សត្វព្រៃ ៨ប្រភេទនៅកម្ពុជាកំពុងទទួលរងគ្រោះថ្នាក់
សត្វព្រៃជើងចំពៀមចំនួន ១៣ ប្រភេទដែលរស់នៅក្នុងប្រទេសនៃមហាតំបន់មេគង្គ ក្នុងនោះមាន៨ ប្រភេទ កំពុងរស់នៅក្នុងប្រទេសកម្ពុជា កំពុងទទួលរងគ្រោះថ្នាក់ឈានទៅរកការបាត់បង់ ប្រសិនបើមិនមានវិធានការដើម្បីលើកកម្ពស់កិច្ចការពារ និង លើកកម្ពស់កិច្ចខំប្រឹងប្រែងអភិរក្សក្នុងគោលដៅស្តារឡើងវិញនូវចំនួនសត្វទាំងនេះ ព្រមទាំងទីជំរករបស់វានោះទេ។ នេះបើតាមសេចក្ដីប្រកាសព័ត៌មានរបស់អង្គការ WWF នៅថ្ងៃ ព្រហស្បតិ៍ ទី១២ សីហា នេះ។
ចុះផ្សាយនៅថ្ងៃ៖
ស្តាប់ - ០១:៤៣
អនាគតរបស់ថនិកសត្វព្រៃជើងចំពៀមចំនួន ៨ ប្រភេទនៅកម្ពុជា កំពុងស្ថិតក្នុងភាពមិនច្បាស់លាស់ ហើយចំពោះសត្វមួយចំនួនវាហួសពេលទៅហើយក្នុងការចាត់វិធានការការពារ។ នេះបើយោងតាមសេចក្ដីប្រកាសព័ត៌មានរបស់អង្គការបរិស្ថានWWF ដែលចេញ នៅព្រឹកថ្ងៃព្រហស្បតិ៍ ទី ១២ សីហា នេះ។
លោក ព្រំ សុវណ្ណា នាយរងរដ្ឋាបាលព្រៃឈើ កោះញែក និង ជាមន្ត្រីសមភាគីអង្គការWWF ទទួលបន្ទុកផ្នែកស្រាវជ្រាវ ប្រាប់វិទ្យុបារាំងអន្តរជាតិឲ្យដឹងថា សត្វដែលទទួលរងគ្រោះថ្នាក់ទាំង ៨ ប្រភេទមានដូចជា រមាំង កេស ក្ដាន់ ទន្សោង ក្របីព្រៃ ខ្ទីង ក្ដាន់ញែង និង ប្រើស។ ក្នុងនោះ ក្ដាន់ញែង និង ប្រើសជាប្រភេទដែលមានដោយបង្គួរ ក្រៅពីនេះសុទ្ធតែជាប្រភេទដែលមានដោយកម្រ។
គួរបញ្ជាក់ថា ចំពោះសត្វគោព្រៃវិញ ប្រហែលជាបានផុតពូជពីប្រទេសកម្ពុជាទៅហើយ ដោយការស្រាវជ្រាវចុងក្រោយរបស់អង្គការ WWF គេពុំទាន់ឃើញវត្តមានគោព្រៃនោះទេ។ ហើយសត្វមួយចំនួនទៀតដូចជា រមាំង និង ទន្សោង ក៏កំពុងប្រឈមនឹងជោគវាសនាស្រដែងគ្នាទៅនហ្នឹងគោព្រៃដែរ។
ចំពោះហេតុផលដែលធ្វើអោយសត្វទាំងនេះរងគ្រោះថ្នាក់ត្រូវបាន លោក ថមម៉ាស់ ហ្គ្រេ ប្រធានកម្មវិធីសត្វព្រៃនៃអង្គការ WWF មហាតំបន់មេគង្គបានលើកឡើងថា សកម្មភាពរំខានពីសំណាក់មនុស្សដូចជាការបរបាញ់ និង បំផ្លិចបំផ្លាញទីជម្រក កំពុងធ្វើអោយមានការថយចុះយ៉ាងលឿននូវចំនួនប្រភេទសត្វដ៏អស្ចារ្យទាំងនេះ។ គេនៅមានពេលវេលានៅឡើយក្នុងការជួយសង្គ្រោះពពួកសត្វទាំងនេះ ប្រសិនបើរដ្ឋាភិបាលនៃបណ្ដាប្រទេសទាំងអស់ក្នុងតំបន់ដាក់ វិស័យជីវៈចម្រុះ និង វិធានការការពារជាស្នូលនៃការសម្រេចចិត្ត។
គួររម្លឹកថា អង្គការ WWF កំពុងធ្វើការជាមួយរដ្ឋាភិបាលកម្ពុជា និង ស្ថាប័នដៃគូរផ្សេងៗទៀត ក្នុងការស្ដារឡើងវិញនូវបរិមាណថនិកសត្វមានក្រចកជើងចំពៀមនៅតំបន់ព្រៃធម្មជាតិ ព្រមទាំងរក្សាភាពតភ្ជាប់គ្នារវាងតំបន់ព្រៃជំរករបស់សត្វទាំងនេះ ដើម្បីធានាបានថាបរិមាណសត្វទាំងនេះកើនឡើង។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ