ការបោះឆ្នោតនីតិកាលទី៥នេះ មិនបង្អាក់សកម្មភាពវិនិយោគឡើយ
ចុះផ្សាយនៅថ្ងៃ៖
ស្តាប់ - ០៣:២៥
កម្ពុជាកំពុងស្ថិតនៅក្នុងដំណាក់កាល នៃការរៀបចំការបោះឆ្នោតជ្រើសតាំងតំណាងរាស្ត្រ ដែលឈានទៅរកការបោះឆ្នោតជ្រើសរើសមេដឹកនាំប្រទេសទៀតផង។ ខុសពីការបោះឆ្នោតលើកមុនៗ នៅក្នុងរយៈពេលនៃការបោះឆ្នោតលើកនេះ គ្មានឡើយព័ត៌មានស្តីពីការព្រួយបារម្ភពីអ្នកវិនិយោគក្នុងស្រុក និងបរទេស ហើយពួកគេផ្អាកសកម្មភាពវិនិយោគនោះ។ នេះគឺជាករណីកម្រនៅក្នុងប្រវត្តិនៃការបោះឆ្នោតនៅកម្ពុជា។
គេនៅចាំបានអំពីស្ថានភាពនៃវិបត្តិសេដ្ឋកិច្ចនៅក្នុងប្រទេសកម្ពុជានៅឆ្នាំ២០០៨។ ក្រៅពីអតិផរណាតម្លៃទំនិញនៅតាមទីផ្សារ តម្លៃអចនទ្រព្យនៅក្នុងប្រទេសនេះ បានធ្លាក់ដាំក្បាលចុះយ៉ាងពេញទំហឹង។ នៅពេលនោះ វាមានមូលហេតុចំបង២ ដែលជាកាតាលីករនៃការធ្លាក់ចុះនៃសេដ្ឋកិច្ច។ ទីមួយគឺជាឥទ្ធិពលនៃវិបត្តិសេដ្ឋកិច្ចពិភពលោក ដែលជះមកដល់កម្ពុជា តិច ឬច្រើន។ និងទី២ គឺការបោះឆ្នោតនេះឯង។ នៅកម្ពុជា ចាប់តាំងពីមានការបោះឆ្នោតជាថ្មីនៅ១៩៩៣មក ពោលគឺនីតិកាលទី១នោះមក កម្ពុជាតែងជួបវិបត្តិនយោបាយក្រោយថ្ងៃបោះឆ្នោត។ អស្ថេរភាពនយោបាយក៏តែងកើតមាន។ មរតកនេះ វាបានបង្កអោយអ្នកវិនិយោគ ទាំងក្នុងស្រុក និងបរទេស ទោះជាការវិនិយោគក្នុងទ្រងទ្រាយតូចក្តី ធំក្តី កើតក្តីមិនទុកចិត្តទាល់តែសោះ ក្នុងដាក់ទុនវិនិយោគក្នុងអំឡុងមុនពេល ក្នុងពេល និងក្រោយពេលបោះឆ្នោតបន្តិចនោះ។ ពោលគឺពួកគេ តែងតែនៅរង់ចាំមើលស្ថានភាពនឹងនរ រហូតល់ដល់ការរៀបចំរដ្ឋាភិបាលថ្មីតែម្តងចុះនៅពេលនេះ នៅក្នុងការបោះឆ្នោតនីតិកាលទី៥នេះ តើសកម្មភាពសេដ្ឋកិច្ចនៅកម្ពុជាមានស្ថានភាពយ៉ាងណាដែរ?
ជាដំបូង គេគួរពិនិត្យមើលសកម្មភាពវិនិយោគរបស់វិនិយោគិនក្នុងស្រុក។ តាមពិត ការដ្ឋានសាងសង់សម្រាប់ការវិនិយោគនានា ដូចជាគេហដ្ឋាន ភោជនីដ្ឋានថ្មីៗ និងហាងលក់ដូរជាច្រើននៅបន្តធ្វើជាធម្មតា។ ចំពោះវិនិយោគពីបរទេសវិញ អ្នកសេដ្ឋកិច្ចនានាដែលធ្វើការនៅក្នុងស្ថានប័នហិរញ្ញវត្ថុធំៗប្រចាំនៅកម្ពុជា ក៏បានអះអាងថា គម្រោងវិនិយោគនានា នៅកម្ពុជាក៏មិនបានបញ្ឈប់ឡើយ ហើយក៏គ្មានព័ត៌មាននៃការចុះថយនៃគម្រោងវិនិយោគបរទេសមកកម្ពុជាដែរ។
បើគេពិនិត្យទៅលើសកម្មភាពទិញលក់អចលនទ្រព្យវិញ ជាពិសេស នៅតាមទីក្រុងធំៗដូចជាទីក្រុងភ្នំពេញជាដើម ការទិញលក់នៅតែដំណើរការធម្មតាក្នុងរដូវបោះឆ្នោតនេះ ពោលគឺការបោះឆ្នោតជាតិឆ្នាំ២០១៣នេះ មិនមានជះឥទ្ធិពលអវិជ្ជមានមកលើវិស័យអចនទ្រព្យទេ។
និយាយសរុបមកវិញ គេសង្កេតឃើញជាទូទៅថា អ្នកវិយោគទាំងក្នុង និងក្រៅប្រទេសមិនមានការរារែក អល់អែកក្នុងការបោះប្រាក់វិនិយោគនោះឡើយ។ អ្នកវិនិយោគក្រៅប្រទេសនៅតែបោះទុននៅក្នុងវិស័យសំណង់ វិស័យកសិកម្ម វិស័យកាត់។
ការសម្រេចចិត្តបោះទុនដោយមិនអល់អែករបស់វិនិយោគិននៅមុនពេល បោះឆ្នោត នេះ គឺបណ្តាលមកពីមូលហេតុធំៗចំនួន៤។ ទីមួយ គឺដោយសារកំណើនសេដ្ឋកិច្ចជាតិ ឬកំណើនជីវភាពរបស់ប្រជាជន។ ទីពីរ គឺបើកទីផ្សារនៃសហគមអាស៊ានក្នុងឆ្នាំ២០១៥ខាងមុខនេះ ហើយកម្ពុជាអាចជាទីតាំងល្អមួយសម្រាប់វិនិយោគិន។ ទីបី គឺដោយសារ រដ្ឋាភិបាលបានធ្វើការសន្យាជាមួយអ្នកវិនិយោគទុនមួយចំនួនក្នុងការ លុបបំបាត់អំពើពុករលួយ ឬចំណាយក្រៅផ្លូវការ និងទី៤ គឺដោយសារ អ្នកជំនួញទាំងនោះយល់ឃើញថា ប្រទេសកម្ពុជានឹងមិនមានបញ្ហាវឹកវរផ្នែកនយោបាយក្នុងពេលបោះឆ្នោត និងក្រោយពេលបោះឆ្នោតទៀតឡើយ។
វាហាក់ដូចជា អ្នកជំនួញពីមួយអាណត្តិទៅមួយអាណត្តិកាន់តែមានការជឿជាក់លើស្ថានភាព នយោបាយនៅក្នុងប្រទេសកំពុងអភិវឌ្ឍមួយនេះ។ ត្រង់ចំណុចនេះ អ្នកនយោបាយគួរតែយល់អំពីសេចក្តីត្រូវការរបស់អ្នកវិនិយោគ។ អ្នកវិនិយោគដែលមិនត្រូវការយកប្រាក់រាប់លាន ដុល្លារអាមេរិករបស់គេ មកវិនិយោគក្នុងប្រទេសមួយដែលពោរពេញទៅដោយអស្ថេរភាពនយោបាយនោះឡើយ។
គួរបញ្ជាក់ផងដែរថា ស្ថេរភាពនយោបាយមិនត្រឹមតែជាសញ្ញាល្អនៃស្ថានភាពសេដ្ឋកិច្ចជារួម ហើយវាមិនធ្វើអោយវិនិយោគិនខ្លាចរអានោះឡើយ ប៉ុន្តែផ្ទុយទៅវិញ អ្នកវិនិយោគខ្លួនឯងមួយចំនួនក៏កំពុងធ្វើជំនួញលើទំនិញមួយចំនួនដែលត្រូវប្រើប្រាស់ពេលបោះឆ្នោតផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ