យុវជនខ្មែរ២នាក់ ឈ្នះការប្រកួតផលិតភាពយន្តភាពយន្តខ្លីនៅអាស៊ីអាគ្នេយ៍ Tropfest SEA ឆ្នាំ២០១៥
ជាថ្មីម្ដងទៀត ផលិតករភាពយន្តវ័យក្មេងខ្មែរចំនួន២នាក់ បានក្លាយទៅជាជ័យលាភីនៅក្នុងកម្មវិធីមហោស្រពភាពយន្តខ្នាតខ្លី នៅអាស៊ីអាគ្នេយ៍ Tropfest SEA សម្រាប់ឆ្នាំ២០១។ មហោស្រពភាពយន្តខ្នាតខ្លី Tropfest SEA គឺជាការប្រកួតភាពយន្តខ្លី ធំជាងគេនៅលើពិភពលោក ដែលឆ្នាំនេះ ប្រារព្ធធ្វើនៅទីក្រុងពីណាំង ប្រទេសម៉ាឡេស៊ី។
ចុះផ្សាយនៅថ្ងៃ៖
ស្តាប់ - ០២:៣៣
នៅក្នុងពិធីប្រកាសលទ្ធផលការប្រកួតខ្សែភាពយន្តខ្លី Tropfest SEA ឆ្នាំ២០១៥ នៅយប់ថ្ងៃអាទិត្យ ទី០១ខែកុម្ភៈ ផលិតករភាពយន្តវ័យក្មេងរបស់កម្ពុជាពីររូប បានសាងភាពភ្ញាក់ផ្អើលជាថ្មី ដោយឈ្នះការប្រកួតផលិតភាពយន្តភាពយន្តខ្លី គឺជ័យលាភីលេខ១ និងលេខ។ កំណត់ត្រាថ្មីនេះ ធ្វើឲ្យប្រទេសកម្ពុជា ក្លាយជាជើងឯកពីរជំនាន់ រាប់តាំងពីឆ្នាំ២០១៤មក។ ឆ្នាំ២០១៤ ដែលផលិតករវ័យក្មេងកម្ពុជាពីររូបដែរ បានឈ្នះក្នុងការប្រកួតនេះ សម្រាប់ជ័យលាភីលេខ១ និងលេខ។
ផលិតករភាពយន្តវ័យក្មេងអាយុ២៥ឆ្នាំ លោកលី ប៉ូឡែន ដែលជាជ័យលាភីលេខពីរ នៅក្នុងមហោស្រព Tropfest SEA កាលពីឆ្នាំ២០១៤កន្លងទៅ បានក្លាយទៅជាជ័យលាភីលេខមួយនៅឆ្នាំ២០១៥នេះ ផ្ដួលផលិតករភាពយន្ត១៥នាក់ទៀត ដែលជាប់នៅក្នុងជុំផ្ដាច់ព្រ័ត្រ។
ខ្សែភាពយន្តដែលម្ចាស់ជ័យលាភីលេខមួយនេះយកទៅប្រកួត មានចំណងជើងថា ចំណងចម្រុះពណ៌ ឬ Colorful Knots តំណាលពីចំណងមិត្តភាពរវាងក្មេងស្រីតូចដែលមានជំងឺមហារីកម្នាក់ ជាមួយកុមារតាមចិញ្ចើមផ្លូវពីរនាក់។ ចំណែកផលិតករវ័យក្មេងខ្មែរមួយរូបទៀត គឺលោក ចាប សមចាន់រិទ្ធ ជាប់ជាជ័យលាភីលេខ៣ ដោយសារខ្សែភាពយន្តខ្លីរបស់ខ្លួន ដែលមានចំណងជើងថា គ្រួសមួយក្ដាប់ ឬ A Fistful of Pebbles។ ជ័យលាភីលេខពីរ ធ្លាក់ទៅលើផលិតករភាពយន្តមកពីប្រទេសហ្វីលីពីន សម្រាប់ខ្សែភាពយន្ត The Steel Child។
គួរជម្រាបជូនថា នៅក្នុងការប្រកួតផ្ដាច់ព្រ័ត្រនៃមហោស្រពភាពយន្តខ្នាតខ្លី នៅអាស៊ីអាគ្នេយ៍សម្រាប់ឆ្នាំ២០១៥នេះ មានភាពយន្តចំនួន១៦ មកពីប្រទេសចំនួន៥ ដោយក្នុងនោះ ៥រឿងមកពីកម្ពុជា ៥រឿងមកពីហ្វីលីពីន ៤រឿងមកពីម៉ាឡេស៊ី ១រឿងមកពីសិង្ហបុរី និង១រឿងទៀតមកពីប្រទេសវៀតណាម។ ខ្សែភាពយន្តទាំង១៦រឿងនេះ ត្រូវបានគណៈកម្មការកាត់សេចក្ដីសម្រេចចុងក្រោយ នៅក្នុងការចាក់បញ្ចាំងកាលពីយប់ថ្ងៃទី១ខែកុម្ភៈ ហើយការប្រកាសលទ្ធផលក៏បានធ្វើឡើងភ្លាមៗបន្ទាប់ពីនោះ។
កម្មវិធីមហោស្រពភាពយន្តខ្នាតខ្លី Tropfest ត្រូវបានបង្កើតឡើងនៅឆ្នាំ១៩៩៣ នៅហាងកាហ្វេមួយក្នុងទីក្រុងស៊ីដនី ប្រទេសអូស្ត្រាលី ដោយមានអ្នកចូលរួមតែជាង២០០នាក់ប៉ុណ្ណោះ។ រហូតមកទល់ពេលនេះ Tropfest បានក្លាយទៅជាមហោស្រពភាពយន្តខ្នាតខ្លី ធំជាងគេបង្អស់នៅលើពិភពលោក ដែលដើរតួជាវេទិកាសម្រាប់ផលិតករវ័យក្មេងមកពីគ្រប់ទិសទី យកខ្សែភាពយន្តខ្នាតខ្លីរបស់ខ្លួនមកដាក់បញ្ចាំង និងប្រកួតប្រជែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ