លោក ឱម យ៉ិនទៀងព្រមានលាតត្រដាងអំពើពុករលួយរបស់លោកសម រង្ស៊ី
ប្រធានអង្គភាពប្រឆាំងអំពើពុករលួយ លោកឱម យ៉ិនទៀង បានឱ្យដឹងថាអង្គភាពមានព័ត៌មានសំងាត់ស្តីពីអំពើពុករលួយរបស់លោកសម រង្ស៊ី។ ប្រធានអង្គភាពរូបនេះ បានអះអាងថាប្រសិនបើលោក សម រង្ស៊ីនៅបន្តរិះគន់ជាបន្តទៀត លោកនឹងបញ្ចេញព័ត៌មានទាំងនេះ។ គណបក្សសង្គ្រោះជាតិស្វាគមន៍ចំពោះព័ត៌មាននេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥២
ប្រធានអង្គភាពប្រឆាំងពើពុករលួយ ព្រមានទម្លាយអាថ៌កំបាំងពុករលួយរបស់លោក សម រង្ស៊ីប្រសិនបើមេបក្សរូបនេះនៅបន្តរិះគន់។ (សម្លេង)
សម្រាប់ប្រធានអង្គភាពប្រឆាំងអំពើពុករលួយរបស់រដ្ឋាភិបាល ក្រៅពីករណីលោក សម រង្ស៊ីខ្លួនឯង ក៏មានដែរករណីអំពើពុករលួយរបស់មន្ត្រីគណបក្សសង្គ្រោះជាតិជាច្រើនទៀត។ ប៉ុន្តែប្រធានអង្គភាពនេះ នៅមិនទាន់បញ្ជាក់ពីប្រភេទនៃអំពើពុករលួយដែលលោក សម រង្ស៊ីមាននោះដែរ។
ភ្លាមៗគណបក្សសង្គ្រោះជាតិ ស្វាគមន៍ចំពោះព័ត៌មានពីអង្គភាពប្រឆាំងអំពើពុករលួយរបស់មេដឹកនាំគណបក្សខ្លួនដែលកំពុងរុំព័ទ្ធដោយបណ្តឹងតុលាការ។ លោកអេង ឆៃអ៊ាង មន្ត្រីជាន់ខ្ពស់គណៈមជ្ឈឹមគណបក្សសង្គ្រោះជាតិ លើកឡើងថា គណបក្សគ្មានការភ័យព្រួយអ្វីឡើយចំពោះការព្រមាននេះ ព្រោះថាអំពើពុករលួយគឺជាអ្វីដែលពលរដ្ឋខ្មែរស្អប់ខ្ពើម ប៉ុន្តែអង្គភាពត្រូវតែធ្វើការដោយយុត្តិធម៌។ សម្រាប់សមាជិកសភា និងជាប្រធានគណៈកម្មការទី១របស់រដ្ឋសភា អំពើពុករលួយនៅក្នុងស្រុកខ្មែរគឺគេអាចដឹងបានយ៉ាងងាយស្រួលព្រោះថាមនុស្សមួយចំនួនពេលមុនកាន់អំណាចអ្នកខ្លះមិនមានអ្វីទាំងអស់ ប៉ុន្តែក្រោយកាន់អំណាចទ្រព្យសម្បតិ្តវីឡា និងរថយន្តទំនើបៗ។
ការព្រមានពីសំណាក់លោក ឱម យ៉ិនទៀង នេះ គឺបន្ទាប់ពីប្រតិកម្មរិះគន់ពីសំណាក់លោកសម រង្ស៊ី។ លោកសម រង្ស៊ី បានរិះគន់អង្គភាពរបស់លោកឱមយ៉ិនទៀងថា មិនស្គាល់តួនាទីរបស់ខ្លួននោះទេ ដែលកំពុងបើកការស៊ើបអង្កេតលើករណីលោក កឹម សុខា។ សម្រាប់ ប្រធានគណបក្សប្រឆាំងរូបនេះ អំពើពុករលួយ គឺជាទង្វើរបស់អ្នកមានអំណាច ដែលកេងប្រវ័ញ្ច និងលួចផលចំណេញ ពីការលក់ដូរ ឬការប្រើប្រាស់ទ្រព្យសម្បត្តិជាតិ ទ្រព្យសម្បត្តិរាស្ត្រ និងទ្រព្យសម្បត្តិរដ្ឋ។ និយាយឱ្យខ្លីគឺមានតែមន្ត្រីគណបក្សកាន់អំណាច ដែលដឹកនាំដោយគណបក្សប្រជាជនរបស់លោកនាយករដ្ឋមន្ត្រីហ៊ុន សែនទេ។ ដោយឡែក មន្ត្រីគណបក្សប្រឆាំង គណបក្សសង្គ្រោះជាតិ មិនមានអំណាចអ្វី ជាតំណាងរដ្ឋ ឬតំណាងរដ្ឋាភិបាល ដើម្បីប្រព្រឹត្តអំពើពុករលួយឡើយ។
ករណីលោក កឹម សុខា ដែលជាដើមហេតុធ្វើឱ្យមានសង្គ្រាមរវាងលោកសម រង្ស៊ីនិង លោក ឱមយ៉ិនទៀងនោះ ពេលនេះអង្គភាពប្រឆាំងអំពើពុករលួយកំពុងដំណើរការស៊ើបអង្កេតទៅលើទ្រព្យសម្បត្តិលោកកឹម សុខាហើយ បន្ទាប់ពីអង្គភាពបានហែកស្រោមសំបុត្រប្រកាសទ្រព្យសម្បត្តិលោក កឹម សុខា។
យ៉ាងណាក៏ដោយ ករណីអំពើពុករលួយលោក កឹម សុខាដែលក្រុមនិស្សិតមួយក្រុមប្តឹងបានធ្វើឱ្យរាលដាលដល់ករណីលោក សម រង្ស៊ីដែលជាប្រធានគណបក្សហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ