ទីផ្សារមូលបត្រកម្ពុជា មានក្រុមហ៊ុនចំនួនពីរហើយដែលបានចុះបញ្ជី
នៅថ្ងៃទី១០ មិថុនានេះ ក្រុមហ៊ុនហ្គ្រេនធ្វីន ដែលជាក្រុមហ៊ុនរោងចក្រកាត់ដេររបស់កោះតៃវ៉ាន់ បានចុះបញ្ជីលក់ដូរភាគហ៊ុនក្នុងទីផ្សារមូលបត្រកម្ពុជាហើយ។ ក្រុមហ៊ុននេះ គឺជាក្រុមហ៊ុនទី២ក្នុងទីផ្សារមូលប័ត្រកម្ពុជា។ ថ្លែងក្នុងសន្និសីទសារព័ត៌មាននៅវិមានកាណាឌីយ៉ា ប្រធានក្រុមហ៊ុនហ្គ្រេនបានអះអាងថា ការចូលខ្លួនក្នុងទីផ្សារមូលនេះ គឺជាឱកាសទាំងសម្រាប់ក្រុមហ៊ុន និងប្រជាពលរដ្ឋកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
ទីបំផុតទៅ មានក្រុមហ៊ុនទី២ហើយបានចុះបញ្ជីក្នុងទីផ្សារមូលបត្រកម្ពុជា ក្រោយការបើកទីផ្សារអស់រយៈពេល២ឆ្នាំកន្លងមក។ ក្រុមហ៊ុន ហ្គ្រេនធ្វីនដែលជាក្រុមហ៊ុនវាយនភណ្ឌ គឺនឹងបើកការលក់ភាគហ៊ុនរបស់ខ្លួនចំនួន២០ភាគរយនៃភាគហ៊ុនសរុបក្រុមហ៊ុន។ ហើយការលក់នេះ គឺនឹងចាប់លក់ពីថ្ងៃទី១៦មិថុនា សប្តាហ៍ក្រោយនេះតទៅ។ បើតាមការបញ្ជាក់ពីក្រុមហ៊ុន គឺមួយភាគហ៊ុនមានតម្លៃជាង ៩៦០០រៀល(៩៦៤០រៀល) នៅក្នុងនោះក្រុមហ៊ុនហ្គ្រេនធ្វីនមានដើមទុន ចំនួន៩៦លានដុល្លារ។
ប្រធានក្រុមហ៊ុនហ្គ្រេនធ្វីន លោក ឆេង តុងឈី (Mr. Chen, Tsung-Chi, Non-executive director) បានគូសបញ្ជាក់ថា ការបញ្ចូលក្រុមហ៊ុនវាយនភណ្ឌ ចូលក្នុងទីផ្សារមូលបត្រកម្ពុជានេះ គឺដោយសារតែទីផ្សារមូលបត្រកម្ពុជា ជាទីផ្សារថ្មីស្រឡាង និងមានសក្តានុពល។ ហើយតាមរយៈការប្រឡូកចូលក្នុងទីផ្សារមូលបត្រកម្ពុជា គឺនឹងអាចផ្តល់អត្ថប្រយោជន៍ចំនួនពីរយ៉ាង ដល់ភាគហ៊ុននិកដែលមានបំណងទិញហ៊ុនរបស់ក្រុមហ៊ុន និងមុខមាត់ក្រុមហ៊ុនតែវ៉ាន់នេះតែម្តង។
សូមរំលឹកជូនថា ក្រុមហ៊ុនហ្គ្រេនធ្វីនដែលបានបើកដំណើររោងចក្រនៅក្នុងទឹកដីកម្ពុជាតាំងពីឆ្នាំ២០០៦មកនោះ គឺជាក្រុមហ៊ុនទី២ហើយដែលបានដាក់ឱ្យដំណើរក្នុងទីផ្សារមូលបត្រកម្ពុជា។ ទីផ្សារមូលបត្រកម្ពុជាដែលបានចាប់បើកដំណើរការរបស់ខ្លួនតាំងពីខែមេសា ឆ្នាំ២០១២ ដោយមានក្រុមហ៊ុនតែមួយ គឺរដ្ឋករទឹកស្វ័យតក្រុងភ្នំពេញ។
អគ្គនាយកទីផ្សារមូលបត្រកម្ពុជា លោកហុង សុហួរ ក៏បានទទួលស្គាល់ផងដែរចំពោះដំណើរការស្ពឹកស្រពន់នៃទីផ្សារមូលបត្រកម្ពុជា។ កង្វះបទពិសោធន៍ក្នុងវិស័យមូលបត្រកម្ពុជាដែលថ្មីស្រឡាងសម្រាប់ប្រជាជនកម្ពុជា និង បញ្ហាបទបញ្ញត្តិដែលមានសណ្ឋានផ្សេងៗគ្នា ដែលត្រូវសិក្សាបន្ថែម និងបណ្តុះបណ្តាល គឺជាមូលហេតុសំខាន់ផងដែរ។
សូមបញ្ជាក់ថា ក្រៅពីការចុះបញ្ជីពីក្រុមហ៊ុនហ្គ្រេនធ្វីន ក្នុងទីផ្សារមូលបត្រកម្ពុជា ក្រុមហ៊ុនប្រមាណជាង១០ផ្សេងទៀតគឺកំពុងតែពិចារណាចូលក្នុងទីផ្សារផងដែរ។ បើតាមអគ្គនាយកមូលបត្រកម្ពុជា លោកហុង សុហួរ នៅចុងឆ្នាំ២០០១៤នេះ នឹងមានក្រុមហ៊ុនមួយផ្សេងទៀតនឹងចុះក្នុងបញ្ជីទីផ្សារ ខណៈដែលផែស្វ័យតក្រុងភ្នំពេញ និងផែក្រុងព្រះសីហនុ គឺកំពុងតែរៀបចំឯកសាររបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ