ឯករាជ្យភាព គ.ជ.ប នៅតែជាចំណោទពិបាកដោះស្រាយ
ចុះផ្សាយនៅថ្ងៃ៖
ស្តាប់ - ០៥:០០
កិច្ចចរចា រវាងក្រុមបច្ចេកទេសនៃគណបក្សជាប់ឆ្នោតទាំងពីរ បានបន្តធ្វើ កាលពីថ្ងៃចន្ទម្សិលមិញ ដើម្បីកែទម្រង់គណៈកម្មាធិការជាតិរៀបចំការបោះឆ្នោត។ បើទោះបីជាចំណុចភាគច្រើន ត្រូវបានគណបក្សទាំងពីរស្រុះស្រួលគ្នាហើយក៏ពិតមែន ក៏ប៉ុន្តែ ចំណុចដែលនៅសេសសល់សុទ្ធតែជាចំណុចគន្លឹះ ដែលគណបក្សទាំងពីរទំនងជាពិបាករកច្រកចេញ។ ម្យ៉ាងទៀត បើទោះជាចេញរួចក៏រូបភាព គ.ជ.ប ថ្មី ទំនងជាពិបាកបង្ហាញថាខ្លួនជាស្ថាប័នឯករាជ្យដែរ។ ចំណោទស្តីពីឯករាជ្យភាព គ.ជ.ប នៅតែជាបញ្ហាធំធេងមួយ បើទោះជាមានការជឿនលឿនខ្លះ ក្នុងកិច្ចចរចា រវាងគណបក្សជាប់ឆ្នោតទាំងពីរក៏ដោយ។
កិច្ចចរចាថ្នាក់បច្ចេកទេសរវាងគណបក្សប្រជាជនកម្ពុជានិងគណបក្សសង្គ្រោះជាតិស្តីពីបញ្ហា គ.ជ.ប បានជឿនលឿនទៅមុខ ប៉ុន្តែ គេក៏អាចនិយាយបានថា កិច្ចពិភាក្សាកំពុងឈានដល់ចូលដល់ចំណុចយុទ្ធសាស្ត្រហើយ។ តើអ្នកណាជាប្រធាន គ.ជ.ប ថ្មី? តើអ្នកណាជាអគ្គលេខាធិការ? និងថាតើការតែងតាំងសមាជិកថ្នាក់ក្រោមជាតិធ្វើឡើងយ៉ាងដូចម្តេច? ទាំងអស់នេះជាសំណួរពីរបីក្នុងចំណោមសំណួរសំខាន់ជាងគេបំផុតដែលបក្សទាំងពីរពិបាករកចម្លើយរួម។
ជាការពិតណាស់ បើនិយាយពីបរិមាណគឺចំណុចដែលបានត្រូវរ៉ូវគ្នាមានភាគច្រើនលើសលប់ នៅក្នុងសេចក្តីព្រាងច្បាប់ដែលមាន៧ជំពូកនិង៦៦ មាត្រា។ ប៉ុន្តែ បើនិយាយអំពីខ្លឹមសារវិញ ចំណុចដែលនៅសេសសល់សុទ្ធសឹងជាចំណុចយុទ្ធសាស្ត្រដែលគណបក្សទាំងពីរត្រូវប្រឈមមុខដាក់គ្នាយ៉ាងតឹងតែង។
មានសេណារីយោសំខាន់ពីរដែលអាចនឹងកើតឡើងនៅពេលខាងមុខ៖
សេណារីយោទី១៖ កិច្ចពិភាក្សាអាចជាប់គាំងដោយសារតែគណបក្សទាំងពីរឈរលើចំណុចយុទ្ធសាស្ត្ររៀងៗខ្លួន។ ប្រសិនបើលទ្ធភាពនេះអាចកើតមានមែន រាត្រីទឹកឃ្មុំរវាងគណបក្សប្រជាជននិងសង្គ្រោះជាតិនឹងត្រូវបញ្ចប់ហើយបក្សជាប់ឆ្នោតទាំងពីរនឹងបន្តធ្វើសង្គ្រាមពាក្យសម្តីហែកហួរគ្នាជាបន្តទៀតជុំវិញកំណែទម្រង់ គ.ជ.ប។ ក្នុងករណីដែលការជាប់គាំងអូសបន្លាយយូរ គ.ជ.ប ចាស់ច្បាស់ជានឹងទទួលរ៉ាប់រងក្នុងការរៀបចំការបោះឆ្នោតដដែល។
សេរីណារីយោទី២៖ ប្រសិនបើគណបក្សទាំងពីរមិនចង់ឲ្យមានការប្រឈមមុខដាក់គ្នាជាថ្មីហើយខំសម្របសម្រួលឲ្យអស់លទ្ធភាពនោះ គ.ជ.ប ថ្មីទំនងជាអាចចេញរួច។ ចេញរួចអាចតាមរូបភាពពីរយ៉ាង៖ ម្យ៉ាងគឺចេញតាមរូបមន្ត គណបក្សប្រជាជនធ្វើប្រធាន គណបក្សសង្គ្រោះជាតិអនុប្រធាន។ រូបមន្តនេះ បើទោះជាចេញរួចមែនតែមិនសូវល្អមើលសោះដោយសារថា តើគេអាចនិយាយថា គ.ជ.ប ជាស្ថាប័នឯករាជ្យម្តេចនឹងកើតបើក្បាលម៉ាស៊ីនដឹកនាំជាមនុស្សចេញមកពីគណបក្សនយោបាយ ចំណែកឯបេក្ខជនមកពីសង្គមស៊ីវិលដែលគណបក្សទាំងពីរយល់ថា«ឯករាជ្យ»និងដែលសាធារណមតិជាទូទៅក៏ទទួលយកបានថា«ឯករាជ្យ»ដែរនោះបែរជាគ្មានតួនាទីអ្វីទៅវិញ?
ម្យ៉ាងទៀត នៅសល់រូបមន្តចុងក្រោយមួយដែលល្អមើលជាងគេ តែប្រហែលជាពិបាកសង្ឃឹមថាទៅរួច នោះគឺការផ្តល់សិទ្ធិឲ្យបេក្ខជនទី៩ដែលជ្រើសរើសចេញពីសង្គមស៊ីវិលធ្វើជាប្រធាន គ.ជ.ប ថ្មី។ ប្រសិនបើលទ្ធភាពនេះអាចចេញរួចមែននោះអាចចាត់ទុកជាប្រវត្តិសាស្ត្រថ្មីមួយសម្រាប់ការបោះឆ្នោតនៅកម្ពុជា ហើយ គ.ជ.ប ថ្មីក៏នឹងមានរូបភាពឯករាជ្យខុសពីមុនដែរ។ ប៉ុន្តែ រូបមន្តនេះទំនងជាអាចមាន«សំណាងមួយក្នុងមួយម៉ឺនគ្រោះថ្នាក់តែប៉ុណ្ណោះ»។
ជាការពិតណាស់ ទាំងគណបក្សប្រជាជនកម្ពុជា ទាំងគណបក្សសង្គ្រោះជាតិសុទ្ធតែអះអាងថា ខ្លួនចង់បាន គ.ជ.ប មួយឯករាជ្យ។ សម្រាប់គណបក្សប្រជាជនកម្ពុជា បើមាន គ.ជ.ប មួយ«ឯករាជ្យ» គណបក្សនេះអាចចៀសផុតពីការចោទប្រកាន់ថា ខ្លួនជាអ្នកលួចបន្លំសន្លឹកឆ្នោត និងក៏អាចបញ្ចៀសវិបត្តិនយោបាយក្រោយការបោះឆ្នោតផងដែរ។ ចំណែកគណបក្សសង្គ្រោះជាតិក៏មានប្រយោជន៍ពី គ.ជ.ប ឯករាជ្យដែរនោះគឺការអស់មន្ទិលសង្ស័យថាមានអ្នកណាជាអ្នកលួចបន្លំសន្លឹកឆ្នោតតទៅទៀត ហើយវាក៏ជាម៉ែតសម្រាប់វាស់ស្ទង់ថា តើបក្សប្រឆាំងមួយនេះមានអ្នកគាំទ្រប៉ុន្មានឲ្យបានពិតប្រាកដ។
ដូច្នេះ ប្រសិនបើគ្រប់គ្នាសុទ្ធតែទទួលផលប្រយោជន៍ពី គ.ជ.ប ឯករាជ្យ និងប្រសិនបើគណបក្សនយោបាយនីមួយៗមិនចង់ប្រើប្រាស់ គ.ជ.ប ដើម្បីបម្រើផលប្រយោជន៍នយោបាយរបស់ខ្លួនទេនោះ តើហេតុអ្វីបានជាគេមិនហ៊ានធ្វើឲ្យ គ.ជ.ប មានរូបភាព«ឯករាជ្យ»? ពិតហើយថា ពាក្យថា ឯករាជ្យពិបាកនឹងយកអ្វីមកវាស់ស្ទង់ណាស់ ប៉ុន្តែ យ៉ាងហោចការផ្តល់តួនាទីដឹកនាំរបស់ស្ថាប័ននេះដល់បេក្ខជនទី៩អាចបង្ហាញរូបភាព«ឯករាជ្យ»គ្រាន់បើជាងការដឹកនាំដែលចេញពីបក្សនយោបាយដែរ។
ផ្ទុយទៅវិញ ប្រសិនបើ គ.ជ.ប ថ្មី គ្មានអ្វីខុសប្លែកពីមុនទេនោះ វិបត្តិក្រោយការបោះឆ្នោតប្រាកដជាមិនអាចបញ្ចប់បានទេ។ ការចោទប្រកាន់អំពីការលួចបន្លំសន្លឹកឆ្នោតនៅតែមានពីព្រោះ គ.ជ.ប ដែលដឹកនាំដោយមនុស្សចេញមកពីគណបក្សនយោបាយងាយណាស់នឹងផ្តល់លេសសម្រាប់ការតវ៉ាអំពីភាពលម្អៀងឬការលួចបន្លំសន្លឹកឆ្នោតក្នុងបរិបទដែលអ្នកនយោបាយខ្មែរមិនទាន់ប្រកាន់ចិត្តជាកីឡាករបាននៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ