អង្ករកម្ពុជា ពិបាកប្រកួតប្រជែងលើទីផ្សារអន្តរជាតិ ដោយសារតែថ្លៃផលិតខ្ពស់
ចុះផ្សាយនៅថ្ងៃ៖
ស្តាប់ - ០៤:១៧
កម្ពុជាមានគោលដៅចង់ក្លាយជាប្រទេសនាំចេញអង្ករដ៏ធំមួយ ហើយកម្ពុជាជាប្រទេសដែលមានសក្តានុពលខ្ពស់ក្នុងការផលិតអង្ករសម្រាប់នាំចេញ។ ក៏ប៉ុន្តែ ឧបសគ្គដ៏ធំមួយ ដែលធ្វើឲ្យអង្ករកម្ពុជាមានការពិបាកក្នុងការជ្រៀតចូលទៅក្នុងទីផ្សារអន្តរជាតិ គឺតម្លៃ ហើយអង្ករកម្ពុជាមានតម្លៃខ្ពស់ជាងគូប្រជែង គឺដោយសារតែថ្លៃដើមក្នុងការផលិតមានកម្រិតខ្ពស់។ តើហេតុអ្វីបានការផលិតអង្ករនៅកម្ពុជាមានតម្លៃថ្លៃបែបនេះ?
ថ្លៃដើមនៃការផលិតអង្ករនៅកម្ពុជាមានកម្រិតខ្ពស់ គឺបណ្តាលមកពីកត្តាច្រើនយ៉ាង ដែលមាននៅស្ទើរតែគ្រប់សង្វាក់ផលិតកម្ម ចាប់តាំងពីការដាំដុះនិងប្រមូលផល ការកិនជាអង្ករ រហូតដល់ការដឹកជញ្ជូនអង្ករ ដើម្បីយកទៅលក់នៅក្រៅប្រទេស។
បញ្ហាទីមួយ គឺការចំណាយទៅលើការទិញជីដាក់ស្រែ។ នៅក្នុងការបង្កបង្កើនផលស្រូវ ការចំណាយប្រមាណពី ២៣% ទៅ ៣៧% គឺចំណាយទៅលើជី ហើយបញ្ហាដែលចោទសម្រាប់កម្ពុជា គឺជីខ្វះគុណភាព។ ការណ៍ដែលរដ្ឋាភិបាលកំណត់កូតាលើការនាំចូលជីពីបរទេស បូករួមជាមួយនឹងកង្វះប្រសិទ្ធភាព ឬអំពើពុករលួយនៅក្នុងការត្រួតពិនិត្យតាមច្រកព្រំដែន ធ្វើឲ្យជីមួយផ្នែកធំ ដែលនាំចូលមកលក់នៅលើទីផ្សារកម្ពុជា គឺជាជីក្លែងក្លាយ ឬជីដែលមានគុណភាពអន់ តែមានតម្លៃខ្ពស់។ ការទិញប៉ះជីក្លែងក្លាយ ឬជីដែលគ្មានគុណភាពនេះ គឺជាបន្ទុកដ៏ធ្ងន់មួយ ទៅលើការចំណាយក្នុងការដាំស្រូវ។
បន្ទុកដ៏ធ្ងន់មួយទៀត គឺតម្លៃប្រេង ដែលមានកម្រិតខ្ពស់ បើធៀបទៅនឹងប្រទេសជិតខាង។ នៅក្នុងប្រទេសកម្ពុជា ដោយសារតែការខ្វះខាតប្រព័ន្ធធារាសាស្រ្ត ការស្រោចស្រពដីស្រែត្រូវពឹងផ្អែកខ្លាំងលើការប្រើម៉ាស៊ីនបូមទឹក ហើយដោយសារតែប្រេងថ្លៃ ការចំណាយលើការបូមទឹកស្រោចស្រពដីស្រែក៏ត្រូវមានកម្រិតខ្ពស់។
ម្យ៉ាងទៀត តម្លៃប្រេងមិនមែនគ្រាន់តែជាបន្ទុកលើការចំណាយក្នុងការដាំស្រូវប៉ុណ្ណោះទេ តែវាក៏ជាបន្ទុកដ៏ធ្ងន់មួយដែរទៅលើដំណើរការកិនស្រូវជាអង្ករ នេះក៏ដោយសារតែប្រព័ន្ធផ្គត់ផ្គង់អគ្គិសនីនៅក្នុងប្រទេសកម្ពុជានៅមានការខ្វះខាតច្រើននៅឡើយ។ ថ្លៃអគ្គិសនីមានកម្រិតខ្ពស់ បើធៀបទៅនឹងប្រទេសជិតខាង។ ឧទាហរណ៍ បើធៀបនឹងវៀតណាម ដែលជាប្រទេសគូប្រជែងរបស់កម្ពុជានៅលើទីផ្សារអង្ករអន្តរជាតិ ថ្លៃភ្លើងនៅកម្ពុជាមានកម្រិតខ្ពស់ជាងនៅវៀតណាម ពី ២ដង ទៅ៩ដង អាស្រ័យទៅតាមទីកន្លែង។ ម្យ៉ាងទៀត ការផ្គត់ផ្គង់អគ្គិសនៅនៅកម្ពុជាក៏មិនមានភាពទៀងទាត់គួរជាទីទុកចិត្ត។
បើនិយាយឲ្យស្រួលស្តាប់ នៅកម្ពុជា ថ្លៃភ្លើងខ្ពស់ ហើយឧស្សាហ៍ដាច់ ដែលជាហេតុធ្វើឲ្យរោងម៉ាស៊ីនកិនស្រូវនីមួយៗត្រូវមានម៉ាស៊ីនភ្លើងផ្ទាល់ខ្លួនជាចាំបាច់។ ជាលទ្ធផល គ្រាន់តែការចំណាយលើការទិញប្រេងមួយមុខ មានរហូតដល់ទៅជាង ៣០% នៃការចំណាយសរុបលើដំណើរការកិនស្រូវជាអង្ករ (យោងតាមការសិក្សារបស់អង្គការ JICA កាលពីឆ្នាំ២០១២)។
បន្ទុកដ៏ធ្ងន់មួយទៀត ទៅលើថ្លៃផលិតអង្ករនៅកម្ពុជា គឺការខ្វះខាតហេដ្ឋារចនាសម្ព័ន្ធដឹកជញ្ជូន ដែលជាហេតុបណ្តាលឲ្យការដឹកជញ្ជូនត្រូវចំណាយលុយច្រើន ទាំងការដឹកជញ្ជូនស្រូវពីស្រែមកម៉ាស៊ីនកិនស្រូវ និងការដឹកអង្ករពីម៉ាស៊ីនកិនស្រូវ ដើម្បីនាំចេញទៅលក់នៅបរទេស។ នៅកម្ពុជា ដើម្បីដឹកជញ្ជូនស្រូវ ឬអង្ករ ចំនួន ១តោន ក្នុងចម្ងាយផ្លូវ ១០០គីឡូម៉ែត្រ គេត្រូវចំណាយរហូតដល់ទៅ ១៥ដុល្លារ ពោលគឺ ត្រូវចំណាយច្រើនជាងនៅវៀតណាម និងថៃ រហូតដល់ទៅ ២ ទៅ៤ដង។ វៀតណាម និងថៃ ដែលសុទ្ធសឹងជាគូប្រជែងដ៏ធំរបស់កម្ពុជា នៅក្នុងវិស័យនាំចេញអង្ករ។
បញ្ហាដ៏ធំមួយទៀត ដែលធ្វើឲ្យថ្លៃផលិតអង្ករនៅកម្ពុជាមានកម្រិតខ្ពស់ គឺអត្រាការប្រាក់។ នៅកម្ពុជា អត្រាការប្រាក់អាចមានរហូតទៅដល់ ៥% ក្នុងមួយខែ (ដល់ទៅជិត ៨០% បើគិតជាអត្រាប្រចាំឆ្នាំ) ដែលជាអត្រាមួយខ្ពស់បំផុត។
គួរបញ្ជាក់ថា ការផលិតអង្ករ គឺជាសកម្មភាពផលិត ដែលត្រូវការដើមទុនច្រើន។ ការសិក្សារបស់អ្នកជំនាញ កាលពីឆ្នាំ២០១០ បង្ហាញថា ដើម្បីអាចផលិតអង្ករនាំចេញឲ្យបាន ១លានតោន ក្នុងមួយឆ្នាំ ទៅតាមគោលដៅរបស់រដ្ឋាភិបាលកម្ពុជា រោងចក្រកិនស្រូវនៅទូទាំងប្រទេសត្រូវការដើមទុនប្រមាណជា ៤៧០លានដុល្លារ ដើម្បីទិញស្រូវយកមកកិន និងប្រមាណជា ២០០លានដុល្លារផ្សេងទៀត ដើម្បីចំណាយទៅលើដំណើរការកិនស្រូវ។ តម្រូវការទុនយ៉ាងច្រើនបែបនេះ មានន័យថា តម្រូវការឥណទានពីធនាគារក៏មានច្រើនផងដែរ។ ប្រសិនបើអត្រាការប្រាក់មានកម្រិតខ្ពស់ វាប្រាកដជានឹងធ្វើឲ្យការផលិតអង្ករត្រូវចំណាយថ្លៃដើមកាន់តែខ្ពស់ទៅតាមនោះដែរ។
ចំណាយទៅលើថ្លៃដើមក្នុងការផលិតខ្ពស់នេះធ្វើឲ្យអង្កររបស់កម្ពុជាត្រូវលក់ក្នុងតម្លៃថ្លៃ ដែលជាហេតុនាំឲ្យកម្ពុជា ដែលជាប្រទេសចំណុលថ្មីផង មានការពិបាកក្នុងការជ្រៀតចូលទៅក្នុងទីផ្សារអង្ករអន្តរជាតិ ជាពិសេស គឺពិបាកក្នុងការប្រកួតប្រជែងជាមួយនឹងប្រទេសជិតខាងទាំងពីរ គឺថៃ និងវៀតណាម ដែលជាប្រទេសបានចាក់ឫសយ៉ាងជ្រៅនៅក្នុងទីផ្សារអង្ករអន្តរជាតិរួចទៅហើយផង ហើយថ្លៃដើមក្នុងការផលិតក៏មានកម្រិតទាបជាងកម្ពុជាផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ