ក្រសួងធម្មការមិនទាន់ធ្វើសកម្មភាពជាក់ស្តែងតាមសំណើព្រះសង្ឃទេ
មិនទាន់មានសកម្មភាពជាក់ស្តែងតាមសង្ឃប្រកាសដែលស្នើឱ្យរដ្ឋាភិបាល«ចាត់វិធានការតាមនីតិវិធីច្បាប់»ចំពោះជនដែលមន្ត្រីសង្ឃក្នុងគណៈមហានិកាយចោទថា«បំផ្លាញព្រះពុទ្ធសាសនា»ទេ។ នេះបើយោងតាមអ្នកនាំពាក្យឱ្យក្រសួងធម្មការ និងសាសនាកម្ពុជា ដែលបានប្រាប់នៅថ្ងៃព្រហស្បតិ៍នេះថា មានមូលហេតុមួយចំនួនក្នុងរឿងនេះ។
ចុះផ្សាយនៅថ្ងៃ៖
ស្តាប់ - ០១:៤១
លោក សេង សុមុនី អ្នកនាំពាក្យឱ្យក្រសួងធម្មការ និងសាសនាកម្ពុជា បានឱ្យដឹងនៅព្រឹកថ្ងៃព្រហស្បតិ៍ថា ស្ថាប័ននេះមិនទាន់ប្តឹងអាជ្ញាធរមានសមត្ថកិច្ចឱ្យបញ្ឈប់«ជនអន្ធពាលទមិឡឥតសាសនា»ដែលមន្ត្រីសង្ឃក្នុងគណៈមហានិកាយចោទថា«កំពុងធ្វើចលនាយុវជនដើម្បីបំផ្លាញព្រះពុទ្ធសាសនា»នៅកម្ពុជាទេ។
យោងតាមសេចក្តីណែនាំ និងសង្ឃប្រកាសរបស់គណៈសង្ឃនាយកនៃព្រះរាជាណាចក្រកម្ពុជា ពេលបិទអនុសំវច្ឆរៈមហាសន្និបាទមន្ត្រីសង្ឃទូទាំងប្រទេសឆ្នាំ២០១៥កាលពីថ្ងៃពុធ «ជនឥទ្ធពាលទមិឡឥតសាសនា» ដែលសម្ដេចព្រះសង្ឃនាយក នន្ទ ង៉ែត និងមន្ត្រីសង្ឃក្នុងគណៈមហានិកាយ បានលើកឡើងនោះ គឺសំដៅដល់«ប្រធានគណបក្សសម្ព័ន្ធដើម្បីប្រជាធិបតេយ្យ»។ ប្រធានគណបក្សដែលមានសញ្ញាជួងជាសម្គាល់នោះគឺលោក ខឹម វាសនា ដែលជារឿយៗបានប្រៀបប្រដូចព្រះសង្ឃអង្គខ្លះទៅនឹង«ចោរថង់យាម ដែលយកព្រះពុទ្ធសាសនា (...) មកបាំងមុខ ដើម្បីលាភសក្ការៈផ្ទាល់ខ្លួន»។
ការណ៍ដែលក្រសួងធម្មការ និងសាសនា នៅមិនទាន់ធ្វើសកម្មភាពភ្លាមៗតាមសំណើរបស់មន្ត្រីសង្ឃក្នុងគណៈមហានិកាយដូច្នេះ ត្រូវបានលោក សេង សុមុនី ពន្យល់ថា គឺដោយសារតែត្រូវទុកពេលឱ្យវត្តអារាមទូទាំងប្រទេសកម្ពុជា អនុវត្តសេចក្តីណែនាំរបស់គណៈសង្ឃនាយកសិន និងថារងចាំការប្រជុំជាបន្តបន្ទាប់ទៀតនៅក្នុងចំណោមមន្ត្រីសង្ឃផង។
សេក្តីណែនាំរបស់គណៈសង្ឃនាយកនៃព្រះរាជាណាចក្រកម្ពុជា មានចែងអំពីការហាមមិនឱ្យភិក្ខុ និងសាមណេរ ក្នុងគណៈមហានិកាយ ទៅសេពគប់នឹងគណបក្សសម្ព័ន្ធដើម្បីប្រជាធិបតេយ្យតទៅទៀត និងអំពីការមិនអនុញ្ញាតឱ្យភិក្ខុ និងសាមណេរទាំងឡាយស្ថិតក្នុងភេទជាបុព្វជិតទៀតទេ ប្រសិនបើមិនអាចអប់រំ ឬអូសទាញត្រឡប់មកវិញបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ