អតីតបុគ្គលិកក្រុមហ៊ុនMfoneដែលមិនទាន់បានសំណង ប្រមូលផ្តុំគ្នាម្តងទៀតដើម្បីពន្លឿនដំណោះស្រាយ
នៅព្រឹកថ្ងៃចន្ទនេះ ក្រុមអតីតបុគ្គលិកក្រុមហ៊ុនក្សយ័ធន Mfone បានប្រមូលគ្នាសាជាថ្មី ដើម្បីពន្លឿនអោយមានការដោះស្រាយសំណង មុនថ្ងៃបោះឆ្នោត។ នៅព្រឹកមិញនេះ ក្រុមអតីតបុគ្គលិកបានជួបជាមួយអភិបាលបណ្តោះអាសន្នក្រុមហ៊ុនហើយ ប៉ុន្តែពុំទទួលបានលទ្ធផលអ្វីថ្មីជាក់លាក់ ក្រៅពីការរង់ចាំពេលលក់ទ្រព្យក្រុមហ៊ុនបានលុយសិននោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥១
ភាពស្ងប់ស្ងាត់របស់អតីតបុគ្គលិកក្រុមហ៊ុនក្ស័យធន Mfone មិនអាចបន្តទៀតបានទេ។ នៅព្រឹកថ្ងៃចន្ទនេះ អតីតបុគ្គលិក Mfone បានងើបឡើងវិញជាថ្មីម្តងទៀត ដើម្បីតវ៉ាទាក់ទិននឹងបញ្ហាដែលអតីតបុគ្គលិកខ្មែរទាំងអស់ពុំទាន់បានទទួលសំណងអ្វីទេ សូម្បីតែមួយកាក់។ ការតវ៉ានេះក៏ធ្វើឡើង ដើម្បីច្រានចោលព័ត៌មានដែលកន្លងមកត្រូវបានសារព័ត៌មានមួយចំនួនផ្សាយថា ក្រុមហ៊ុនបានដោះស្រាយប្រាក់សំណងដល់ពួកគេអស់ហើយ។
អតីតបុគ្គលិកក្រុមហ៊ុន Mfone ម្នាក់ គឺលោក សំអាត បានអោយដឹងថា លើកមុនខាងអភិបាលបណ្តោះអាសន្នរបស់ក្រុមហ៊ុនសន្យាថា នៅថ្ងៃទី១៥ កក្កដានេះ បុគ្គលិកទាំងអស់ នឹងដឹងអំពីចំនួនទឹកប្រាក់មួយចំនួនដែលខ្លួននឹងអាចទទួលបាន។ ប៉ុន្តែ ក្នុងជំនួបជាមួយអភិបាលបណ្តោះអាសន្ន ព្រឹកមិញនេះ ពុំទាន់មានលទ្ធផលអ្វីជាក់លាក់នោះទេ។ ហេតុដូច្នេះហើយ យោងតាមលោកសំអាត នៅថ្ងៃទី១៧ កក្កដាខានស្អែកនេះ នឹងមានការប្រមូលផ្តុំម្តងទៀត ដើម្បីជំរុញអោយមានការដោះស្រាយយ៉ាងឆាប់រហ័ស ពិសេសមុនការបោះឆ្នោត។ លើសពីនេះ លោកក៏បានអំពាវនាវអោយរដ្ឋាភិបាល និងសារព័ត៌មាន ចាប់អារម្មណ៍លើបញ្ហានេះ ដើម្បីជំរុញអោយមានដំណោះស្រាយកាន់តែឆាប់រហ័ស។
ចំណែកឯតំណាងប្រតិភូបុគ្គលិក Mfone លោក នឹម សូលីដា ដែលបានចូលរួមដោះស្រាយសំណងជាមួយនឹងអភិបាលក្រុមហ៊ុន បានទទួលស្គាល់ការលំបាកក្នុងការដោះស្រាយបញ្ហានេះ ប៉ុន្តែយ៉ាងណា លោកក៏នៅតែមិនសប្បាយចិត្តដោយសារតែការរង់ចាំសំណងមានរយៈពេលយូរ។
សូមរំលឹកថា ក្រុមហ៊ុន MFone បានប្រកាសក្ស័យធន កាលពីចុងឆ្នាំ២០១២កន្លងទៅ និងពុំមានសកម្មភាពការងារទាំងស្រុង នៅខែមីនាឆ្នាំ២០១៣ កន្លងទៅនេះ ដែលបណ្តាលឲ្យមានកូដកម្មកើតឡើងជាច្រើនលើកពីសំណាក់បុគ្គលិក។ តាមការប៉ាន់ប្រមាណ ក្រុមហ៊ុន MFone បានជំពាក់បំណុលសរុបប្រមាណជា ១៦០លានដុល្លារ ក៏ប៉ុន្តែទ្រព្យសម្បត្តិរបស់ក្រុមហ៊ុនទាំងអស់ត្រូវគេរកឃើញតែជាង ១០០លានដុល្លារប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ