ប្រធានាធិបតីវៀតណាម សុំឲ្យកម្ពុជាជួយការពារជនជាតិរបស់ខ្លួន
លោកជ្រឿង តឹងសាង ប្រធានាធិបតីវៀតណាមបានមកដល់ភ្នំពេញនៅព្រឹកថ្ងៃអង្គារទី២៣ធ្នូនេះក្នុងដំណើរទស្សនកិច្ចរយៈពេលពីរថ្ងៃនៅកម្ពុជា។ ក្នុងថ្ងៃទី១នៃដំណើរទស្សនកិច្ចនេះ ប្រមុខរដ្ឋវៀតណាមបានចូលគាល់ព្រះមហាក្សត្រ សម្តេចព្រះបរមនាថ នរោត្តម សីហមុនី និងបានជួបពិភាក្សាជាមួយមេដឹកនាំស្ថាប័នកំពូលៗរបស់កម្ពុជាផងដែរ។ លោកបានសុំឲ្យកម្ពុជាជួយការពារជនជាតិវៀតណាមដែលកំពុងរស់នៅនិងប្រកបរបរនៅលើទឹកដីកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ប្រធានាធិបតីវៀតណាម លោក ជ្រឿង តឹងសាង ( Truong Tan Sang) បានមកដល់ភ្នំពេញកាលពីព្រឹកថ្ងៃអង្គារទី ២៣ ធ្នូនេះហើយបានបង្ហួសទៅកាន់ព្រះបរមរាជវាំងដើម្បីគាល់ព្រះមហាក្សត្រ សម្តេចព្រះបរមនាថ នរោត្តម សីហមុនី។ បន្ទាប់មកប្រធានាធិបតីវៀតណាមបានមកគោរពវិញ្ញាណក្ខន្ធនៅមុខស្តូបយុទ្ធជនវៀតណាម គោរពព្រះបរមរូបសម្តេចព្រះ នរោត្តម សីហនុ និងគោរពវិញ្ញាណក្ខន្ធបុព្វបុរសខ្មែរអ្នកស្នេហាជាតិនៅឯវិមានឯករាជ្យផងដែរ។
នៅរសៀលថ្ងៃដដែលនេះ លោកជ្រឿង តឹងសាង បានជួបពិភាក្សាជាមួយលោក ហេង សំរិន ប្រធានរដ្ឋសភា លោក នាយករដ្ឋមន្ត្រី ហ៊ុន សែន និងលោក ជា ស៊ីម ប្រធានព្រឹទ្ធសភា។ ប្រមុខរដ្ឋវៀតណាមបានសុំឲ្យកម្ពុជាការពារជនជាតិវៀតណាមដែលកំពុងរស់នៅនិងប្រកបអាជីវកម្មនៅលើទឹកដីកម្ពុជាស្របតាមច្បាប់អន្តរជាតិ។ភាគីទាំងពីរគ្រោងចេញសេចក្តីថ្លែងការណ៍រួមគ្នាមួយនៅចុងបញ្ចប់នៃដំណើរទស្សនកិច្ចនេះ។
ដំណើរទ្សនកិច្ចរបស់ប្រមុខរដ្ឋនៃទីក្រុងហាណូយមកកាន់កម្ពុជាធ្វើឡើងតាមការអញ្ជើញរបស់ព្រះមហាក្សត្រ សម្តេចព្រះបរមនាថ នរោត្តម សីហមុនី។ ការមកដល់របស់លោក ជ្រឿង តឹងសាង ក៏បានកើតឡើងស្របពេលដែលជនជាតិម៉ុងតាញ៉ា១៣នាក់បានរត់ភៀសខ្លួនមកកម្ពុជាដើម្បីសុំសិទ្ធិជ្រកកោននយោបាយ។ ទស្សនកិច្ចនេះក៏បានកើតឡើងបន្ទាប់ពីបាតុកម្មទាមទារឲ្យអ្នកនាំពាក្យស្ថានទូតវៀតណាមប្រចាំទីក្រុងភ្នំពេញទទួលស្គាល់ប្រវត្តិសាស្ត្រពិតនៃកម្ពុជាក្រោមទើបតែបានស្ងប់ស្ងាត់មួយរយៈ។
យ៉ាងណាក៏ដោយ លោកថាច់ សេដ្ឋា ប្រធានសមាគមខ្មែរកម្ពុជាក្រោមបានជំរុញឲ្យរដ្ឋាភិបាលកម្ពុជាលើកយកបញ្ហាខ្មែរក្រោមទៅពិភាក្សាជាមួយសមភាគីវៀតណាម។ លោកថាច់ សេដ្ឋា អះអាងថា លោកបានផ្ញើលិខិតមួយច្បាប់ទៅកាន់លោកនាយករដ្ឋមន្ត្រី ហ៊ុន សែន កាលពីថ្ងៃទី១៩ធ្នូ ដោយសុំឲ្យប្រមុខរដ្ឋាភិបាលកម្ពុជាលើកបញ្ហាដែលខ្មែរក្រោមទាមទារឲ្យវៀតណាមទទួលស្គាល់ប្រវត្តិសាស្ត្រពិត និងសុំឲ្យទីក្រុងហាណូយគោរពសិទ្ធសរីភាព និងជំនឿសាសនារបស់ពលរដ្ឋខ្មែរកម្ពុជាក្រោមផងដែរ។
គណៈប្រធានរដ្ឋវៀតណាមនឹងជួបជាមួយសម្តេចព្រះមហាសង្ឃរាជ ទេព វង្ស នៃគណៈមហានិកាយ និងសម្តេចព្រះមហាសង្ឃរាជ បួរ គ្រី គណៈធម្មយុត្តិកនិកាយនៅថ្ងៃពុធទី២៤ធ្នូដែលជាថ្ងៃបញ្ចប់នៃទស្សនកិច្ចរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ