លោកហោ ណាំហុងកោះប្រជុំជាមួយទូតបរទេសដោយមិននិយាយពីស្ថានភាពកម្ពុជា
លោកហោ ណាំហុង ឧបនាយករដ្ឋមន្ត្រី រដ្ឋមន្ត្រីការបរទេស បានជួបប្រជុំជាមួយឯកអគ្គរាជទូត និងឯកអគ្គរដ្ឋទូត ចំនួន ២៧ ប្រចាំកម្ពុជា នាព្រឹកថ្ងៃពុធ ទី២៦វិច្ឆិកានេះ។ កិច្ចប្រជុំរយៈពេល ៣០ នាទី នៅទីស្តីការក្រសួងការបរទេស ក្នុងរាជធានីភ្នំពេញ គឺលោកប្រមុខការទូតកម្ពុជា បានសង្ខេបឡើងវិញពីលទ្ធផលនៃកិច្ចប្រជុំកំពូលអាស៊ាន នៅប្រទេសភូមា កាលពីដើមខែវិច្ឆិកានេះ។ លោកហោ ណាំហុង ក៏បានប្រកាសពីជំហររបស់កម្ពុជា ដែលពេញចិត្ត ធ្វើឲ្យសំរេចបាននូវសហគមន៍អាស៊ានតែមួយ នៅឆ្នាំ២០១៥។ ចំណែកបញ្ហាផ្ទៃក្នុងកម្ពុជា ដែលរួមមានការចាប់ខ្លួនសកម្មជនគណបក្សសង្គ្រោះជាតិ សកម្មជនដីធ្លី ព្រមទាំងព្រះសង្ឃ យកទៅកាត់ទោស ជាដើមនោះ មិនត្រូវបានលើកឡើងទេ។
ចុះផ្សាយនៅថ្ងៃ៖
ស្តាប់ - ០១:៥៧
ឯកអគ្គរាជទូត និងឯកអគ្គរដ្ឋទូត ចំនួន ២៧ ប្រទេស ប្រចាំនៅកម្ពុជា បានជួបប្រជុំ ជាមួយប្រមុខការទូតកម្ពុជា លោក ហោ ណាំហុង នាព្រឹកថ្ងៃពុធ ទី២៦វិច្ឆិកានេះ។ កិច្ចប្រជុំដោយបិទទ្វារ រយៈពេលខ្លី តែប្រមាណ ៣០ នាទី នៅក្រសួងការបរទេស គឺលោកប្រមុខការទូតកម្ពុជា បានលើកឡើងដោយសង្ខេប ទៅកាន់តំណាងប្រទេសជាមិត្ត ប្រចាំកម្ពុជា រួមមាន៖ ឯកអគ្គរដ្ឋទូតអាមេរិក ទូតជប៉ុន និងឯកអគ្គរដ្ឋទូតសហភាពអឺរ៉ុប ជាដើម អំពីលទ្ធផលនៃកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធដទៃទៀត ដែលទើបតែបិទបញ្ចប់ នៅប្រទេសភូមា កាលពីថ្ងៃទី១១ និងថ្ងៃទី១២វិច្ឆិកា។
លោក កុយ គួង អ្នកនាំពាក្យក្រសួងការបរទេស បានប្រាប់ក្រុមអ្នកកាសែតថា ក្រៅពីបង្ហាញដោយសង្ខេបពីលទ្ធផលកិច្ចប្រជុំកំពូលអាស៊ាន លើកទី២៥ និងកិច្ចប្រជុំកំពូលពាក់ព័ន្ធសំខាន់ៗ សរុប ១០ កិច្ចប្រជុំ នៅប្រទេសភូមា លោក ហោ ណាំហុង ក៏បានបញ្ជាក់ពីជំហររបស់កម្ពុជា ពាក់ព័ន្ធនឹងកិច្ចប្រជុំកំពូល នោះគឺកម្ពុជាពេញចិត្តធ្វើយ៉ាងណា ឲ្យសំរេចបាននូវសហគមន៍អាស៊ានតែមួយ នៅឆ្នាំ២០១៥ ដោយមានកិច្ចសហការរវាងបណ្តាប្រទេសអាស៊ានទាំង ១០ និងប្រទេសដៃគូទាំងអស់។
ក្នុងកិច្ចប្រជុំរវាងរដ្ឋមន្ត្រីការបរទេសកម្ពុជា ជាមួយឯកអគ្គរដ្ឋទូត ឯកអគ្គរាជទូតទាំងអស់ប្រចាំកម្ពុជា នៅព្រឹកថ្ងៃពុធនេះ លោក កុយ គួង បានបញ្ជាក់ថា បញ្ហាចាប់ខ្លួនសកម្មជនសិទ្ធិមនុស្ស សកម្មជនដីធ្លី សកម្មជនគណបក្សសង្គ្រោះជាតិ រួមទាំងព្រះសង្ឃ យកទៅកាត់ទោស ដាក់ពន្ធនាគារ នាពេលថ្មីនេះ គឺមិនមានលើកឡើងទេ។
ចេញពីកិច្ចប្រជុំ លោក ហ្វ្រង់ស័រ កូតាំង ឯកអគ្គរដ្ឋទូតសហភាពអឺរ៉ុប ប្រចាំកម្ពុជា បានបញ្ជាក់ថា កិច្ចប្រជុំនៅព្រឹកនេះ លោកហោណាំហុង បង្ហាញដោយសង្ខេបពីលទ្ធផល នៃកិច្ចប្រជុំកំពូលអាស៊ាន។ ចំណែកស្ថានភាពនយោបាយនៅកម្ពុជា រួមទាំងការចាប់ខ្លួនសកម្មជន នាពេលថ្មីៗនេះ មិនត្រូវបានលើកឡើង ហើយបណ្តាអង្គទូត ក៏មិនសួរនាំអ្វីនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ