ភ្នំពេញ គ្រោងចរចាភ្ជាប់កម្ពុជាទៅនឹង ”លំហពាណិជ្ជកម្មសេរី” របស់ “សហភាព សេដ្ឋកិច្ចអឺរ៉ុប-អាស៊ី”
ចុះផ្សាយនៅថ្ងៃ៖
ស្តាប់ - ០៥:៤១
ដំណឹងនេះ ផ្សព្វផ្សាយ ដោយកាណាល់ទូរទស្សន៍រដ្ឋរុស្ស៊ី “Russia-24” យោងទៅលើអង្គភាពពត័មាននៃក្រសួងទូរគមនាគមន៍សហព័ន្ធរុស្ស៊ី ដែលរដ្ឋមន្ត្រីក្រសួងនេះ ក្នុងឋានៈជាសហប្រធាននៃ “គណៈកម្មការអន្តររដ្ឋាភិបាល រុស្ស៊ី-កម្ពុជា ខាងសហប្រតិបត្តិការ ពាណិជ្ជកម្ម-សេដ្ឋកិច្ច និង វិទ្យាសាស្ត្រ-បច្ចេកទេស” កាលពីថ្ងៃចន្ទ ២០កក្កដាកន្លងទៅ ត្រូវបានទទួលជួបនៅរាជធានីភ្នំពេញ ដោយលោកនាយករដ្ឋមន្ត្រី ហ៊ុន សែន និងបានជួបពិភាក្សាជាមួយនឹងប្រមុខស្ថាប័នរដ្ឋអំណាចផ្សេងៗទៀតនៅកម្ពុជា។
“លទ្ធផលដ៏សំខាន់ នៃទស្សនកិច្ចផ្លូវការរបស់គណៈប្រតិភូរុស្ស៊ី ដែលដឹកនាំដោយ លោករដ្ឋមន្ត្រីក្រសួងទូរគមនាគមន៍សហព័ន្ធរុស្ស៊ី Nicolai Nikiforov នៅរាជាណាចក្រកម្ពុជា គឺ ការព្រមព្រៀងគ្នាចាប់ផ្តើមកិច្ចចរចា ដើម្បីភ្ជាប់ប្រទេសកម្ពុជា ទៅនឹងរបបពាណិជ្ជកម្មសេរីជាមួយ “សហភាពសេដ្ឋកិច្ចអឺរ៉ុប-អាស៊ី” - សេចក្តីនេះ ត្រូវបានថ្លែង ដោយលោកនាយករដ្ឋមន្ត្រីកម្ពុជា ហ៊ុន សែន ក្នុងជំនួបកាលពីដើមសប្តាហ៍នេះ ជាមួយប្រមុខគណៈប្រតិភូរុស្ស៊ី គឺ លោករដ្ឋមន្ត្រីទូរគមនាគមន៍។
ទស្សនកិច្ចគណៈប្រតិភូរុស្ស៊ី បានប្រព្រឹត្តទៅ គឺក្នុងក្របខ័ណ្ឌនៃការងារ “គណៈកម្មការ អន្តររដ្ឋាភិបាល រុស្ស៊ី-កម្ពុជា ខាងសហប្រតិបត្តិការ ពាណិជ្ជកម្ម-សេដ្ឋកិច្ច និង វិទ្យាសាស្ត្រ-បច្ចេកទេស”។
ដំណឹងផ្សាយដោយអង្គភាពពត័មាននៃក្រសួងទូរគមនាគមន៍សហព័ន្ធរុស្ស៊ី លើកឡើងតបមក ទៀតថាគណៈប្រតិភូរុស្ស៊ី ដឹកនាំដោយលោករដ្ឋមន្ត្រី Nicolai Nikiforov ក៏បានធ្វើកិច្ចចរចាជាមួយ៖
-សហប្រធានខាងភាគីកម្ពុជានៃគណៈកម្មការអន្តររដ្ឋាភិបាលកម្ពុជា-រុស្ស៊ី លោក ហោ ណាំហុង ដែលជាឧបនាយករដ្ឋមន្ត្រី រដ្ឋមន្ត្រីការបរទេស និង សហប្រតិបត្តិការអន្តរជាតិ របស់កម្ពុជា
-ទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្មកម្ពុជា លោក ស៊ុន ចាន់ថុល
-អគ្គលេខាធិការ CDC “ក្រុមប្រឹក្សាអភិវឌ្ឍន៍កម្ពុជា” លោក សុខ ចិន្តា សោភា។
គណៈប្រតិភូរុស្ស៊ី ក៏បានចូលរួមក្នុងការងារនៃ Business Forum សម្រាប់ពួកអ្នកតំណាងនៃមជ្ឈដ្ឋានធុរកិច្ច រុស្ស៊ី និង កម្ពុជា បានធ្វើកិច្ចចរចាជាមួយលោក ឈិត សុខុម អភិបាលខេត្តព្រះសីហនុ បានទៅកាន់ការិយាល័យក្រុមហ៊ុនចម្រុះរុស្ស៊ី-កម្ពុជា GS Group នៅក្រុងភ្នំពេញ ដែលបានបង្កើតឡើងជាបណ្តាញ នៃ TV Digital ក្នុងប្រទេសកម្ពុជា ដោយប្រើបច្ចេកវិជ្ជារុស្ស៊ី។
តាមការកត់សម្គាល់នៃលោក Nicolai Nikiforov រដ្ឋមន្ត្រីទូរគមនាគមន៍សហព័ន្ធរុស្ស៊ី ៖ ការភ្ជាប់ខ្លួនរបស់កម្ពុជាទៅនឹង “របបពាណិជ្ជកម្មសេរី” ជាមួយ “សហភាពសេដ្ឋកិច្ចអឺរ៉ុប-អាស៊ី” ហៅកាត់ថា ស.ស.អ.អ. ដែលមាន៥ប្រទេសទៅហើយជាសមាជិក គឺ រុស្ស៊ី បេឡារុស កាហ្សាក់ស្ថាន អារមេនី កៀហ្ស៊ីស៊ីស្ថាន នឹងក្លាយទៅជាការបុកទម្លាយទៅមុខយ៉ាងបង្គួរ ក្នុងផ្ទៃនៃការពង្រឹង របៀបរបបធ្វើពាណិជ្ជកម្ម រវាងរុស្ស៊ី និង កម្ពុជា។
ត្រង់ចំណុចនេះ កាណាល់ទូរទស្សន៍រដ្ឋរុស្ស៊ី “Russia-24” លើកយកមកផ្សាយប្រសាសន៍ របស់លោកនាយករដ្ឋមន្ត្រីរុស្ស៊ី ឌ្មីទ្រី មេដវេដេវ ដែលថាក្នុងដំណាក់ឥឡូវមានប្រទេសចំនួន ៤០ ទៅហើយ បែបយ៉ាងប្រទេសថៃជាដើម បានសំដែងនូវបំណងភ្ជាប់ខ្លួនមកនឹង”លំហពាណិជ្ជកម្មសេរី” របស់ស.ស.អ.អ. ហើយដោយយោងទៅលើស្ថិតិផ្លូវការ រំលឹកថា ក្នុង៥ខែដំបូងនៃឆ្នាំនេះ គឺពីខែមករាដល់ខែឧសភា ទំហំផ្តោះប្តូរពាណិជ្ជកម្ម រវាងរុស្ស៊ី និង កម្ពុជា មានទឹកប្រាក់ទើប ៣៨លាន១សែនដុល្លារ។
ជាការប្រៀបធៀប ទំហំពាណិជ្ជកម្មរវាងថៃនិងរុស្ស៊ី ក្នុងឆ្នាំ២០១៤កន្លងទៅ បានមានទឹកប្រាក់ ប្រមាណ ៥.០០០លានដុល្លារ ហើយក្រោយពីដំណើរភ្ជាប់ខ្លួនរបស់ថៃ ទៅនឹងលំហពាណិជ្ជកម្មសេរីនេះ ត្រូវចប់សព្វគ្រប់ ទៅទល់ដំណាច់ឆ្នាំ២០១៥ ភាគីរុស្ស៊ី និង ថៃ សង្ឃឹមបង្កើនទំហំនេះ ក្នុងប៉ុន្មានឆ្នាំចំពោះមុខ ឲ្យឡើងដល់ ១០.០០០លានដុល្លារតែម្តង។
ករណីវៀតណាម ដែលកាលពីដើមឆ្នាំនេះ បានចុះទៅហើយ កិច្ចព្រមព្រៀងស្តីអំពីភ្ជាប់ខ្លួននេះ រំពឹងថា ទំហំផ្តោះប្តូរពាណិជ្ជកម្ម ជាមួយរុស្ស៊ី ក្នុងឆ្នាំ២០១៤កន្លងទៅ ដែលបានមានទឹកប្រាក់ ៤.០០០លានដុល្លារ ជាតុល្យាការឆ្នាំ២០១៥ នឹងកើនដល់ ៧.០០០លានដុល្លារ ហើយទៅទល់ ឆ្នាំ២០២០ ត្រូវគូភាគីដាក់ទិស ឲ្យវាស្ទុះដល់ ១០.០០០លានដុល្លារដែរ។
ក្នុងបរិបទការងារ “គណៈកម្មការអន្តររដ្ឋាភិបាល រុស្ស៊ី-កម្ពុជា ខាងសហប្រតិបត្តិការ ពាណិជ្ជកម្ម -សេដ្ឋកិច្ច និង វិទ្យាសាស្ត្រ-បច្ចេកទេស” គូភាគី បានឯកភាពគ្នា ទៅលើការខំប្រឹងប្រែងបង្កើនទំហំផ្តោះប្តូរពាណិជ្ជកម្ម និង បំផុសបំផុលគម្រោងវិនិយោគ។
ភាគីរុស្ស៊ី ប្រាថ្នាលក់ទៅឲ្យកម្ពុជា គឺរថយន្តកាម៉្ញុង KAMAZ ឧទ្ធម្ភាគចក្រ និង យន្តហោះ សម្រាប់ដឹកអ្នកដំណើរ ទៅចម្ងាយមធ្យមរហូតដល់ ៤.៥០០គ.ម. បែបយ៉ាងធុន Superjet-100 អាចផ្ទុកអ្នកដំណើរ១០០នាក់ សម្រាប់ហោះនៅតំបន់ និងដែលត្រូវបានទិញទៅហើយ ដោយឥណ្ឌូណេស៊ី ឡាវ ថៃ នេប៉ាល់ ស្វីស អ៊ីតាលី ម៉ិចស៊ិក។ តម្លៃមួយគ្រឿងៗ ប្រមាណ ៤០លានដុល្លារ។
ភាគីកម្ពុជា ពីចំណែកខ្លួន បានលើកពីបំណងពង្រីកការនាំចេញមកកាន់ប្រទេសរុស្ស៊ី គឺ អង្ករ ជលផលសមុទ្រ កៅស៊ូ ស្វាយ គ្រឿងទេស ផលិតផលនៃឧស្សាហកម្មធុនស្រាល មានសំលៀកបំពាក់ជាដើម។
បើនិយាយពីវិស័យទេសចរណ៍ នោះ តាមការកត់សម្គាល់នៃគូភាគី គ្រាន់តែក្នុងខែកក្កដានេះ មានទេសចររុស្ស៊ី ប្រមាណ ៥.០០០នាក់ បានសម្រាកនៅកម្ពុជា ដោយគេធ្វើដំណើរទៅទីនោះ ឆ្លងកាត់តាមប្រទេសថៃ និង វៀតណាម។ គូភាគីក៏សង្កេតឃើញថា ពីមួយឆ្នាំទៅមួយឆ្នាំ ចំនួនទេសចររុស្ស៊ី ទៅសម្រាកនៅកម្ពុជា ចេះតែកើនឡើង ហើយឥឡូវឡើងដល់ ១៥០.០០០នាក់ ក្នុង១ឆ្នាំ។
ភាគីរុស្ស៊ី ក៏បានលើកយកទៅពិភាក្សាគឺអំពី លទ្ធភាពភ្ជាប់ជើងយន្តហោះត្រង់ផ្ទាល់ ចេញពីក្រុងមួយចំនួននៅតំបន់ស៊ីបេរី ដែលជាទូទៅ ជាតំបន់សែនត្រជាក់ បែបយ៉ាង ក្រុង Irkoutsk Novosibirsk Krasnoyarsk ដែលស្ថិតនៅចម្ងាយម្តុំ ៥.០០០-៦.០០០គ.ម. ពីក្រុងព្រះសីហនុ ដើម្បីដឹកអ្នកស្រុកខ្លួន ទៅសម្រាកលំហែកាយ ស្រូបយកកំដៅថ្ងៃ នៅឯឆ្នេរសមុទ្រនៃរមណីយដ្ឋានកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ