឹងព្រះអង្គម្ចាស់រណឫទ្ធិបដិសេធមិនទទួលស្គាល់សេចក្តីថ្លែងការណ៍របស់លោក សៅ រ៉ានី ទេ។
ចុះផ្សាយនៅថ្ងៃ៖
ស្តាប់ - ០២:៤៤
លោក សៅ រ៉ានី អគ្គលេខាធិការគណបក្សនរោត្តមរណឫទ្ធិ ដែលមានជម្លោះជាមួយនឹងព្រះអង្គម្ចាស់រណឫទ្ធិគ្រោងនឹងដាក់ពាក្យបណ្តឹងទៅសាលាដំបូងរាជធានីភ្នំពេញនៅថ្ងៃចន្ទស្អែកនេះដើម្បីស្នើសុំបង្កកសកម្មភាពរបស់គណបក្សនរោត្តមរណឫទ្ធិ។ នេះបើយោងតាមការអះអាងរបស់លោក សៅ រ៉ានី ថ្លែងប្រាប់អ្នកកាសែតនៅទីស្នាក់ការកណ្តាលគណបក្សនរោត្តម រណឫទ្ធិក្នុងខណ្ឌទួលគោកនៅព្រឹកថ្ងៃអាទិត្យនេះ។
លោក សៅ រ៉ានី មិនព្រមដើរចេញពីគណបក្សឡើយ បើទោះជាមានការសម្រេចបញ្ឈប់រូបលោកពីតួនាទីអគ្គលេខាធិការគណបក្សដោយព្រះអង្គម្ចាស់រណឫទ្ធិ ព្រះប្រធានគណបក្សនរោត្តមរណឫទ្ធិក៏ដោយ។
ការដាក់ពាក្យបណ្តឹងនេះគឺជាវិធានការតតាំងថ្មីមួយទៀតរបស់ក្រុមអ្នកដែលបានទៅរួបរួមជាមួយគណបក្សហ្វ៊ុនស៊ិនប៉ិចដឹកនាំដោយលោក សៅ រ៉ានី។ កាលពីម្សិលមិញសមាជិកគាំទ្រគណបក្សនរោត្តមរណឫទ្ធិមួយចំនួនដែលមានសមានចិត្តជាមួយលោក សៅ រ៉ានី អគ្គលេខាធិការគណបក្សនរោត្តមឫណរិទ្ធិបានចាប់ផ្តើមប្របាច់បញ្ចូលគ្នាជាមួយគណបក្សហ៊្វុនស៊ិនប៉ិចហើយនៅក្នុងខេត្តកំពង់ចាម។ នេះជាចលនារួបរួមដំបូងជាមួយគណបក្សហ៊្វុនស៊ិចប៉ិច ដោយគ្មានព្រះអង្គម្ចាស់រណឫទ្ធិនិងក្រោយពីលោក សៅ រ៉ានី ត្រូវបានសម្តេចក្រុមព្រះនរោត្តមរណឫទ្ធិដកចេញពីគណបក្ស។
លោកសៅ រ៉ានីបានបន្តបញ្ជាក់ទៀតថាលោកនៅបន្តធ្វើការងាររួបរួមគ្នារវាងគណបក្សគូសត្រូវបងប្អូនទាំងពីរ ជាមួយលោកញឹក ប៊ុនឆៃ រហូតដល់មានការប្របាច់បញ្ចូលគ្នានៅក្រោមដំបូលគណបក្សហ៊្វុនស៊ិនប៉ិចតែមួយ។ លោកសៅ រ៉ានី បានអះអាងប្រាប់អ្នកកាសែតថា ក្រោយពីការរួបរួមគ្នាបានជោគជ័យហើយ លោកនឹងយាងសម្តេចក្រុមព្រះមកធ្វើជាប្រធានគណបក្សហ្វ៊ុនស៊ិនប៉ិចឡើងវិញ។
ឆ្លើយតបទៅនឹងសេចក្តីអត្ថាធិប្បាយរបស់លោក សៅ រ៉ានី កាលពីព្រឹកមិញនេះ លោក ប៉ែន សង្ហា អ្នកនាំពាក្យគណបក្សដែលស្និតនឹងព្រះអង្គម្ចាស់នរោត្តមរណឫទ្ធិបានបញ្ជាក់ថា ការថ្លែងរបស់លោក សៅ រ៉ានី គឺជាគំនិតបុគ្គលហើយគណបក្សនរោត្តមរណឫទ្ធិមិនទទួលស្គាល់សេចក្តីអត្ថាធិប្បាយនេះទេ។ មិនទទួលស្គាល់ពីព្រោះថា លោក សៅ រ៉ានី ត្រូវបានដកតួនាទីចេញពីគណបក្សហើយ។
សូមបញ្ជាក់ថា សម្តេចក្រុមព្រះនរោត្តមរណឫទ្ធិបានសម្រេចបណ្តេញលោក សៅ រ៉ានីនិងមន្ត្រី៥នាក់ផ្សេងទៀតចេញពីគណបក្សនរោត្តមរណឫទ្ធិកាលពីទី២០កក្កដាកន្លងមកនេះ បន្ទាប់ពីមន្ត្រីទាំងនោះ បានទៅចរចាស្ងាត់ៗជាមួយលោក ញ៉ឹក ប៊ុនឆៃ ប្រធានប្រតិបត្តិគណបក្ស ហ្វ៊ុនស៊ិនប៉ិច ស្តីពីការបង្រួបបង្រួមគណបក្សរាជានិយមទាំងពីរឡើងវិញ។
ជម្លោះបែកបាក់គណបក្ស នរោត្តម រណឫទ្ធិបានកើតឡើងក្រោយពីបរាជ័យនៃការបង្រួបបង្រួមគ្នាដែលបានចុះហត្ថលេខាកាលពីចុងខែឧសភារវាងព្រះអង្គម្ចាស់ នរោត្តម រណឫទ្ធិជាមួយលោក ញ៉ឹក ប៊ុនឆៃ ក្រោមការជួយសម្របសម្រួលពីលោកនាយករដ្ឋមន្ត្រី ហ៊ុន សែន។ សម្តេចក្រុមព្រះ និងលោក ញ៉ឹក ប៊ុនឆៃ បានចោទគ្នាទៅវិញទៅមកពីមូលហេតុនៃការបរាជ័យក្នុងការបង្រួបបង្រួមគណបក្សរាជានិយមទាំងពីរឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ