ស្បោងឬថង់ផ្លាស្ទិក នាំឱ្យខូចទាំងបរិស្ថាន ទាំងសុខភាព
ចុះផ្សាយនៅថ្ងៃ៖
ស្តាប់ - ០៨:២៤
កែវជ័រ ចានជ័រ ប្រអប់ជ័រ ដបជ័រ ស្បោង ថង់ … សម្រាមផ្លាស្ទិកមានគ្រប់ធុន និងមានចោលគ្រប់ទិសទី លើដី ក្នុងទឹក លើអាកាស (ជាប់នឹងមែកឈើ)។ ផលិតផលអំពីជ័រឬផ្លាស្ទិកទាំងអស់នេះ បានសម្រួលជីវិតនិងផ្តល់ប្រយោជន៍ខ្លាំងណាស់សម្រាប់ការទុកដាក់និងវេចខ្ចប់គ្រប់បែបយ៉ាង។ ប៉ុន្តែផ្លាស្ទិក ឬវត្ថុជ័រទាំងអស់នេះ ដែលមិនងាយរលួយក្នុងធម្មជាតិទេ បង្កផលរំខានខ្លាំងណាស់ដល់បរិស្ថាន និងសុខភាពមនុស្ស។
ស្រួលប្រើ ជាប់ល្អ មិនសូវថ្លៃ ស្បោង ថង់ ផ្លាស្ទិក ឬប្រអប់ ដបជ័រ ជាវវត្ថុដ៏ពេញនិយមសម្រាប់មនុស្សសម័យថ្មី សឹងថាខ្វះមិនបាន សម្រាប់ជីវភាពរស់នៅប្រចាំថ្ងៃ។ ក្នុងមួយឆ្នាំៗ មនុស្សលោក នៅលើភពផែនដីយើងទាំងមូល ប្រើស្បោងឬថង់ផ្លាស្ទិក អស់ប្រមាណ ពី ៥០០ទៅ ១០០០ពាន់លានស្បោង។ នេះបើតាមការអង្កេតរបស់អង្គការGreenberry។
នៅតាមបណ្តាប្រទេសជឿនលឿន នៅអឺរ៉ុប ដូចជាន័រវែស ហ្វាំងឡង់ ដាណឺម៉ាក ឬហូឡង់ ផ្សារម្ហូប ផ្សារទំនើប មិនផ្តល់ស្បោងផ្លាស្ទិកដល់អតិថិជន សម្រាប់ដាក់ទំនិញ តាំងពីជាយូរឆ្នាំមកហើយ។ នៅប្រទេសបារាំង ការប្រើប្រាស់ស្បោងផ្លាស្ទិក បានថយចុះមួយជាដប់ ក្នុងរយៈពេល១០ឆ្នាំចុងក្រោយនេះ ហើយនៅចាប់ពីថ្ងៃទី ១ មករា ២០១៦ទៅ ផ្សារទំនើបបារាំងក៏លែងផ្តល់ទាល់តែសោះស្បោងផ្លាស្ទិក ច្រកឥវ៉ាន់ ឬបន្លែផ្លែឈើ។
នៅកម្ពុជា គ្មានទេតួលេខបញ្ជាក់អំពីការប្រើប្រាស់ថង់ផ្លាស្ទិក ប៉ុន្តែដោយគ្មានសង្ស័យស្បោងផ្លាស្ទិក គឺជាចំណែកមួយនៃជីវិតរបស់ពលរដ្ឋ មិនថានៅក្រុងឬជនបទឡើយ។ កណ្តាលរាជធានីដ៏បវរ រហូតដល់ជនបទដាច់ស្រយាល កាត់តាមទន្លេស្ទឹងបឹងបួរ ព្រៃភ្នំ ឆ្នេរខ្សាច់ ក្នុងសមុទ្ទ ស្បោង ឬថង់ផ្លាស្ទិក ក្រោយពីប្រើរួច ត្រូវគេគ្រវាត់ចោលយ៉ាងពាសវាលពាសកាលបំផុត។ គរដូចភ្នំ រាយប៉ាយពេញផ្លូវ ពេញព្រៃ ពេញឆ្នេរ ពេញច្រាំង មើលទៅគួរឱ្យសូរ និងអាក្រក់មើល ខូចអស់សម្រស់ទេសភាពធម្មជាតិ សម្រាមបែបនេះជាការបំពុលជាបឋមបរិស្ថានភ្នែក តែអ្វីដែលធ្ងន់ធ្ងរខ្លាំងនោះគឺបរិស្ថាន ក្នុងអត្ថន័យចំ និងសុខភាពរបស់មនុស្សសត្វនិងរុក្ខជាតិ ទាំងមូល។
ផ្លាស្ទិកនិងបរិស្ថាន
ថង់ផ្លាស្ទិក មានឥទ្ធិពលលើជីវិតមនុស្សសត្វក្នុងលោកផង និងបន្សល់ទុកនូវផលវិបាកដ៏សម្បើមក្រៃសម្រាប់បរិស្ថាន។ បើតាមការសិក្សាជាច្រើន ស្បោងផ្លាស្ទិក ដែលមានអាយុវែង ទៅតាមគុណភាព ប្រមាណពី១០០ទៅ៤០០-៤៥០ឆ្នាំ ទើបរលួយជាដីនោះ បង្កគ្រោះថ្នាក់ខ្លាំងណាស់ ដល់សត្វនិងរុក្ខជាតិ ក្នុងទឹក ក្នុងដី។ នៅក្នុងទឹក (សមុទ្ទ) ស្បោងឬថង់ផ្លាស្ទិក អណ្តែតក្នុងទឹក អាចបង្កឱ្យមានបម្រែបម្រួលប្រព័ន្ធបរិស្ថានសមុទ្ទ ឬទន្លេ។ សម្រាមស្បោងផ្លាស្ទិកអណ្តែតក្នុងទឹក ជាការបាំងពន្លឺមិនឱ្យជះដល់បាត ដែលរុក្ខជាតិក្រោមទឹក ផ្កាថ្មត្រូវការសម្រាប់លូតលាស់។ ជាផលវិបាក រុក្ខជាតិក្រោមទឹកមិនសូវដុះដាល ជីវិតសត្វស៊ីស្លែ ស៊ីរុក្ខជាតិក៏ត្រូវរំខាន។
សត្វគ្រប់ប្រភេទត្រូវរងគ្រោះអំពីសម្រាមផ្លាស្ទិក។ បើតាមអង្គការGreenpeace បានប៉ាន់ប្រមាណថា មានសត្វបក្សាបក្សីប្រមាណ១លានក្បាល សត្វតូចសត្វធំក្នុងទឹកប្រមាណ១សែនក្បាល បានស្លាប់ក្នុងមួយឆ្នាំៗ ដោយសារតែបានស៊ីស្បោង ស៊ីផ្លាស្ទិក។ អណ្តើក បាឡែន ត្រីឈាម ពពួកសត្វជិតផុតពូជជាច្រើនទៀត បានស្លាប់ព្រោះ ខ្លះថប់ដណ្តើម ខ្លះវន្តកងាប់ ខ្លះស្លាក់ថង់ផ្លាសិ្ទក ខ្លះលេបថង់ផ្លាស្ទិកចូលរួចតែក្រពះឥតកិន លេបអ្វីទៀតមិនចូល អត់អាហាររហូតទាល់តែស្លាប់។ រូបភាពដែលគួរឱ្យអាសូរបំផុត ដែលអ្នកការពារបរិស្ថានតែងលើយកមកធ្វើជាអំណះអំណាងការពារធម្មជាតិ គឺសត្វអណ្តើកថប់ខ្យល់ងាប់ ដោយហែលស្ទុះទៅរកស៊ីថង់ផ្លាស្ទិក ដោយស្មានតែជាសត្វពពុះសមុទ្ទ។
នៅលើដី ចំណាត់ការមិនត្រឹមត្រូវ បណ្តោយឱ្យស្បោង ថង់ ដបផ្លាស្ទិក ក្លាយជាសម្រាមពាសពេញដី ប៉ើង ឬត្រូវជាន់ កាយកប់ អាចជាបុព្វហេតុនាំឱ្យមានទឹកជំនន់ ព្រោះវត្ថុពីផ្លាស្ទិកទាំងអស់នេះ អាចបិទស្ទះស្រទាប់ដី ប្រភពខ្សែទឹក ជ្រោះអូរ ប្រលាយ...
មេឃា ក៏មិនអាចចៀសផុតពីហានិភ័យបង្កឡើងផ្លាស្ទិក។ កាត់បន្ថយបរិមាណសម្រាមស្បោង សម្រាមផ្លាស្ទិក ដោយការដុតឱ្យឆេះខ្ទេចខ្ទី ក៏មិនមែនជាប្រការល្អ។ ដុតសម្រាមផ្លាស្ទិក ដែលនឹងផ្តល់ជាផ្សែងឧស្ម័នកាបូនិក និងចំហាយទឹក ជាការចំណែកមួយនៃការបង្កើនឧស្ម័នផ្ទះកញ្ចក់ ពោលគឺចូលរួមចំណែកឱ្យភពផែនដី ឡើងកម្តៅ។ ដូច្នេះស្បោង ថង់ ផ្លាស្ទិក ដប ចានកែវ ប្រអប់ជ័រនេះ គឺជាបញ្ហាដ៏ចម្បង ក្នុងចំណោមបញ្ហាសំខាន់ប៉ះពាល់ដល់បរិស្ថាន ដែលគ្រប់គ្នាត្រូវប្រមូលកម្លាំងដោះស្រាយ។
ផ្លាស្ទិកនិងសុខភាពមនុស្សលោក
តើថង់ផ្លាស្ទិក ឬវត្ថុជ័រទាំងអស់នេះ ផលិតចេញមកពីណា ? មានសារធាតុផ្សំអ្វីខ្លះ បានជាបំពុលបរិស្ថានខ្លាំងម្ល៉េះ ?
ផលិតចេញពីប្រេងឆៅ និងសារធាតុសន្សំគីមីជាច្រើនផ្សេងទៀត ថង់ផ្លាស្ទិក មិនមែនបង្កគ្រោះថ្នាក់ត្រឹមតែសត្វនិងរុក្ខជាតិប៉ុណ្ណោះទេ តែក៏នឹងធ្វើឱ្យខូចសុខភាពមនុស្សលោកយ៉ាងខ្លាំងដែរ។ ផ្សែងសម្រាមដែលហុយចេញពីការដុតសារធាតុផ្លាស្ទិក មានផ្ទុកសារធាតុឌីអុកស៊ីត ដែលជាភ្នាក់ងារបង្កជំងឺមហារីក។ នេះជាការកត់សម្គាល់របស់អ្នកឯកទេសសុខភាពសាធារណៈដែលបានបញ្ជាក់ដោយចំៗថាស្បោង ថង់ ផ្លាស្ទិក អាចបង្កជំងឺមហារីក។ ថង់ ស្បោងផ្លាស្ទិក ដែលបណ្តាជនកម្ពុជាប្រើប្រាស់ជារៀងរាល់ថ្ងៃ សម្រាប់ច្រកម្ហូបអាហារ ភេសជ្ជៈយ៉ាងស្រួលដៃនេះ មានផ្ទុកសារធាតុពុលសម្រាប់សុខភាពមនុស្ស។ សារធាតុពុលនេះ អាចនឹងបញ្ចៀបចូលក្នុងអាហារបាន ជាពិសេស នៅពេលណាម្ហូបអាហារនោះក្តៅ។ បើតាមការសិក្សាមួយទៀតបង្ហាញថា ស្បោងផ្លាស្ទិកនេះ ក៏អាចបង្កឱ្យមនុស្សប្រុសមានបញ្ហាសុខភាពផ្នែកបន្តពូជ។
ចំពោះប្រអប់ និងដបជ័រធ្វើអំពីផ្លាស្ទិកវិញ វិទ្យុបារាំងធ្លាប់បានជម្រាបនៅក្នុងកម្មវិធីសុខភាពមុនៗហើយ ដបទឹកគោក្មេង ដែលមានបន្សំសារធាតុប៊ីហ្វេណុល ត្រូវបានហាមឃាត់មិនឱ្យធ្វើចរាចរណ៍លើទីផ្សារអឺរ៉ុបទេ និងតាំងពីដើមឆ្នាំ២០១៥មក គ្មានប្រអប់ឬដបជ័រសម្រាប់ដាក់អាហារអាចដាក់លក់ឬធ្វើចរាចរណ៍ក្នុងប្រទេសបារាំងបានទេ។ ក្រុមអ្នកឯកទេសសុខភាពបានណែនាំឱ្យអ្នកជាឪពុកម្តាយ ប្រើដបទឹកដោះគោធ្វើអំពីកែវ ឬអំពីផ្លាស្ទិកដែរ ប៉ុន្តែត្រូវគ្មានសារធាតុប៊ីហ្វេណុលA។
ជាទូទៅ ដើម្បីសុវត្ថិភាពសុខភាព គ្រប់ផលិតផលផ្លាស្ទិក បើទោះបីជាម្ចាស់ក្រុមហ៊ុនបានបញ្ជាក់ថាអាចធុននឹងកម្តៅ អាចប្រើក្នុងមៃក្រូវេវក៏ដោយ សូមលោកអ្នកនាងចៀសវាងកុំប្រើផលិតផលផ្លាស្ទិកទាំងអស់នៅ ក្នុងសីតុណ្ហភាពខ្ពស់។ វាមិនខុសអំពីស្បោងឬថង់ផ្លាស្ទិកទេ នៅមានត្រូវកម្តៅផ្លាស្ទិកអាចបញ្ចៀបសារធាតុគីមីម្យ៉ាងជាភ្នាក់ងារបង្កជំងឺមហារីកទៅក្នុងចំណីអាហារ។
ដបទឹក ធ្វើអំពីជ័រផ្លាស្ទិក បានសម្រួលជីវិតរស់នៅរបស់មនុស្សម្នាលើលោកខ្លាំងណាស់។ ប៉ុន្តែសូមចងចាំថាដបទឹកនេះ ជាសម្រាមដែលក្ររលួយ ជាអ្នកបំពុលបរិស្ថានយ៉ាងខ្លាំង និងអាចបង្កគ្រោះថ្នាក់ដល់សុខភាពទៀត។ បើលោកអ្នកដាក់ឱ្យត្រូវថ្ងៃ ត្រូវក្តៅ វាអាចបញ្ចេញជាតិពុលបង្កជំងឺមហារីកទៅក្នុងទឹក។
ជ័រ ផ្លាស្ទិក ស្បោង ពិតណាស់ថាអាចបង្កហានិភ័យដល់សុខភាព ប៉ុន្តែលោកអ្នកអាចបញ្ចៀស និងកាត់បន្ថយការប្រើប្រាស់វត្ថុទាំងអស់នេះបាន ដោយកាយវិការសាមញ្ញៗបំផុត និងប្រសិនបើអ្នកយល់ច្បាស់អំពីប្រភពនៃជ័រនិងផ្ទាស្ទិកទាំងអស់នោះ។
វត្ថុធាតុដើមសំខាន់បំផុត គឺប្រេង ! ដើម្បីភាពរឹង ភាពថ្លា ភាពស្វិត ធុននឹងកម្តៅ ។ល។ និង។ល។ គេត្រូវបូកជាមួយល្បាយគីមីជាសារធាតុពុលផ្សេងៗ ទើបចេញជាផលិតផល ជ័រ ឬ ផ្លាស្ទិក។ ហេតុដូច្នេះហើយបាន នៅគ្រប់ប្រអប់ ស្បោងទាំងអស់ គ្រប់វត្ថុធ្វើផ្លាស្ទិក តែងមានសញ្ញាព្រួញត្រីកោណ និងលេខពី ១ ដល់៧ សម្រាប់បញ្ជាក់អំពីបន្សំនៃផលិតផលនោះ។
ប្រភេទផ្លាស្ទិកដែលគ្រោះថ្នាក់ជាងគេ គឺផ្លាស្ទិកដែលមានលេខ១-៣-៦-៧ ក្នុងសញ្ញាត្រីកោណ។ ដបទឹក និងស្បោង ស្ថិតនៅក្នុងប្រភេទផ្លាស្ទិក លេខ១ ឬជាអក្សរកាត់ PET។
ដំណោះស្រាយដ៏ប្រសើរដើម្បីគេចពីគ្រោះថ្នាក់បង្កឡើងផ្លាស្ទិក គឺសូមប្រើកញ្ចប់ជាស្លឹកចេក ស្លឹកឈូក ឬជាប្រអប់ធ្វើអំពីកែវ អំពីអ៊ីណុក ឬព័រសឺឡែន។ ប្រសិនបើអ្នកមិនអាចបញ្ឈប់ការប្រើប្រាស់វត្ថុធ្វើពីផ្លាស្ទិកទេ
- សូមកុំប្រើផ្លាស្ទិកដែលមានសញ្ញាត្រីកោណលេខ ១ ៣ ៦និងលេខ៧។
- សូមកុំកម្តៅម្ហូបអាហារក្នុងប្រអប់ផ្លាស្ទិក ឬស្បោង
- សូមកុំដាក់ដបទឹក ឬភេសជ្ជៈផ្សេងៗឱ្យត្រូវថ្ងៃ
- សូមឈប់ប្រើប្រអប់ចាស់ៗណាដែលមានឆ្កូត មានស្នាមរិចរិល
- សូមកុំត្រាំ ផ្អាប់របស់ខ្លាញ់ក្នុងប្រអប់ជ័រ
- បើចាំបាច់ត្រូវប្រើផ្លាស្ទិក សូមជ្រើសរើសពពួកផ្លាស្ទិកមានសញ្ញាត្រីកោណលេខ ២ - ៤ និងលេខ៥ ឬពពួកដែលគ្មានសារធាតុប៊ីហ្វេណុលA។
ជាចុងក្រោយ ចំពោះកញ្ចប់ កំប៉ុង ក្រដាសអាលុយមីញ៉ូម វិញ ផលវិបាកចំពោះសុខភាព គឺវាអាចបង្កឱ្យមានជំងឺរលាកពោះវៀន ងាយបង្កឱ្យមានជំងឺប្រព័ន្ធប្រសាទដូចឆាប់ភ្លេចភ្លាំង ពិបាកផ្ចង់អារម្មណ៍ ជាពិសេសនៅពេលប្រើត្រូវក្តៅ ឬត្រូវជាតិជូរ។ បើក្តៅហើយជូរទៀតជួបគ្នា នោះពិតជាល្បាយគីមីដ៏កាចសាហាវបំផុត។
ព័ត៌មានទាក់ទងនឹងសញ្ញាសម្គាល់ ផ្លាស្ទិកទាំង៧ករណី ព្រមទាំងអាយុកាលនៃភាពរលួយក្នុងធម្មជាតិរបស់សម្រាមផ្លាស្ទិក និងសម្រាមផ្សេងទៀត មានសរសេរនិងផ្សាយជូនយ៉ាងលម្អិត លើទំព័រវិបសៃត៍វិទ្យុបារាំងអន្តរជាតិ www.km.rfi.fr ក្នុងកម្មវិធីសុខភាពនិងអនាម័យ “ផ្លាស្ទិកធ្វើឱ្យបរិស្ថានយ៉ាប់យឺន សុខភាពរងគ្រោះ”។
អាយុកាលនៃការរលួយជាដីរបស់សម្រាម នៅពេលយើងក្រវ៉ាត់ចោលក្នុងធម្មជាតិ
- ក្រដាសជូតមាត់ ៣ខែ
- សម្បកផ្លែឈើ ៣ខែ
- ក្រដាសកាសែត ពី ៣ទៅ១២ខែ
- កន្ទុយបារី ពី១ទៅ២ឆ្នាំ (កន្ទុយមួយបំពុលទឹក៥រយលីត្រ)
- សំណល់ស្ករកោស៊ូ ៥ឆ្នាំ
- ប្រេងម៉ាស៊ីនឡាន ១-៥ឆ្នាំ
- កំប៉ុងអាហារកំប៉ុង ៥០ឆ្នាំ
- កំប៉ុងទឹកក្រូចពីដែក ១០០ឆ្នាំ
- កំប៉ុងទឹកក្រូចធ្វើពីអាលុយមីញ៉ូម ១០០ឆ្នាំ
- ប្រអប់ធ្វើពីជាតិប៉ូលីស៊ីរ៉ែន ៥០ឆ្នាំ
- វត្ថុធ្វើពីសារធាតុប៉ូលីស៊ីរ៉ែន ៨០ឆ្នាំ
- ប្រអប់អាហារធ្វើអាលុយមីញ៉ូម ១០០ទៅ៥០០ឆ្នាំ
- ថ្មពិល ២០០ឆ្នាំ
- ខោទឹកនោម ៤០០-៤៥០ឆ្នាំ
- ស្បោងឬថង់ និងដបផ្លាស្ទិក ៤៥០ឆ្នាំ
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ