ពលរដ្ឋកំពុងតាមដានការងាររបស់អ្នកនយោបាយវ័យក្មេង
ចុះផ្សាយនៅថ្ងៃ៖
ស្តាប់ - ០៤:៣០
នៅថ្ងៃចន្ទម្សិលមិញ លោកនាយករដ្ឋមន្ត្រីបានបង្ហើបអំពីការផ្លាស់ប្តូរមន្ត្រីអាយុច្រើន។ ការណ៍នេះវាមិនអាចចៀសផុតពីការដំឡើងឋានៈមន្ត្រីជំនាន់ក្រោយនោះឡើយ។ មិនមែនមានតែគណបក្សប្រជាជនកម្ពុជាទេ គណបក្សសង្គ្រោះជាតិក៏មានមន្ត្រីជំនាន់ក្រោយ ជាអ្នកនយោបាយដែរ។ ជាច្រើនឆ្នាំមកហើយ មហាជនទូទៅបាននិយាយ និងចង់ឃើញវត្តមានយុវជននៅក្នុងការរចនាសម្ព័ន្ធដឹកនាំប្រទេស ដែលពួកគេហៅថា ជាការបន្តវេននោះ។ នៅពេលនេះ គេឃើញមានហើយ អ្នកនយោបាយវ័យក្មេង ទាំងនៅក្នុងរដ្ឋសភា និងនៅក្នុងរដ្ឋាភិបាល។ ដូច្នេះ យុវជនទាំងនោះនឹងក្លាយទៅជាផ្ទាំងស៊ីបរបស់ម្ចាស់ឆ្នោត ដែលនឹងត្រូវវាយតម្លៃការងាររបស់ពួកគេ។
អ្វីដែលជាការចង់ឃើញរបស់ម្ចាស់ឆ្នោត ឬពលរដ្ឋខ្មែរទូទៅតាំងពីយូរមកហើយនោះ គឺវត្តមានយុវជនជំនាន់ក្រោយនៅក្នុងឆាកនយោបាយ យុវជននៅក្នុងក្រសួងរបស់រដ្ឋាភិបាលជាដើម។ ដោយសារតែកម្ពុជាត្រូវបានដឹកនាំដោយគណបក្សប្រជាជនកម្ពុជាជារៀងរហូត តាំងពីដើមទស្សវត្ស៨០ រហូតមកដល់ពេលនេះ ពលរដ្ឋខ្មែរបានលឺតែឈ្មោះមន្ត្រី និងសមាជិករដ្ឋាភិបាលដដែលៗក្នុងរយៈពេលជាង៣០ឆ្នាំមកនេះ។
ការទន្ទឹងចង់ឃើញ និងចង់បានអោយយុវជនមកធ្វើការងារជំនួសមនុស្សចាស់ បានធ្វើឲ្យ ពលរដ្ឋមួយចំនួនធំ វិនិច្ឆ័យជាលក្ខណៈអត្តនោម័ត ដាក់ក្តីសង្ឃឹមដោយគ្មានរារែក ថាយុវជននឹងប្រាកដជាពាំនាំចំណេះដឹងថ្មី របៀបធ្វើការថ្មី ក្នុងគោលដៅអភិវឌ្ឍន៍ប្រទេសឲ្យបានជឿនលឿន ប្រកបដោយតម្លាភាព គណនេយ្យភាព។
ឥឡូវនេះ ការទន្ទឹងរង់ចាំនោះ បានមកដល់ហើយ។ ទាំងគណបក្សប្រជាជនកម្ពុជា និងទាំងគណបក្សសង្គ្រោះជាតិ ពួកគេសុទ្ធតែមានសមាជិក អាយុក្រោម៤០ឆ្នាំ ជាសមាជិករដ្ឋសភា។ ហើយក៏មានដែលសមាជិករដ្ឋសភាដែលមានអាយុក្រោម៥០ឆ្នាំ ដែលអាចចាត់ទុកថា ជាវ័យប្រកបដោយថាមភាពក្នុងការបំពេញការងារបម្រើម្ចាស់ឆ្នោត។
ដោយសារតែគណបក្សសង្គ្រោះជាតិ មានត្រឹមតែសមាជិករដ្ឋសភា ចំនួនយុវជនជំនាន់ថ្មីនៅក្នុងស្ថាប័ននយោបាយនេះ ក៏មានចំនួនតិចនៅឡើយ។ ផ្ទុយទៅវិញ នៅក្នុងរដ្ឋាភិបាលដែលដឹកនាំដោយគណបក្សប្រជាជនកម្ពុជាឯណោះវិញ ដោយមិននិយាយអំពីរដ្ឋមន្ត្រីក្រសួងបរិស្ថាន វ័យ៣៣ឆ្នាំ លោកនាយករដ្ឋមន្ត្រីហ៊ុន សែន បានប្រកាសហើយអំពីសមាសភាពថ្នាក់អនុរដ្ឋលេខាធិការអាយុក្រោម៣០ឆ្នាំ ថ្នាក់រដ្ឋលេខាធិការអាយុក្រោម៤០ឆ្នាំជាច្រើននោះ។ ប្រមុខរដ្ឋាភិបាលក៏បានព្រលយឲ្យដឹងផងដែរអំពីលទ្ធភាព ក្នុងពេលខាងមុខ នៃការរុះរើសមាសភាពទាំងនេះ ដើម្បីដំឡើងមន្ត្រីថ្នាក់អនុរដ្ឋលេខាធិការទៅថ្នាក់រដ្ឋលេខាធិការ និងពីរដ្ឋលេខាធិការទៅថ្នាក់រដ្ឋមន្ត្រីនោះ ប្រសិនបើពួកគេមានសមត្ថភាពនោះ។
ដោយសារតែវាជាការទន្ទឹងរង់ចាំជាយូរមកហើយនូវឈាមថ្មីក្នុងការងាររដ្ឋបាលសាធារណៈ មន្ត្រីវ័យក្មេងទាំងនេះ ជាពិសេសកូនរបស់មេដឹកនាំកំពូលផង មិនអាចចៀសផុតឡើយ ពីការយកចិត្តទុកដាក់ និងការតាមដានពីពលរដ្ឋម្ចាស់ឆ្នោត ទៅលើការការបំពេញភារកិច្ចរបស់ពួកគេនោះ។
ក្នុងន័យនេះ មន្ត្រីវ័យក្មេងទាំងនេះ ហាក់កំពុងរងនូវការទទួលខុសត្រូវខ្ពស់មួយ ដែលមានលាយឡំនឹងសម្ពាធផ្លូវចិត្តពីពលរដ្ឋម្ចាស់ឆ្នោតទៀតផង។ ពីព្រោះថា ពួកគេត្រូវអនុវត្តគោលនយោបាយរបស់រដ្ឋាភិបាលឲ្យបានជោគជ័យដើម្បីកិត្តិនាមខ្លួនឯងផង ដើម្បីប្រជាប្រិយភាពរបស់គណបក្សផង និងដើម្បីបម្រើ និងទទួលបានការគាំទ្រពីពលរដ្ឋម្ចាស់ឆ្នោតផង។ ទន្ទឹមគ្នានេះ ឈ្មោះថាជាយុវជនជំនាន់ថ្មី ពួកគេគេក៏ត្រូវមានរបៀបធ្វើការថ្មីដែរ។ ឧទាហរណ៍ការចុះជួបពិភាក្សា និងដោះស្រាយបញ្ហាអោយពលរដ្ឋ ដោយមិនផ្តោតជាសំខាន់ទៅលើការចែកអំណោយនោះ។
តាមពិតទៅ ត្រង់ការអនុវត្តន៍របៀបធ្វើការខ្លួនឯងនេះហើយ ដែលវាជាការលំបាករបស់យុវជនតំណាងរាស្ត្រ និងយុវជនជាសមាជិករដ្ឋាភិបាលនោះ។ ពីព្រោះ ពួកគេត្រូវស្ថិតនៅចំកណ្តាលនៃការអនុវត្តន៍បញ្ជាថ្នាក់លើដែលជាមនុស្សចាស់ និងការទាមទារសិទ្ធិសេរីភាពក្នុងបញ្ចេញគំនិតផ្ទាល់ខ្លួន ក្នុងពេលបំពេញភារកិច្ច។
គណបក្សប្រជាជនកម្ពុជាដែលដឹកនាំរដ្ឋាភិបាល និងបានបញ្ចូលមនុស្សជំនាន់ថ្មីច្រើនចូលទៅក្នុងក្រសួងនានានោះ ក៏ប្រឈមនឹងការវាយតម្លៃពីពលរដ្ឋដ៏ស្រួចស្រាវដែរ។ ការបញ្ចូលមនុស្សជំនាន់ថ្មីទៅក្នុងប្រព័ន្ធរដ្ឋបាលរបស់ប្រទេសដែលខ្លួនដឹកនាំនេះ ត្រូវបានគេមើលឃើញថា វាគឺជាកំណែទម្រង់របស់គណបក្សនេះ ដែលបានធ្លាក់ប្រជាប្រិយភាពយ៉ាងខ្លាំងហើយនោះ។ ដូច្នេះ ប្រសិនបើ ពលរដ្ឋមិនអាចមើលឃើញលទ្ធផលការងារដ៏ប្រសើរនោះទេ វានឹងមានការវាយតម្លៃកាន់តែមិនល្អចំពោះសមត្ថភាពរបស់គណបក្សដែលមានវ័យចំណាស់ជាងគេនេះ ហើយវាក៏នឹងធ្វើឲ្យប៉ះពាល់ដល់កេរ្តិ៍ឈ្មោះរបស់សមាសភាពយុវជនជំនាន់ក្រោយទៀតផង។
តាមពិតទៅ ការដាក់បញ្ចូលក្រុមយុវជនជំនាន់ថ្មីទៅក្នុងរចនាសម្ព័ន្ធរដ្ឋាភិបាល វាគ្រាន់តែជាជ្រុងមួយនៃកំណែទម្រង់ ហើយវាក៏អាចជាការចាប់ផ្តើមការហ្វឹកហាត់មនុស្សជំនាន់ថ្មីរបស់គណបក្សនេះដែរ។ ប្រសិនបើ គណបក្សប្រជាជនកម្ពុជាចង់ស្តារប្រជាប្រិយភាពនោះ គឺកំណែទម្រង់ស៊ីជម្រៅលើប្រព័ន្ធយុត្តិធម៌ ការប្រឆាំងអំពើពុករលួយ កាត់បន្ថយគម្លាតរវាងអ្នកមាននិងអ្នកក្រឯណោះទេ ដែលគណបក្សនេះត្រូវអនុវត្តឲ្យបាន ដោយរួមផ្សំនឹងការផ្តល់ឱកាស និងសិទ្ធសេរីភាពឲ្យសមាជិកថ្មីបានបញ្ចេញស្នាដៃដោយគំនិតផ្ទាល់របស់ពួកគេផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ