សីតុណ្ហភាពក្តៅខ្លាំង ក្រសួងសុខាភិបាលប្រាប់ប្រជាពលរដ្ឋឲ្យប្រុងប្រយ័ត្នបញ្ហាសុខភាព
ចាប់ពីថ្ងៃទី១៧ ដល់ថ្ងៃទី២២ ខែមេសា សីតុណ្ហភាពក្នុងប្រទេសកម្ពុជានៅតែក្តៅខ្លាំង។ សីតុណ្ហភាពក្តៅខ្លាំងនេះ គឺដោយសារកម្ពុជាទទួលរងបាតុភូតអ៊ែលនីញូ(El Niño)។ នេះបើតាមក្រសួងធនធានទឹក និងឧតុនិយម។ ក្រសួងសុខាភិបាលវិញក៏បានបញ្ជាក់ថាប្រជាពលរដ្ឋអាចនឹងកើតជំងឺមួយចំនួន ដោយសារសីតុណ្ហភាពក្តៅខ្លាំង។
ចុះផ្សាយនៅថ្ងៃ៖
ស្តាប់ - ០១:៥៨
តំបន់វាលទំនាប ក្នុងប្រទេសកម្ពុជាមានសីតុណ្ហភាពអតិបរមាពី៣៧អង្សា ទៅ៤១អង្សា។ តំបន់មាត់សមុទ្រ មានសីតុណ្ហភាព៣៤អង្សា ទៅ៣៧អង្សា និងតំបន់ខ្ពស់រាបមានសីតុណ្ហភាពអតិបរិមា៣៦អង្សា ទៅ៤១អង្សា។ លោក ចាន់ យុត្ថា អ្នកនាំពាក្យក្រសួងធនធានទឹក បានបញ្ជាក់ថាការកើនឡើងកម្តៅ ដែលមិនធ្លាប់មាននេះ គឺកើតឡើងក្នុងតំបន់ជាច្រើនលើពិភពលោក។ លោកបន្ថែមថាតំបន់អាស៊ានវិញ បានរងនូវបាតុភូតកម្តៅអ៊ែលនីញូ ហើយរហូតដល់ចុងខែកក្កដា នោះនឹងមានបាតុភូតត្រជាក់(La Nina)ជំនួសវិញ។
យ៉ាងណាមិញអ្នកនាំពាក្យរូបនេះបានបញ្ជាក់ថាសីតុណ្ហភាពនឹងថយចុះនៅតាមតំបន់មួយចំនួន ដែលមានភ្លៀងកក់ខែ ប៉ុន្តែ ២ ឫ៣ថ្ងៃ ក្រោយមកនោះសីតុណ្ហភាពនឹងកើនឡើងវិញ។ ក្នុងឆ្នាំ២០១៦នេះ គឺជាឆ្នាំដែលមានសីតុណ្ហភាពក្តៅខ្លាំងជាងគេបំផុត ក្នុងរយៈពេល២០ឆ្នាំចុងក្រោយ សម្រាប់កម្ពុជា។ នេះបើតាមក្រសួងធនធានទឹក។
ក្រសួងសុខាភិបាលវិញ បានបញ្ជាក់ថា កំណើនសីតុណ្ហភាពអតិបរមារហូតដល់៤១អង្សានេះអាចនឹងធ្វើឲ្យប្រជាពលរដ្ឋមានបញ្ហាសុខភាព។ លោកវេជ្ជបណ្ឌិត លី សូវ៉ាន់អ្នកនាំពាក្យក្រសួងសុខាភិបាលបានបន្ថែមថាប្រសិនបើប្រជាពលរដ្ឋមិនទទួលទានទឹកឲ្យបានគ្រប់គ្រាន់ទេ នោះនឹងបណ្តាលឲ្យមានជំងឺអស់កម្លាំង ហើយប្រសិនបើជំងឺអស់កម្លាំងនេះ មិនទទួលការព្យាបាលនោះអ្នកជំងឺអាចនឹងសន្លប់ ដោយសារខ្វះជាតិទឹក។
ដើម្បីបង្ការជំងឺ ដែលអាចកើនឡើងនៅពេល ដែលសីតុណ្ហភាពក្តៅខ្លាំងនេះ លោកវេជ្ជបណ្ឌិត លី សូវ៉ាន់ បានបញ្ជាក់ថាប្រជាពលរដ្ឋត្រូវ ស្លៀកពាក់ខោអាវស្តើង និងមានពណ៌ភ្លឺ ពាក់មួក ឬបាំងឆ័ត្រ ឬជ្រកក្រោមម្លប់។ លោកបានបន្ថែមថា ប្រជាពលរដ្ឋត្រូវឧស្សាហ៍ពិសារទឹក បើទោះបីជាមិនស្រេកទឹកក៏ដោយ។
សូមបញ្ជាក់ថាកាលពីខែវិច្ឆកា ឆ្នាំ២០១៥ ប្រទេសទូទាំងពិភពលោករួមទាំងកម្ពុជាផង បានចូលរួម សន្និសីទអន្តរជាតិស្តីពីបញ្ហាអាកាសធាតុក្នុងប្រទេសបារាំង ដើម្បីបង្កើតកិច្ចព្រមព្រៀងមួយទប់ស្កាត់កុំឲ្យសីតុណ្ហភាពក្នុងបរិយាកាសកើនលើសពី ២អង្សាចាប់ពីពេលនេះទៅដល់ដំណាច់សតវត្សទី២១ នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ