ភាពរាំងស្ងួត បានកើតមាននៅពេលខេត្តមួយចំនួននៅលិចទឹកនៅឡើយ
ខេត្តកំពង់ចាមមានមនុស្សស្លាប់ច្រើនជាងគេ នៅពេលដែលទឹកជំនន់ បានជន់លិច ជាងមួយសប្តាហ៍កន្លងទៅនេះ។គណៈកម្មាធិការគ្រប់គ្រងគ្រោះមហន្តរាយ បានកត់សម្គាល់ថាទឹកបានចាប់ផ្តើមស្រកទៅវិញហើយ ក៏ប៉ុន្តែការស្រកមានលក្ខណៈយឺត។ ស្របពេលដែលមានទឹកជំនន់នាពេលនេះ គ្រោះរាំងស្ងួត ក៏បានកើតឡើងផងដែរ នៅតាមខេត្តមួយចំនួន។
ចុះផ្សាយនៅថ្ងៃ៖
ស្តាប់ - ០២:១៧
ចំនួនអ្នកស្លាប់ដោយសារទឹកជំនន់មកទល់ពេលមាន ២៩នាក់ហើយ ក្នុងនោះ ៦០ភាគរយជាកុមារ ដែលចូលចិត្តលេងសប្បាយជាមួយទឹក ហើយខេត្តកំពង់ចាមមានមនុស្សស្លាប់ច្រើនជាងគេរហូតទៅដល់ ១១នាក់។
លោកទេសរដ្ឋមន្ត្រី ញឹម វណ្ណដា អនុប្រធានទីមួយនៃគណៈកម្មាធិការជាតិគ្រប់គ្រងគ្រោះមហន្តរាយ បានថ្លែងប្រាប់វិទ្យុបារាំង RFI នៅថ្ងៃនេះថា ទឹកបានចាប់ផ្តើមស្រកជាបណ្តើរៗហើយ។ ជាការកត់សម្គាល់ នៅឆ្នាំនេះស្ថានភាពទឹកជំនន់ បានស្រកទៅវិញយឺតៗ ដោយសារច្រកទឹក ដែលហូរចេញមានទ្រង់ទ្រាយតូច ជាហេតុធ្វើឲ្យមានការលិចលង់កាន់តែយូរថ្ងៃ។
ជាសរុបទឹកជំនន់នៅបន្តលិចលើ ១២រាជធានី-ខេត្ត នៅឡើយ ក្នុងនោះមាន ៦២ស្រុក-ខណ្ឌរងផលប៉ះពាល់ រួមមានប្រជាជនចំនួនជាង ៨ សែន ៣ម៉ឺនគ្រួសារ និងផ្ទះចំនួន ៨ម៉ឺនខ្នង។ ជាមួយគ្នានេះមានប្រជាជនជាង ១ម៉ឺន ១ពាន់គ្រួសារត្រូវបានជន្លៀសទៅកាន់ទីទួលសុវត្ថិភាព។
ទន្ទឹមគ្នានេះភាពរាំងស្ងួត ក៏បានកើតមានដែរ គឺមាន ៨ស្រុកនៅខេត្តកំពង់ស្ពឺគ្របដណ្តប់លើផ្ទៃដី ប្រមាណជា ៦ពាន់ហិកតា និង ៩ស្រុកនៅខេត្តតាកែវ មានផ្ទៃដីជិត ២ម៉ឺនហិកតា ដែលមិនមានទឹកធ្វើស្រែ ហើយសំណាបងាប់ទាំងអស់។
លោក ញឹម វណ្ណដា បន្តថាក្រសួងធនធានទឹកបានដោះស្រាយប្រលាយឲ្យហើយតែមិនមានទឹកទៅដល់ ហើយទឹកភ្លៀងក៏មិនមានធ្លាក់ ផងដែរក្នុងរយៈពេលប៉ុន្មានសប្តាហ៍ចុងក្រោយនេះ។
ជាមួយគ្នានេះលោក គឹម រតនា ប្រធានអង្គការការីតាសកម្ពុជា ដែលជាអង្គការគ្រិស្តសាសនាមួយជួយទៅដល់គ្រោះមហន្តរាយជាច្រើនឆ្នាំមកហើយនោះ បានឲ្យដឹងថា អង្គការរបស់លោក បានត្រៀមសំភារៈ និងបច្ចេកទេសជាច្រើនក្នុងការចូលរួមបង្ការគ្រោះមហន្តរាយនេះ។ក្នុងនោះមានទូកម៉ាស៊ីន បង្គន់អនាម័យចល័ត កៅស៊ូតង់ ជាដើម។
លោក គឹម រតនា ប្រកាសថា អង្គការការីតាសកម្ពុជា នឹងធ្វើការចែកទូកម៉ាស៊ីនចំនួន ១១គ្រឿងបន្ថែមទៀត នៅថ្ងៃព្រហស្បតិ៍ស្អែក នៅខេត្តកណ្តាល ដល់ខេត្តជាគោលដៅមួយចំនួន ដែលដើម្បីជាជំនួយ ដល់ក្រុមការងារជួយសង្គ្រោះថ្នាក់ឃុំ នៃខេត្តនីមួយ។
នៅឆ្នាំនេះការបង្ការគ្រោះមហន្តរាយទឹកជំនន់មានលក្ខណៈល្អប្រសើជាងឆ្នាំកន្លងទៅ ដោយមានការឆ្លើយតបទាន់ពេលវេលា ទាំងថ្នាក់មូលដ្ឋាន ហើយប្រជាជនក៏មានការប្រុងប្រយ័ត្នខ្ពស់ជាងមុន នេះបើតាមលោក គីម រតនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ