សាលាក្រុងបដិសេធ តែ សកម្មជនដីធ្លីអះអាងថា នឹងនៅតែធ្វើបាតុកម្មដើម្បីបិទបញ្ចប់បញ្ហា
អាជ្ញាធរសាលារាជធានីភ្នំពេញ មិនអនុញ្ញាតិអោយ ក្រុមអ្នកតវ៉ាដីធ្លី ធ្វើបាតុកម្មរយៈពេលមួយខែចាប់ពីថ្ងៃទី២០ទីមករាស្អែក នៅលើទីលានប្រជាធិបតេយ្យនោះទេ។ សេចក្តីសម្រេចនេះត្រូវបានធ្វើឡើងនៅក្នុងកិច្ចប្រជុំរវាង អាជ្ញាធរ និង តំណាងសហគមន៍និងសមាគម មានជម្លោះដីធ្លីចំនួន៤ ដែលបានប្រព្រឹត្តិទៅនាព្រឹកថ្ងៃទី១៩ មករា នេះ។ យ៉ាងណាក៏ដោយសកម្មជនដីធ្លី បន្តរក្សាគម្រោងបាតុកម្មរបស់ខ្លួន។
ចុះផ្សាយនៅថ្ងៃ៖
ស្តាប់ - ០១:៤៦
អាជ្ញាធរសាលារាជធានីភ្នំពេញ ជំទាស់ទៅនឹងគម្រោងបាតុកម្មនេះក្រោមហេតុផលចំនួនធំៗ ២។ ទី១ គឺ មិនមានច្បាប់ទម្លាប់ណាអនុញ្ញាតិអោយធ្វើបាតុកម្មមួយខែនោះទេ។ នេះបើតាមការបញ្ជាក់របស់លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ។
លោកបានបន្តទៀតថា មូលហេតុទី២នោះគឺ សកម្មជនដីធ្លីទាំងនោះបានទាមទារអោយដោះលែងសកម្មជនដីធ្លី និង សកម្មជននយោបាយដែលកំពុងជាប់ឃុំ។ ក្នុងករណីនេះ លោកថា វាហាក់ជម្រុញអោយ អាជ្ញាធររាជធានីភ្នំពេញរំលោភលើស្ថាបន័តុលាការ ដែលផ្ទុយពីច្បាប់។
ក្រៅពីនេះលោកបានបញ្ជាក់ទៀតថា ប្រសិនបើមានការប៉ះទង្គិចណាមួយកើតឡើង សកម្មជនដីធ្លីទាំងអស់ដែលរៀបចំបាតុកម្មនោះ នឹងត្រូវប្រឈមមុខចំពោះច្បាប់។
អ្នកស្រី យ៉ោម បុប្ផា សកម្មជនដីធ្លីបឹងកក់ បានប្រាប់វិទ្យុបារាំង ថា ក្នុងកិច្ចប្រជុំនោះ អាជ្ញារាជធានីភ្នំពេញបាននិយាយថា ប្រសិនបាតុកម្មធ្វើឡើង នឹងមានការប៉ះទង្គិច។
យ៉ាងណាក៏ដោយ អ្នកស្រីបញ្ជាក់ថា បាតុកម្មអហឹង្សារបស់សហគមន៍និងសមាគមទាំង៤ នឹងនៅតែបន្តដូចការគ្រោងទុក។អ្នកស្រីក៏បានអំពាវនាវអោយមានអ្នកចូលរួមពីគ្រប់ទិសទី ទាំង សកម្មជនដីធ្លី សកម្មជនសិទ្ធិមនុស្ស យុវជន ព្រះសង្ឃ ព្រមទាំងសកម្មជនគណបក្សប្រឆាំងផងដែរ។
លោក រៀល ខេមរិន្ទ តំណាងរាស្ត្ររបស់គណបក្សប្រឆាំងបាននិយាយថា នៅក្នុង បាតុកម្មស្អែកនេះ នឹងអាចមានតំណាងរាស្ត្រ និង សកម្មជនគណបក្សសង្គ្រោះជាតិមួយចំនួនចូលរួមផងដែរ។
សូមបញ្ជាក់ថា បាតុកម្មរយៈពេល១ខែរបស់ សហគមន៍ទាំង៤ ដែលគ្រោងធ្វើនៅថ្ងៃទី ២០មករា ស្អែក ដល់ថ្ងៃទី ២០កុម្ភៈ មានគោលដៅធំៗចំនួន៣។ ទី ១ គឺ ដើម្បី អំពាវនាវអោយរដ្ឋាភិបាលផ្តល់ដំណោះស្រាយបញ្ហាដីធ្លីជូនអ្នកភូមិ ព្រលានយន្តហោះអន្តរជាតិភ្នំពេញ បុរីកីឡា និង បឹងកក់ ។ ទី២ ក្រុមអ្នកភូមិទាំងឡាយទាមទារអោយដោះលែងសកម្មជនដីធ្លី និង សកម្មជនផ្សេងទៀតពីពន្ធនាគារព្រៃសជាបន្ទាន់។ទី៣ទាមទារអោយបញ្ចប់ជម្លោះនយោបាយ និងភាពច្របូកច្របល់នៅក្នុងសង្គមកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ