សម្ព័ន្ធសហជីពអន្ដរជាតិស្នើឲ្យទម្លាក់បទចោទលើជនជាប់ចោទក្នុងរឿងអំពើហិង្សានៅមុខក្រុមហ៊ុនកាពីតូល
សម្ព័ន្ធសហជីពអន្ដរជាតិ កាលពីថ្ងៃទី១១ខែកុម្ភៈ បានផ្ញើលិខិតមួយទៅកាន់ លោក អ៊ិត សំហេង រដ្ឋមន្ដ្រីក្រសួងការងារ។ ខ្លឹមសារនៃលិខិតកម្រាស់ពីរទំព័រនេះ មានគោលដៅស្នើឲ្យក្រសួងការងារ ធ្វើអន្ដរាគមន៍ ទម្លាក់បទចោទលើអ្នកតវ៉ាទាំងឡាយ ដែលត្រូវតុលាការចោទប្រកាន់ក្នុងសំណុំរឿងអំពើហិង្សានៅមុខក្រុមហ៊ុនកាពីតូល។ ជាមួយគ្នានេះ សម្ព័ន្ធសហជីពអន្ដរជាតិ ក៏បានទាមទារឲ្យដោះលែងអ្នកតវ៉ាពីរនាក់ ដែលត្រូវបានចាប់ខ្លួននៅក្នុងបាតុកម្ម កាលពីថ្ងៃទី៦ខែកុម្ភៈកន្លងទៅផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
សម្ព័ន្ធសហជីពអន្ដរជាតិ ថ្កោលទោសយ៉ាងខ្លាំង ចំពោះអំពើហិង្សាដ៏ឃោឃៅ ដែលកើតឡើងលើអតីតបុគ្គលិកដែលបម្រើការងារនៅក្រុមហ៊ុនទេសចរណ៍កាពីតូល។ នេះគឺជាអ្វីដែលសម្ព័ន្ធសហជីពអន្ដរជាតិ សរសេរនៅក្នុងលិខិតផ្ញើជូន លោក អ៊ិត សំហេង រដ្ឋមន្ដ្រីក្រសួងការងារកម្ពុជា កាលពីថ្ងៃទី១១កុម្ភៈកន្លងទៅ។
បន្ថែមពីលើការថ្កោលទោស សម្ព័ន្ធសហជីពអន្ដរជាតិ ក៏បានទាមទារឲ្យមានការទម្លាក់ចោលការចោទប្រកាន់លើអ្នកតវ៉ាទាំងឡាយ ដែលត្រូវតុលាការចោទប្រកាន់ក្នុងសំណុំរឿងអំពើហិង្សានៅមុខក្រុមហ៊ុនកាពីតូល។ ដោយឡែក ចំពោះអតីតអ្នកបើកបរឡានក្រុងម្នាក់ និងមន្ដ្រីសហជីពម្នាក់ ដែលត្រូវបានចាប់ខ្លួនក្នុងសំណុំរឿងដដែលនេះ ក៏ត្រូវបានសម្ព័ន្ធសហជីពអន្ដរជាតិ ទាមទារឲ្យមានការអន្ដរាគមន៍ដោះលែងផងដែរ។
សូមរំលឹកថា រហូតមកទល់ពេលនេះ មានមនុស្សយ៉ាងហោចណាស់៦នាក់ហើយ ដែលត្រូវបានសាលាដំបូងក្រុងភ្នំពេញ ចោទប្រកាន់និងចាប់ខ្លួន ក្នុងសំណុំរឿងអំពើហិង្សានៅមុខក្រុមហ៊ុនទេសចរណ៍កាពីតូល កាលពីថ្ងៃទី៦ខែកុម្ភៈកន្លងទៅ រវាងក្រុមរ៉ឺម៉កកង់បីមកពីសមាគមដើម្បីអភិវឌ្ឍកម្ពុជា និងក្រុមអតីតអ្នកបើកបរឡានក្រុងរបស់ក្រុមហ៊ុនទេសចរណ៍កាពីតូល។
ក្នុងនោះ ព្រះរាជអាជ្ញានៃសាលាដំបូងក្រុងភ្នំពេញ បានចោទប្រកាន់ប្រធានសហជីពចំនួន៤រូប ថាជាប់ពាក់ព័ន្ធនឹងការបង្កអំពើហិង្សាដោយចេតនា រារាំងមន្ដ្រីសាធារណៈ និងធ្វើឲ្យកកស្ទះការធ្វើដំណើរតាមផ្លូវសាធារណៈ។ ប្រធានសហជីពទាំង៤រូបនោះ មានជាអាថិ៍ លោក អាត់ ធន់ ប្រធានសម្ព័ន្ធសហជីពស៊ីខាវឌូ លោក គង់ អាទិត្យ អគ្គលេខាធិការសហជីពស៊ីខាវឌូ លោក អៀង គឹមហ៊ុន ប្រធានសហជីពការងារ និងលោក ឈុនអឿង ប្រធានសមាគមការងារ។ ដោយឡែក ក្រៅពីប្រធានសហជីពទាំង៤រូបនេះ មានមនុស្សចំនួនពីររូបផ្សេងទៀត ម្នាក់ជាអតីតអ្នកបើករថយន្តឲ្យក្រុមហ៊ុនកាពីតូល និងម្នាក់ទៀតជាសកម្មជនសិទ្ធិការងារ ត្រូវបានចាប់ខ្លួន ក្នុងបទចោទចំនួន៣ ដូចគ្នាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ