ក្រសួងយុត្តិធម៌៖ គ្មានព្រះរាជទានលើកលែងទោសចំពោះលោកសម រង្ស៊ីឡើយ
មន្ត្រីជាន់ខ្ពស់នៃក្រសួងយុត្តិធម៌បានអះអាងថា គ្មានព្រះរាជលើកលែងទោសដល់លោក សម រង្ស៊ី ប្រធានគណបក្សសង្គ្រោះជាតិនោះឡើយ។ ការអះអាងបែបនេះធ្វើឡើង ក្រោយពេលដែលលោកសម រង្ស៊ីបានប្រកាសថា លោកនឹងធ្វើដំណើរចូលមកក្នុងប្រទេសកម្ពុជាអោយបានមុនថ្ងៃបោះឆ្នោត។ អ្នកនាំពាក្យគណបក្សសង្គ្រោះជាតិលោក យឹម សុវណ្ណបានបញ្ជាក់ថា លោកសម រង្ស៊ី មិនខ្លាចអំពីការចាប់ខ្លួនលោកនោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
ខណៈដែលលោកសម រង្ស៊ីប្រកាសត្រឡប់ចូលក្នុងប្រទេសកម្ពុជាអោយបានមុនថ្ងៃបោះឆ្នោតនោះ មន្ត្រីជាន់ខ្ពស់ក្រសួងយុត្តិធម៌បានអះអាងថា រហូតដល់ពេលនេះ គឺមិនមានព្រះរាជលើកលែងទោសពី ព្រះមហាក្សត្រចំពោះលោកសម រង្ស៊ីឡើយ។ នាយកខុទ្ទកាល័យក្រសួងយុត្តិធម៌ លោកសម ប្រជាមានិត បានអះអាងថា រហូតដល់ថ្ងៃអាទិត្យទី៧ កក្កដា គ្មានមូលដ្ឋានច្បាប់ណាមួយដែលធានាអំពីភាពរួចទោសរបស់លោកសម រង្ស៊ីឡើយ។ តើលោកសម រង្ស៊ីនឹងប្រឈមមុខនឹងការចាប់បញ្ជូនទៅពន្ធនាគារឬយ៉ាងណា នៅពេលដែលលោកមកដល់កម្ពុជា។
អ្នកនាំពាក្យគណបក្សសង្គ្រោះជាតិ លោកយឹម សុវណ្ណបានអះអាងថា ប្រធានរបស់លោកមិនបារម្ភខ្លាចចំពោះវិធានការណាមួយឡើយរបស់អាជ្ញាធរកម្ពុជា។ លោកយឹម សុវណ្ណបានបញ្ជាក់ថា លោកសម រង្ស៊ីនឹងមកដល់កម្ពុជានៅក្នុងអំឡុងសប្តាហ៍ទី២ ឬសប្តាហ៍ទី៣ក្នុងខែកក្កដានេះ។
ទាក់ទងនឹងសេចក្តីប្រកាសចូលក្នុងប្រទេសកម្ពុជារបស់លោកសម រង្ស៊ីនេះដូចគ្នា អ្នកនាំពាក្យរដ្ឋាភិបាលកម្ពុជា លោកខៀវ កាញារីទ្ធក៏បានបញ្ជាក់ថាផងដែរថា គ្មានព្រះលើកលែងទោសពីព្រះមហាក្សត្រដល់លោកសម រង្ស៊ីនោះឡើយ។ ចំពោះលោកខៀវ កាញារីទ្ធ នេះក៏មិនមែនជាលើកទីមួយដែរ ដែលលោកសម រង្ស៊ីប្រកាសត្រឡប់ចូលកម្ពុជា។ លោក ខៀវ កាញារីទ្ធប្រាប់វិទ្យុបារាំងអន្តរជាតិថា លោកសម រង្ស៊ីប្រកាសយ៉ាងដូច្នេះម្តងហើយ នៅពេលលោកបារ៉ាក់ អូបាម៉ាហៀបនឹងមកប្រទេសកម្ពុជាកាលពីចុងឆ្នាំមុន។
គួរម្លឹកថា លោកសម រង្ស៊ីបានផ្សព្វផ្សាយខ្សែវីដេអូរបស់លោកនៅតាមប្រព័ន្ធបណ្តាញសង្គមហ្វេសប៊ុក ដែលប្រកាសថា លោកនឹងចូលមកកម្ពុជាអោយបានមុនថ្ងៃបោះឆ្នោត ថ្ងៃទី២៨កក្កដានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ