អ្នកស្រុកថ្មបាំងនៅតែត្រៀមបន្តបិទផ្លូវមិនឲ្យក្រុមហ៊ុនចិនចូលទៅកាន់ទំនប់វារីអគ្គិសនីស្ទឹងអារ៉ែង
គិតមកដល់ថ្ងៃចន្ទ ទី១៧មីនានេះ គឺជាថ្ងៃទី៤ហើយ ដែលក្រុមប្រជាពលរដ្ឋ នៅក្នុងស្រុកថ្មបាំង ខេត្តកោះកុង បានលើកគ្នា មកតវ៉ាត្រៀមបិទផ្លូវ មិនឲ្យក្រុមហ៊ុនចិន Sinohydro ដឹកជញ្ជូនគ្រឿងចក្ររបស់ខ្លួន ទៅឈូសឆាយសាងសង់ទំនប់វារីអគ្គិសនីស្ទឹងអារ៉ែង។ នេះបើយោងតាមមន្ត្រីការពារសិទិ្ធមនុស្ស និងសកម្មជនប្រចាំនៅខេត្តកោះកុង ដែលបានប្រាប់វិទ្យុបារាំងអន្តរជាតិ RFI នៅថ្ងៃចន្ទទី ១៧មីនានេះ។
ចុះផ្សាយនៅថ្ងៃ៖ កែប្រែថ្ងៃទី៖
ប្រជាពលរដ្ឋជាង ១០០នាក់ កំពុងនាំគ្នាត្រៀមតវ៉ាប្រឆាំងបិទផ្លូវចូល ទៅកាន់តំបន់សាងសង់វារីអគ្គិសនីស្ទឹងអារ៉ែង ដោយមិនឲ្យក្រុមហ៊ុនចិនSinohydro ដឹកជញ្ជូនគ្រឿងចក្រយកទៅឈូសឆាយនៅតំបន់នោះ។ នេះបើតាមលោក អ៊ិន គង់ជិត មន្ត្រីការពារសិទិ្ធមនុស្សរបស់អង្គការលីកាដូប្រចាំនៅខេត្តកោះកុង ដែលបានចុះទៅស៊ើបអង្កេតដោយផ្ទាល់នៅកន្លែងដែលប្រជាពលរដ្ឋធ្វើការតវ៉ាប្រឆាំងនោះ។
ការតវ៉ារបស់ប្រជាពលរដ្ឋនេះ បានកើតឡើង នៅពេលដែលក្រុមការងាររបស់ក្រុមហ៊ុនចិនSinohydro បានបានដឹកជញ្ជូនគ្រឿងចក្រ ដោយមានបំណងចូលទៅកាន់តំបន់សាងសង់ទំនប់វារីអគ្គីសនីស្ទឹងអារ៉ែង កាលពីថ្ងៃសុក្រសប្តាហ៍មុន ហើយបានអូសបន្លាយមកដល់ថ្ងៃចន្ទនេះ ដោយពុំទាន់មានដំណោះស្រាយណាមួយនៅឡើយទេ។ ប្រជាពលរដ្ឋដែលបាននាំគ្នាមកតវ៉ាបិទផ្លូវទាំងនោះ មកពីឃុំចំនួនបី រួមមាន ឃុំប្រឡាយ ឃុំជំនាប់ និង ឃុំដូនពៅ ស្ថិតនៅក្នុងស្រុកថ្មបាំង ខេត្តកោះកុង។
លោកអ៊ិន គង់ជិត បានបញ្ជាក់ថា នៅពេលនេះ ប្រជាពលរដ្ឋកំពុងស្ថិតនៅចំណុចក្រាំងត្រឡាច ក្នុងភូមិត្រពាំងឈើត្រាវ ឃុំឬស្សីជ្រុំ ស្រុកថ្មបាំង ត្រៀមស្ទាក់បិទផ្លូវប្រសិនបើក្រុមហ៊ុនចិន Sinohydro នៅតែមានបំណងចូលទៅកាន់តំបន់សាងសង់ទំនប់វារីអគ្គិសនីនោះ។ ក្រុមអង្កការក្រៅរដ្ឋាភិបាល បណ្តាញព្រះសង្ឃឯករាជ្យ និងសកម្មជនបរិស្ថានគ្រោងនឹងធ្វើធម្មយាត្រាពីខេត្តកោះកុង មកកាន់រាជធានីភ្នំពេញ ដើម្បីអំពាវនាវដល់រាជរដ្ឋាភិបាលឲ្យបោះបង់គម្រោងសាងសង់ទំនប់វារីអគ្គិសនីស្ទឹងអារ៉ែងនេះ។
លោក Alex Gonzalez Davison ស្ថាបនិកមួយរូបរបស់អង្គការមាតាធម្មជាតិកម្ពុជា ដែលជាអង្គការមួយផ្តួចផ្តើមគំនិតរៀបចំធ្វើធម្មយាត្រានេះ បានប្រាប់វិទ្យុបារាំងអន្តរជាតិថា គោលបំណងនៃការរៀបចំធ្វើធម្មយាត្រានេះ គឺដើម្បីចង់ឲ្យរឿងនេះល្បីទូទាំងពិភពលោក ផ្តល់ឱកាសឲ្យប្រជាពលរដ្ឋបញ្ចេញមតិយោបល់ និងអំពាវនាវដល់រាជរដ្ឋាភិបាលកម្ពុជាឲ្យបោះបង់ចោលនូវគម្រោងសាងសង់ទំនប់វារីអគ្គិសនីនេះតែម្តង។
លោកពេជ្រ ស៊ីយ៉ុន ប្រធានមន្ទីររ៉ែនិងថាមពល ខេត្តកោះកុង បានប្រាប់សារព័ត៌មានក្នុងស្រុកថា ក្រុមហ៊ុនគ្រាន់តែចង់ចូលទៅធ្វើការស្រាវជ្រាវលើគម្រោងតែប៉ុណ្ណោះ តែត្រូវប្រជាពលរដ្ឋស្ទាក់ផ្លូវមិនឲ្យចូល។
ដោយឡែក អភិបាលរងខេត្តកោះកុង លោកផៃ ធួនផ្លាមកេសន បានបញ្ជាក់ថា ក្រុមហ៊ុនចិន Sinohydro បានផ្អាកដំណើរការស្រាវជ្រាវហើយ ដោយទុកពេលឲ្យអាជ្ញាធរមូលដ្ឋានចុះជួបសម្របសម្រួលជាមួយប្រជាពលរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ