លីកាដូ៖ ក្រៅពីការដោះលែង ការផ្លាស់ប្តូរជាប្រពន្ធ័ក៏គួរតែអនុវត្ត ដើម្បី ដោះស្រាយបញ្ហារបស់កុមាររស់នៅក្នុងពន្ធនាគារជាមួយម្តាយ
អង្គការសិទ្ធិមនុស្សលីកាដូ បានសាទរចំពោះការដោះលែងស្ត្រីជាម្តាយចំនួន១៦នាក់ ពីពន្ធនាគារនៅមុនទិវាសិទ្ធិនារីអន្តរជាតិថ្ងៃទី៨មីនា ឆ្នាំ ២០១៥ខាងមុខនេះ ។ការដោះលែងបែបនេះត្រូវបានរដ្ឋាភិបាលប្រកាសថាមានផែនការធ្វើឡើងជារៀងរាល់ឆ្នាំ។យ៉ាងណាក៏ដោយ អង្គការមួយនេះ បានសំណូមពរអោយរដ្ឋាភិបាល អនុវត្តនូវការផ្លាស់ប្តូរជាប្រពន្ធ័ ដើម្បី ដោះស្រាយអោយបានត្រឹមត្រូវ នូវបញ្ហានានាដែលកុមាររស់នៅក្នុងពន្ធនាគារជាមួយម្តាយបានជួបប្រទះ។
ចុះផ្សាយនៅថ្ងៃ៖
ស្តាប់ - ០២:០១
ការផ្លាស់ប្តូរជាប្រពន្ធ័ ដែលចាំបាច់ រួមមាន ការបង្កើត និង ការអនុវត្តនូវការណែនាំនានា សម្រាប់កំណត់ពេលវេលាសមរម្យមួយ ដែលកុមាររស់នៅក្នុងពន្ធនាគារ ឬ ត្រូវយកកុមារនោះចេញពីម្តាយបែបណានៅពេលពួកគេអាយុ ៣ឆ្នាំ ។ នេះបើតាមសេចក្តីប្រកាសរបស់ អង្គការលីកាដូចេញផ្សាយថ្ងៃទី ០២ ខែមីនានេះ ស្តីពី ការដោះលែងស្ត្រីមានផ្ទៃពោះ និងស្ត្រីដែលមានកូននៅជាមួយក្នុងពន្ធនាគារផ្តល់នូវភាពធូរស្រាល ប៉ុន្តែមិនទាន់បានដោះស្រាយបញ្ហាជាចំបងនៅឡើយទេ។
បញ្ហាមួយទៀតដែលត្រូវតែដោះស្រាយជាបន្ទាន់នោះគឺ ត្រូវបង្កើនថវិកាទិញម្ហូបអាហារសម្រាប់កុមារ និងស្ត្រីមានផ្ទៃពោះ ហើយធានាថាកុមារទាំងនោះទទួលបានថ្នាំបង្ការមេរោគស្របតាមបទដ្ឋានជាតិ។
បន្ថែមលើនេះ លីកាដូ បានជម្រុញអោយប្រពន្ធ័យុត្តិធម៌ ធានា ថាប្រសិនបើគ្មានការចាំបាច់ទេ ការដាក់អោយជាប់ពន្ធនាគារគួរតែជាជម្រើសចុងក្រោយ សម្រាប់ស្ត្រីមានផ្ទៃពោះ ឬ ស្រី្តរស់នៅជាមួយកូន។ ចំពោះទោសឃុំឃាំងនៅនគរបាល ក៏គួរតែត្រូវបានដាក់តែក្នុងករណីបទល្មើសធ្ងន់ធ្ងរតែប៉ុណ្ណោះ។ លីកាដូ ក៏បានលើកឡើងថា ករណីជាច្រើន មានការខ្វះចន្លោះ ។ មុនពេលសម្រេចចាប់ឬឃុំខ្លួន នគរបាល និង អាជ្ញាធរមិនបានសួរថាតើស្ត្រីម្នាក់នោះមានកូនឬទេ ឬក៏ពិចារណាថាតើអ្នកណានឹងមើលថែរក្សាក្មេងនោះ នោះទេ។
អ្នកនាង នូ សំអន អ្នកគ្រប់គ្រងគម្រោងពន្ធនាគារនៃអង្គការលីកាដូ បាននិយាយថា បច្ចុប្បន្ននេះស្ត្រីជាច្រើននៅក្នុងពន្ធនាគារត្រូវបាន ចោទប្រកាន់ ឬផ្តន្ទាទោស ពីបទល្មើសតូចតាច ឬបទល្មើសដែលទើបនឹងត្រូវបានប្រពឹត្តិលើកទីមួយ។ ដូច្នេះ តុលាការ គួរតែ ពិចារណាអំពីផលប៉ះពាល់ទាំងឡាយពីការសម្រេចចិត្តរបស់តុលាការ និងវិធានការណ៍ផ្សេងទៀតមុនពេលចេញដីកាដាក់ម្តាយទាំងនោះនៅក្នុងពន្ធនាគារ។
សូមបញ្ជាក់ថា បើតាមរបាយការណ៍ឆ្នាំ ២០១៥ របស់លីកាដូ ចំពោះកុមារ មួយចំនួនដែលមានបឋមវយ័ក្នុងពន្ធនាគារអាចមានផលប៉ះពាល់យ៉ាងធ្ងន់ធ្ងរ ចំពោះការលូតលាស់ផ្លូវកាយ និងផ្លូវចិត្តរបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ