ក្នុងរយៈពេលជាង១ខែ៖ អាជ្ញាធរបញ្ជូនអ្នកល្មើសច្បាប់ចរាចរណ៍ជាង១០០នាក់ ទៅកាន់តុលាការ
ក្រសួងមហាផ្ទៃនៅថ្ងៃពុធនេះ បានបើកកិច្ចប្រជុំផ្សព្វផ្សាយឱ្យទូលំទូលាយស្តីពីច្បាប់ចរាចរណ៍ផ្លូវគោកថ្មី។ ច្បាប់ចរាចរណ៍ដែលទើបតែដាក់ឱ្យអនុវត្តបាន១ខែតែប៉ុណ្ណោះ។ យ៉ាងណាក៏ដោយ ក្រោយកិច្ចប្រជុំក្រសួងមហាផ្ទៃបានបញ្ជាក់ថា អាជ្ញាធរបានបញ្ជូនជនល្មើសប្រមាណជាង១០០នាក់ទៅកាន់តុលាការដើម្បីផ្តន្ទាទោស។ ដោយឡែកអ្នកជំនាញបញ្ហាចរាចរណ៍ ស្នើឱ្យរដ្ឋាភិបាលបន្តការអនុវត្តបន្តឹងច្បាប់ និងព្យួរចំណុចមួយចំនួន។
ចុះផ្សាយនៅថ្ងៃ៖
ស្តាប់ - ០២:៤៧
មានជនល្មើសប្រមាណជាង១០០នាក់ត្រូវបានបញ្ជូនទៅកាន់តុលាការដោយសារល្មើសច្បាប់ចរាចរណ៍ថ្មី។ អ្នកល្មើសទាំងនោះ គឺជាអ្នកសេពគ្រឿងស្រវឹង និងអ្នកបង្កគ្រោះថ្នាក់ចរាចរណ៍។សម្លេងលោកហ៊ឹម យ៉ាន អគ្គរងស្នងការនគរបាលជាតិ។
លោកឧត្តមសេនីយ៍រូបនេះបានបន្ថែមថា ភាគច្រើនអ្នកដែលល្មើសគឺជាអ្នកសេពគ្រឿងស្រវឹង និងអ្នកបើកបរហួសល្បឿនកំណត់ដោយនៅក្នុងនោះ អ្នកដែលល្មើសច្បាប់កាលពីខែមករាមានប្រមាណជា៤០នាក់ ដោយឡែកក្នុងដើមសប្តាហ៍ទី១នៃខែកុម្ភៈ អ្នកល្មើសច្បាប់ថ្មីនេះ មានចំនួន៦២នាក់។ យ៉ាងណាក៏ដោយ អ្នកនាំពាក្យតុលាការសាលដំបូងរាជធានីភ្នំពេញ លោក លីសុផាន់ណា មិនអាចឆ្លើយបំភ្លឺបាននោះទេចំពោះករណីជនល្មើសទាំងអស់ដែលអាជ្ញាធរបានបញ្ជូនទៅកាន់តុលាការទេ។ លោកបញ្ជាក់យ៉ាងខ្លីថា កំពុងជាប់ប្រជុំ។ ការចាប់បញ្ជូនជនល្មើសច្បាប់ចរាចរណ៍ច្រើនសន្ធឹកសន្ធាប់បែបនេះ គឺធ្វើឡើងបន្ទាប់ពីរដ្ឋាភិបាលបានដាក់ឱ្យអនុវត្តច្បាប់ចរាចរណ៍ផ្លូវគោកថ្មីនៅខែមករាឆ្នាំ២០១៦នេះ។
គួរកត់សម្គាល់ផងដែរថា ទន្ទឹមនឹងការអនុវត្តតឹងរ៉ឹងចំពោះច្បាប់ចរាចរណ៍ថ្មីនេះ រដ្ឋាភិបាលនៅថ្ងៃពុធទី១០កុម្ភៈនេះ បានសម្រេចដាក់ឱ្យវិសោធនកម្មច្បាប់ថ្មីនេះចំនួន៨មាត្រាផងដែរ។ មាត្រាទាំងនោះគឺមាត្រា៨ មាត្រា៤០ និងមាត្រា៤១ ដែលពាក់ព័ន្ធនឹងការលុបចោលប័ណ្ណបើកបរម៉ូតូប្រភេទក១ដែលមានកម្លាំង១២៥សេសេ ចុះក្រោម។ ដោយឡែកមាត្រា៤៨ពាក់ព័ន្ធនឹងការផ្ទេរកម្មសិទ្ធយានយន្ត។ ដោយឡែកមាត្រា៧៥ មាត្រា៧៧ គឺពាក់ព័ន្ធនឹងការបើកបរ ដែលមានជាតិស្រវឹងលើសពី០.៤០មីលីក្រាមក្នុងមួយលីត្រខ្យល់ឡើងទៅ ចំណែកមាត្រា៨២ គឺពាក់ព័ន្ធនឹងការបើកបរដោយគ្មានប័ណ្ណសម្គាល់ និងគ្មានស្លាកលេខយានយន្តចំពោះរថយន្ត ចំពោះមាត្រា៩០ គឺការពាក់ខ្សែក្រវាត់ការពារសុវត្ថិភាព។
លោកកឹម បញ្ញា នាយកប្រចាំប្រទេសនៃអង្គការបង្ការបួសអាស៊ី ប្រចាំនៅកម្ពុជាបានស្នើឱ្យរដ្ឋាភិបាលមិនគួរប្រញាប់វិសោធនកម្មច្បាប់ទាំងនេះពេកនោះទេ។ មិនប្រញាប់ព្រោះថា ច្បាប់នេះទើបតែដាក់ឱ្យអនុវត្ត ហើយរដ្ឋាភិបាលគួរទុកពេលសម្រាប់អន្តរកាលព្យួរការអនុវត្ត និងសម្រួលឱ្យរដ្ឋនូវសេវាកម្មកម្រិតទាបនិងទាន់ចិត្តជូនប្រជាពលរដ្ឋវិញប្រសើរជាង។ លោកបានសង្កត់ធ្ងន់ថា ការចង់វិសោធនកម្មរបស់រដ្ឋាភិបាលនេះគឺបណ្តាលមកពីការតវ៉ាច្រើនពីប្រជាពលរដ្ឋតែប៉ុណ្ណោះ។
បើទោះបីជា មនុស្សប្រមាណជាង១០០នាក់ត្រូវប្រឈមមុខនឹងតុលាការដោយសារច្បាប់ចរាចរណ៍ថ្មីក៏ដោយ ក៏រដ្ឋាភិបាលនៅតែប្រកាន់ជំហរយ៉ាងម៉ឹងម៉ាត់ចំពោះការអនុវត្តដដែលដើម្បីធានាសុវត្ថិភាពដល់អ្នកបើកបរ និងអាយុជីវិតរដ្ឋទូទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ