ជនពិការគ្រោងបង្កើតអាជីវកម្មកែច្នៃផលិតផលកសិកម្ម
មជ្ឈមណ្ឌលជីវិតរស់នៅ ដោយឯករាជ្យនៃជនពិការភ្នំពេញ គ្រោងនឹងបង្កើតអាជីវកម្មផលិតផលកែច្នៃកសិកម្មមួយ ដើម្បីបង្កើតការងារជូនជនពិការ។ ក្នុងពិធីសម្ពោធគម្រោងការលើកកំពស់ការងារជនពិការ ព្រឹកថ្ងៃទី៤ មិថុនានេះ នៅឯសណ្ឋាគារ អ៊ិនធឺកុងទីណុងតាល់ ប្រធានអង្គការជនពិការ បានលើកឡើងថា អាជីវកម្មនេះ នឹងអាចផ្តល់សិទ្ធអំណាច ដល់ជនពិការ និងកាត់បន្ថយភាពក្រីក្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
អាជីវកម្មកែច្នៃផលិតផលកសិកម្ម ជាបង្អែមផ្លែឈើពីអង្គការជនពិការមួយ នឹងចាប់ផ្តើមដំណើរការចាប់ពីខែកក្កដាខែក្រោយនេះតទៅ។ នេះបើតាមការបញ្ជាក់ពីមជ្ឈមណ្ឌលជីវិតរស់នៅ ដោយឯករាជ្យនៃជនពិការភ្នំពេញ។
ថ្លែងនៅក្នុងពិធីសម្ពោធគម្រោងការលើកកម្ពស់សិទ្ធិ និងការងារដល់ជនពិការ លោក ម៉ី សាម៉ីត នាយកប្រតិបត្តនៃមជ្ឈមណ្ឌល បានលើកឡើងថា អាជីវកម្មនេះ អាជីវកម្មដែលមានជំនួយទាំងបច្ចេកទេស និងជំនាញ រួមទាំងថវិកាពីប្រទេសជប៉ុននេះ គឺនឹងបង្កើតការកែច្នៃផលិតផលកសិកម្ម ដូចជាធ្វើដំណាប់ ផ្លែឈើស្ងួត បង្អែម និងទឹកផ្លែឈើជាំដើម។ លោកបានបន្តថា គម្រោងអាជីវកម្មនឹងប្រើប្រាស់តែកម្លាំងពលកម្មជនពិការតែប៉ុណ្ណោះ។
លោកនាយកប្រតិបត្តិដែលជាជនពិការរូបនេះ បានរំពឹងទុកថា គម្រោងអាជីវកម្មកែច្នៃនេះ នឹងអាចឱ្យជនពិការមានការងារធ្វើ និងរួមចំណែកកាត់បន្ថយភាពក្រីក្រនៅកម្ពុជាផងដែរ។ បើតាមលោកម៉ី សាម៉ីត ជនពិការដែលនឹងទទួលបានផលប្រយោជន៍ផ្ទាល់និងប្រយោល គឺមានប្រមាណជាង១ពាន់នាក់។ សូមបញ្ជាក់ថា គម្រោងអាជីវកម្មនេះ គឺបានចាប់ផ្តើមបង្កើត កាលពីខែមីនាឆ្នាំ២០១៤ ដល់ទៅ ខែកុម្ភៈឆ្នាំ២០១៧ ។ គម្រោងរយៈពេលបីឆ្នាំនេះ នឹងចំណាយជាទឹកប្រាក់ប្រមាណជិត៦១ម៉ឺនដុល្លារអាមេរិក។
ថ្លែងទៅកាន់អ្នកចូលរួមប្រមាណជាង ៥០នាក់ដែលរួមមានទាំងជនពិការផងនោះ រដ្ឋលេខាធិការក្រសួងសង្គមកិច្ច លោក សែម សុខាបានលើកឡើងថា គម្រោងបង្កើតការងារដល់ជនពិការនេះ គឺជាចលនាពង្រឹងពិការភាពក្នុងប្រទេសកម្ពុជាឱ្យកាន់តែរឹងមាំ តាមរយៈការបង្កើតប្រព័ន្ធសេវាជំនួយខ្លួនឯង។ ពោលគឺ ផ្តល់ឱកាសដល់ជនពិការអាចធ្វើការសម្រេចដោយឯករាជ្យរបស់ខ្លួនក្នុងជីវភាពប្រចាំថ្ងៃសំដៅជំរុញឱ្យមានការផ្លាស់ប្តូរជាវិជ្ជមាន មកលើជនពិការ និងលុបបំបាត់ជាបណ្តើរៗនូវការរើសអើង និងឧបសគ្គរារាំងទាំងឡាយ។ នេះបើតាមការបញ្ជាក់ពីលោក សែម សុខា ដដែល។
យោងតាមជំរឿនទូទៅប្រជាសាស្ត្រឆ្នាំ២០០៨ កម្ពុជាមានជនពិការប្រមាណជាង ១៩ម៉ឺន២ពាន់នាក់ ដែលស្មើនឹង១, ៤៤% នៃចំនួនប្រជាជនសរុប។ ជនពិការទូទៅនៅកម្ពុជាត្រូវបានគេមើលឃើញថា ពួកគេកំពុងតែជួបប្រទះនូការលំបាក ក្នុងការស្វែងរកការងារធ្វើ ការធ្វើដំណើរ ឱកាសចូលរួម និងទទួលរងនូវការរើសអើង ដាច់ដោយឡែកពីមនុស្សទូទៅ។
បើទោះបីជាបែបណាក៏ដោយ តំណាងមូនិធិរបស់ជប៉ុន បានស្នើឱ្យរដ្ឋាភិបាលកម្ពុជាជួយគាំពារ និងផ្តល់ចំណេះជំនាញវិជ្ជាជីវៈទៅដល់ជនពិការដើម្បីធានាបាននូវកិច្ចដំណើរនិរន្តភាពនៃអាជីវកម្មរបស់ជនពិការនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ