ដើម្បីការពារសត្វផ្សោត WWFនៅតែទាមទារឲ្យរដ្ឋាភិបាលឡាវបញ្ឈប់គំរោងសាងសង់ទំនប់ដន សាហុង!
ក្នុងទិវាសត្វផ្សោតទន្លេមេគង្គលើកទី៣ ដែលរៀបចំដោយអង្គការមូលនិធិសកលសម្រាប់ការអភិរក្សធម្មជាតិ WWF ដែលសហការជាមួយនឹងរដ្ឋបាលជលផល ក្នុងទីរួមខេត្តក្រចេះ នៅថ្ងៃទី ១០វិច្ឆិកានេះ ភាគីទាំងអស់នៅតែបន្តទាមទារឲ្យរដ្ឋាភិបាលឡាវ ត្រូវតែបញ្ឈប់គម្រោងសាងសង់ទំនប់ដន សាហុង។ ការបញ្ឈប់ដែលក្រុមនេះ អះអាងថា មានប្រយោជន៍ចំពោះការអភិរក្សសត្វផ្សោតដ៏កម្រ ក្នុងទន្លេមេគង្គ នៃប្រទេសកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
នៅថ្ងៃទី ១០វិច្ឆិកា អង្គការមូលនិធិសកលសម្រាប់ការអភិរក្សធម្មជាតិ WWF បានសហការជាមួយនឹងរដ្ឋបាលជលផល ដើម្បីរៀបចំទិវាសត្វផ្សោតទន្លេមេគង្គ លើកទី៣ ក្នុងខេត្តក្រចេះ។ ជាទិវាមួយ ដែលលោកឈិត សំអាត នាយកប្រចាំប្រទេសរបស់អង្គការ WWF បានអះអាងថា ធ្វើឡើងដើម្បីបំផុសបន្ថែមនូវយុទ្ធនាការការពារសត្វផ្សោត រួមទាំងទាមទារផងដែរ ឲ្យរដ្ឋាភិបាលឡាវ ត្រូវតែបញ្ឈប់ការសាងសង់ទំនប់ដង សាហុង។ ទំនប់ដងសាហុង ដែលរដ្ឋាភិបាលឡាវ ចង់សាងសង់ជាទំនប់វារីអគ្គិសនី នៅដើមឆ្នាំ ២០១៦។
តាមលោកឈិត សំអាត ប្រសិនបើទំនប់វារីអគ្គិសនីដន សាហុង លេចចេញជារូបរាង នោះជីវិតសត្វផ្សោតក្នុងទន្លេមេគង្គ អាចប្រឈមនឹងការផុតពូជ។ លោកបញ្ជាក់ថា ការសាងសង់ទំនប់វារីអគ្គិសនី ដន សាហុង របស់ប្រទេសឡាវ គឺនៅត្រង់ច្រកមួយ ដែលស្ថិតនៅខ្សែទឹកខាងលើ ចំពីលើតំបន់សត្វផ្សោតរស់នៅ។
ក្រៅតែពីការដើរក្បួន ដែលមានការចូលរួមពីសិស្ស ព្រះសង្ឃ និងសកម្មជនការពារធម្មជាតិ ជិត៥០០នាក់ ជុំវិញកន្លែងសាធារណៈសំខាន់ៗ ក្នុងទីរួមខេត្តក្រចេះ ដើម្បីផ្សព្វផ្សាយ ក៏ដូចជាបង្កើនការការពារសត្វផ្សោតហើយនោះ ទិវានេះ ក៏បានបង្ហាញនូវរបាយការណ៍ពីបច្ចុប្បន្នភាពនៃសត្វផ្សោតតាមដងទន្លេមេគង្គផងដែរ។
តាមរបាយការណ៍ ការអភិរក្សកន្លងមក បានធ្វើឲ្យអត្រាងាប់ របស់សត្វផ្សោត ក្នុងប្រទេសកម្ពុជា ថយចុះត្រឹមតែ ១.៦ភាគរយប៉ុណ្ណោះ ក្នុងរយៈពេលជាង ៨ឆ្នាំ បើគិតពីចន្លោះឆ្នាំ ២០០៧ ដល់ឆ្នាំ ២០១៥នេះ។ ទោះជាយ៉ាងណា លោកឈិត សំអាត បានឲ្យដឹងថា ការថយចុះយឺតនេះ នៅមិនទាន់ជាមោទភាពទាំងស្រុងចំពោះការអភិរក្សនៅឡើយទេ។ WWF ចង់ឲ្យចំនួនសត្វផ្សោតថេរ ឬកើនឡើងជាងនេះទៀត។
សូមបញ្ជាក់ថា ក្នុងឆ្នាំ ២០១៥នេះ សត្វផ្សោតសរុប មានចំនួន ៨០ក្បាល គឺថយចុះតែ ៥ក្បាលប៉ុណ្ណោះពីឆ្នាំ ២០១០ ដែលមាន ៨៥ក្បាល។ កាលពីឆ្នាំ ១៩៩៧ សត្វផ្សោតមាន ២០០ក្បាល ហើយបានធ្លាក់ចុះមក ១២៧ក្បាល នៅឆ្នាំ ២០០៥ រួចបន្តធ្លាក់ចុះ ៧ភាគរយ ពោលគឺមានត្រឹម ៩៣ក្បាល ក្នុងឆ្នាំ ២០០៧ និងធ្លាក់ចុះមកនៅត្រឹម ៨៥ក្បាល ក្នុងឆ្នាំ ២០១០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ